Dual Panel1(1a) Papupesya naek srar mkoryaḇ snar Manseren. (1b) Yafas radine faro mko snar nmarḇak maro aya ḇa mboi nbuk aski faro mko.
2Mkosasor mko ro nafsya, mkosasor mko ro snonkaku ḇeḇarḇorsya, mkosasor mko ro sofakfuk ḇesasarna,
3snar koine snonkaku ḇesma sofakfuk ḇekaku, ḇeḇeari kuker Allah Rur ḇyedi, ma ḇemsik kuker Yesus Kristus mboi kosma kakyar faro rari snonkaku ḇa.
4Kaku ḇeri aya kako yasma knam faro yakyar rari snonkaku sena. Rofyor snonkaku ono ḇese sisya skara soḇo sikyar faro rari snonkaku sena, ayama yasyadi wer:
5yasma sofakfuk ro ras ḇeḇewar, ro er Israel, ro keret Benyamin, snon Ibrani kaku, ro ḇaḇeuser sasoser Refo Yahudi aya ine snon Farisi,
6ro fararur yaḇewayam jemaat, ro ḇaḇenapnapes ma sasouser sasoser Refo Yahudi yafarorewḇa.
7Ḇape rosai ḇeḇefandun ḇeaya, baboine nefainda ḇa snar Kristus.
8Rarirya roi ḇeḇor kam yakara naḇe roi ḇeḇefromo, snar mambir faro Yesus Kristus Manseren ayedi, naḇye syadi ro roi nakam. Snar i eḇedari yasawen ḇesena kam ma yakara naḇe mamas, insa yasma Kristus,
9ma aya isya kuker Kristus mboi kuker ḇaḇenapnapes ayena ḇa snar yaḇeuser sasoser Refo Yahudi, mboi kuker napnapes snar kakyar faro Kristus, isoine napnapes Allah ḇyuk snar kakyarya.
10Ma Yamarisen insa yamambaḇir Kristus ma papoik ro ḇaḇeaḇiḇer ḇyedi ma ḇaḇeoser ro ḇaḇekandera ḇyena, ro moḇ yaḇeoser kuker Kristus ro ḇaḇemarmar ḇyedi,
11insa ro papupesya yasma ḇaḇeaḇiḇer rofandu ḇemarsya.
12Inja imnis raris yasma moḇ ine kwar roḇa yamnis kwar, mboi yayawna, isof yaforna, snar aya kako Yesus Kristus fyor aya ro marandan ḇeraḇe Damsyik.
13Naek srar, yakara ḇa ro mankundaya, mboi yaforna kwar,
14ḇape moḇ yafararur raiso ine: yafanander rosai ḇero ḇarpur ayedi kwar ma yamamker monda faro rosai ḇero ḇarpon ayedi, ma yafrar faro yasma sasuref, isoine fararyor ro boiyaswa ro Allah snar Yesus Kristus.
15Inja mkorama, ḇemnis kwar koya, kokara rarirya. Ma rofyor mkona kakara ḇese ro roi oso, roi ḇerarirya ani nari Allah fyasnai faro mko.
16Ma rosairya monda kosma kwar, kombran rarirya monda.
17Naek srar, mkoso kankenem ayedi ma mkomam warek si, imnis kankenem mkomam ro nko.
18Snar, raris yakofen ḇerarwan ono faro mko kwar, ma yafasḇair wer ro baboine kuker kankanes, snar kawasa sibor sikenem imnis sembroḇ Kristus aprop ḇyedi.
19Ḇarpurya nari sisma raro, snar Manseren sedi iso marisen baken sena, simsik si kuker roi ḇefrur mamyai, siswaruserker monda roi ḇero supswan ine.
20Snar koine koḇe kina ro boiyaswa, ma rodia kako kowaf Manseren koḇedi Yesus Kristus ḇeḇuk koreri ḇeko,
21ma nari ḇesadwer baken ḇepyumba koḇenane, fanamnis kuker baken ḇepyum ḇyedi, imnis papoik ḇyedi ḇefrur kafyo roi ḇeḇor kam faro mankundi.