Alkitab Mobile SABDA
[VER] : [BIAK]     [PL]  [PB] 
 <<  1 Yohanes 5 >> 

1Snonkaku ḇekyar Yesus ikada Wairek Ḇeḇuk koreri, Allah ḇyeasas kwar, snonkaku ani kada Allah romawa ḇyedirya. Ma snonkaku ḇeswar Kmaya, iswar Kmaya Rumkun ḇyedi kako.

2Nari kofawi koswar Allah romawa ḇyesi, rofyor koswar Allah ma koḇesyowi sasoser ḇyena.

3Snar, koswar Allah inja koḇeuser sasoser ḇyena. Ma sasoser ḇyena nmarḇak maro ko ḇa,

4snar Allah romawa ḇyesi sambraḇ sifrurkafyo supswan ḇeḇarḇor ine. Ma kofrurkafyo supswan kuker kakyar koḇena.

5Mansei ḇefrurkafyo supswan kuker ḇarḇor ḇyena? Derer monda snonkaku ḇekyar Yesus ikada Allah Rumkun ḇyedi.

6Yesus Kristus ryama ḇesupswan kuker masisren ḇyedi ma kuker rik marmar ḇyedi. Ryama kuker war monda ḇa, ḇape kuker war ma rik kako. Ma Allah Rur ḇyedi mankundi ḇeḇesaksi mboi inekada kyaku, snar Rur anikada inapes.

7Snar saksi rikior isya [ro boiyaswa: Kmaya, Wosya ma Rur Ḇesrenya; sko kam skoḇeoser.

8Ma saksi rikior skoḇuk ḇaḇesaksi ro supswan ine]: Rurya, warya ma rikya, skokam skoḇeoser.

9Kokyar ḇaḇesaksi ro snonkaku, ḇape ḇaḇesaksi ro Allah syambraḇ syadi wer. Ma inekada ḇaḇesaksi Allah ḇyuk kwar ro Rumkun ḇyedi.

10Mansei ḇekyar faro Allah Rumkun ḇyedi, isma kwar ḇaḇesaksi ani ro mankundi; ḇape mansei ḇekyar Allah ḇa, ifrur kwar Allah ḇe ḇeḇeankarkar, snar ikyar ḇa rosai Allah ḇyesaksi kwar ro Rumkun ḇyedi.

11Ḇaḇesaksi ani isoine: Allah ḇyuk kwar ḇeko kankenem ḇekain fyoroya; ma Rumkun ḇyedi ḇeḇeknam kankenem ḇekain fyoro ani.

12Ma mansei ḇena Rumkun ani, nari nya kankenem ḇekain fyoro ani; ma mansei ḇena Allah Rumkun ḇyedi ḇa, nari nya kankenem ani ḇa.

13Faro ḇekyar Allah Rumkun ḇyedi, yafas nane kam insa mkofawi mkona kankenem ḇekain fyoroya kwar.

14Ma komsik ḇo kora faro Allah, snar kokyar imnaf fararyor koḇena, rofyor kor rosairya wer imnis kuker marisen ḇyedi.

15Ma rofyor kofawi imnaf fararyor koḇena ma kofawi kako nari ḇyuk rosai kor kwar faroi na.

16Rofyor snon Kristen koḇesi oso ifrur sasar ḇeyun ḇemarmar ḇa, mkonadi warek i faro Allah; ma nari Allah ḇyuk kankenem faro snon ani. Ine kyur ḇefrur sasar ḇeyun ḇemarmar ḇa. Ḇape isya sasar ḇeyun ḇemarmar, ima yakofen ḇa insa mkonadi warek faro Allah ro sasar ani.

17Fararur ḇeḇor ḇeḇarḇor, sasarnairya, ḇape isya sasar ḇeyun ḇemarmar ḇa.

18Kofawi snonkaku ḇeḇeromawa Allah, sifrur sasar sawawek ḇa, snar Allah Rumkun ḇyedi fyadiren si, ma Ibirisya ifrur roi oso faro si ḇa.

19Kofawi koine koḇeknam ro Allah, ma supswan ḇesiper ine isya ro papoik Ibirisya.

20Kofawi Allah Rumkun ḇyedi ryama kwar ma ḇyuk ḇeko fawawi kwar, insa kofawi Allah Ḇenapesya. Kankenem koḇena neoser kuker Allah Ḇenapes ani ma koḇeoser kuker Rumkun ḇyedi Yesus Kristus. Ikada Allah Ḇenapes, ma ikada kankenem ḇekaku ḇekain fyoroya.

21Romawa ayesi, mkoḇinkwanbur amfyanir ḇeḇor kam!



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Yohanes 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel