1Inja, ne, romawa yedi, swambraḇ ro saswar-fakamaman ro Yesus Kristus.
2Rosai wamnaf ro aya kwar ro saksi ḇeḇor, farkorna kada faro snonkaku wakyarsya, ma sifawinanem kako sakfarkor snonkaku ḇese.
3Mkoso ma mkakḇekandera imnis sordade ḇeḇye ro Yesus Kristus.
4Rofyor sordade oso ḇyesewar ro fararur ma ḇyefandun ḇaḇefandun mankundi ḇyena ḇa, rarirya mananir ro sarar ḇyedi imarisen.
5Snonkaku oso ḇefaḇri ro farfnak syewar monda faisma wower rofyor isomnis sasoser ḇekur farfnak ani.
6Manfrudo oso ḇefararur myaren ro yaf iso nari ḇeyan ḇepon pun ro ardomes ḇyena.
7Waswarepen rosai yakofen nane; Manseren nari ḇyuk fawawi faro aw ro roi ḇeḇor kam.
8Waswarepen: Yesus Kristus ḇekḇok kwar rofandu ḇemarsya, ḇyeḇeyaḇen kwar imnis up ro Daud, iso yaḇaryas ro Ankankinem Ḇeḇye ayedi.
9Snar ḇaḇeḇaryas Ankankinem Ḇeḇye ine eḇedari yaḇekandera, ma sewanka aya imnis snonkaku ḇeḇarḇor oso, ḇape Allah wos ḇyedi kada ḇyeḇeḇewanka ḇa.
10Eḇedari yakbaḇ ḇo yaḇarna kam faro snonkaku Allah kyinfirsya, insa si kako saksma koreri snar Yesus Kristus kuker ḇaḇebaba ḇyedi ḇekain fyoroya.
11Kaku ḇeri ro wos ine: "Rofyor komar fnoḇek i, ko kako nari kokenem fnoḇek i;
12Rofyor kofarmku, ko kako nari kakḇuk sasoser fnoḇek i. Rofyor ko famyun i, i kako nari dakfamyun ko.
13Rofyor komkuser ko ḇa, i kada imku faswef, snar nari fyamyunepen mankundi ḇa."
14Buk swarepen ma wanun nakam kuker kaku ḇeri faro si ro Allah ḇarpon ḇyedi, insa spambarḇar wos awer, snar roi ḇeradine nefainda ḇaḇeri, isyadi naser famfaḇri faro ḇemnafsya.
15Besewar insa wasyus ro Allah ḇarpon ḇyedi imnis snon oso ḇemai ḇa, mboi baryasbos wos ḇenapes ani.
16Ḇape wamnaf awer faro wos ḇekaku ḇa ma ḇemamasna.
17Wawos sena naduḇ imnis dafduf kanker: Rofandu si Himeneus ma Filetus su kako,
18ḇeḇor kwar ro nyan ḇenapesya ma ḇefarkor mboi kuker ḇaḇeaḇiḇer ro bakenya isyof kwar ma rarirya skokok kakyar ro snonkaku ono.
19Ḇape araref Allah ryirya idworen ma sfas ro araref ani radine: "Manseren ifawi snonkaku ḇyesi" ma "Snonkaku oser-oser ḇeyap Manseren snonsnon ḇyedi isusubur ḇarḇorna kada."
20Ro rum ḇebaya dori kosma dera brawen ma sarak monda ḇa, mboi ono kako ro ai ma saprop; kona ono faro roi ḇeḇye syadi ma kona ono faro roi ḇeḇye mankenem ḇa.
21Rofyor snon oso fyasren mankundi ro roi ḇeḇarḇor, nari ḇyedera ro rum ani faro roi ḇeḇye syadi, ḇyeḇefasren, ma ḇyefainda faro tuan ḇyedi ma ḇyeḇefasos faro fararur rosai ḇeḇye syadiya.
22Fanam awer marasrisen ḇeḇerarmomen baken ro snonkborsya, mboi swewar ḇaḇenapnapesya, ḇaḇefarmkuya, saswar ma aski fnoḇek snonkaku ḇefararyor faro Manseren kuker sne ḇesrensya.
23Fanam awer wawos ḇeḇor ro snonkaku ḇefawi royoḇasya. Snar wafawi roi ḇerarirya nbawes rakrakrok,
24snar Manseren manfamyan ḇyesi nari srakrakrok ḇa, mboi sfafir faro snonkakusya kam. Ifawi ḇyuk farkarkor, ikbaḇ
25ma kuker aḇaḇen fyarkin snonkaku ḇesampampumsya, snar kofawi ḇa imbude Manseren ḇyuk farosi fafisu ono fasimbror ma fyarkin si isof smamḇaḇir ḇaḇenapnapesya,
26ma rarirya nari sḇaḇir wer, nari sḇeḇeperbur Ibirisya denem ḇyedi ḇeyaḇek si kwar kuker marisen ḇyena.