Alkitab Mobile SABDA
[VER] : [BIAK]     [PL]  [PB] 
 <<  2 Timotius 4 >> 

1Ro ḇarpon Allah ma Yesus Kristus nari bemankara snonkaku ḇekenem ma ḇemarsya, inja yanunkaku ḇeri faro aw kuker fasasna ro Allah ma Ḇaḇesasoser ḇyedi:

2Baryas Allah wos ḇyedi, fasos rofafisu ḇeḇye roḇa fafisu ḇesamswen, fasna rosai ḇesasar, wasonek ma buk ananun kuker kaḇaḇaḇ ma farkarkor.

3Snar rofafisuya nari ryama, snonkakusya nari sisma farkarkor ḇenapes werḇa, mboi nari siryur gurusya raris marisen sena fasḇuk farkarkor raris mankunsi marisen sena.

4Sikada nari snos knaram senabur napnapesya ma sḇasna faro farfyar kakais monda.

5Ḇape wepen mankundaw ro roi ḇeḇor kam, wakḇaḇ ro ḇaḇekandera, wafrur fararur ḇaḇeḇaryas Ankankinem Ḇeḇye, ma wafrur posa afuffarmyan bedi!

6Faro mankundaya, fafisuya ryama kwar nari yamar imnis farsarser faro Allah ma kniko wer nari yabur supswan ine.

7Fanandi ḇeḇyeya yafrur posai kwar, ma yasma mun ḇepupesya kwar ma rarirya yafaduru kakyarya kwar.

8Ras suine wower napnapesya ḇyeḇefasosma ḇeaya kwar nari Manseren ḇyukima ḇeaya, Mankara ḇenapes, ro ras ḇepupes ḇyedi; ḇape faro yerer monda ḇa, mboi faro snonkaku kam ḇewaf raramuma ḇyedi.

9Besewar insa rwamuma fasaw,

10snar Demas iswar supswan ine inja ibur aya. Ryai Tesalonika kwar. Kreskes ryai Galatia kwar ma Titus ryaḇe Dalmatia.

11Mboi Lukas derer i ḇekainus aya. Wun Markusi ḇo muramuma, snar afuffarmyan ḇyedi ḇyefandun kakuma ḇeaya.

12Tikhikus yawan i kwar ḇe-Efesus.

13Rofyor rwamuma ido wun syatu ayedi ro Troas yaburi ro Karpus rum ḇyedi ma wun kako syap ayena, isyadi kaku perkamenya (aiwan kif imnis syap ḇefasapepen).

14Aleksander, kamasan kansai ani, ifrur ḇarḇor nabor kwar maro aya. Manseren nari myunsuna imnis fararur ḇyena.

15Inja wepen aw, snar Aleksander isampumbosḇeri farkarkor koḇena.

16Rofyor yaḇesano ro randakya snonkaku oso ifnoḇek aya ḇaḇeri, sikam sibur aya -- roi ḇeradine sikamar awerna, --

17ḇape Manseren ifnoḇek aya ma ḇyuk samambraḇma ḇeaya, insa Ankankinem Ḇeḇyeya yaḇaryasi faḇeyakḇe Yahudiḇasya sakmnaf i. Rarirya yasma faspar ro marmarya.

18Ma Manseren nari fyaspar ayabur ḇarḇorna kam. I kada nari ḇyuk aksi ḇeaya isof yasun ro Ḇaḇesasoser ḇyedi ro boiyaswa. Sanandik faro ḇaḇebaba ḇyedi fyoro-fyoro kada! Amin.

19Aroo faro Priskila ma Akwila ma faro Onesiforus kina ḇyesi.

20Erastus kyain ro Korintus ma Trofinus yabur i ro Miletus snar iduf. Rofafisu primya ḇaim besewar farwamuma kada.

21Aroo faro aw ro Ebulus, Pudes, Linus, Klaudia ma ro naek srarsya kam.

22Manseren ryous aw. Manseren ḇyeḇok naek srar mko kam kada! Ro aya, Paulus



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  2 Timotius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel