Alkitab Mobile SABDA
[VER] : [BIAK]     [PL]  [PB] 
 <<  Filipi 4 >> 

1Eḇedari, naek srar yaswar kaku ma yaḇeḇare-ḇeswar, raryaḇ ayedi ma wower ayedi, mkores nako kako snar Manseren, ne, naek srar yaswar kaku!

2Yanun mu Euodia ma Sintike, insa muna sne-kakara oser snar Manseren.

3Mboi, yor kaku faro mko kako, Sunsugos, min ḇeḇeasuser ayedi: mkofnoḇek si. Snar sifnoḇek aya kwar ro ḇaḇeḇaryas Ankankinem Ḇeḇyeya, fnoḇek kuker Klemens ma min ḇese yesi ḇesma fararur oser, ḇena snonsnon ḇefasepen ro syap kankenemya.

4Mkoryaḇ ḇesya kwar snar Manseren! Yakofen ḇeoser wer: mkoryaḇ mura!

5Iḇye syadi sneḇefafir mkoḇena snonkakusya kam sifawina. Manseren fyanam kwar!

6Iḇye mkoraryof rosairya wer kako, mboi mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa.

7Saswar-ḇaḇye ro Allah, ḇesyadi ro kakara, nari nfaduru sne ma kakara mkoḇena snar Yesus Kristus.

8Inja papupesya, naek srar, ḇekaku mkoya kam, ḇesma snonsnon mkoya kam, ḇenapes mkoya kam, ḇesren mkoya kam, ḇefafir mkoya kam, ḇewos pyum mkoya kam, ḇeḇenaḇye mkoya kam ma nari ḇesma sanandik, mkokara roi ḇeḇor anna kam.

9Ma rosai mkofarkor kwar, ma rosai mkosma kwar, ma rosai mkomnaf kwar, ma rosai mkomam kwar ro aya, mkofrurna. Mboi Allah ḇeḇeknam saswar-ḇaḇenaḇye nari ryowus mko.

10Yaryab fafayaḇa snar Manseren, mboi ḇarpurya kakara mkoḇena ma ḇaḇaḇir mkoḇena mkoswar aya wer. Mboi swarapepen mkoḇena naisya, ḇape mkosma fafisu ḇa.

11Yakofen rarirya snar yananjar ḇa, snar mankundaya yafrur mnis fandun yena ro fafisu nakam.

12Yafawi rosaiso ḇaḇebakyafya ma yafawi rosaiso andidoya. Ro roi ḇeḇor kam ma rosairya wer nekankunes wer maro aya ḇa; iḇye rofafisu yasyopen, iḇye rofafisu yabiser, iḇye rofafisu andido, iḇye rofafisu bakyaf kako.

13Ro roi ḇeḇor nakam yaḇarna snar Kristus ḇeḇuk samambraḇ maḇe aya.

14Rarirya fararur mkoḇena naḇye kako, snar mkun rarwas kwar ro kandera yena.

15Mankun mkofawi kako, ne, kawasa Filipi; rofafisu yarandak yaḇaryas Ankankinem Ḇeḇyeya, rofyor yabur Makedonia, jemaat oso isya ḇa ifrur karkor kuker aya ro nyaki yena mboi mkerer.

16Snar ro Tesalonika kako rarwan risuru mkofarem kwar fafnoḇek mkoḇena maro aya.

17Mboi farsarser anna naiso yakor syadina ḇa, mboi bon ḇyena, ḇefrur fainda mkoḇena naba syadi.

18Baboine yasma kwar rosai ḇeḇefandun ro mko, mboi isyadi wer ro roi ḇeḇor anna. Ayaisya ro andido, snar yasma kwar farem mkoḇena ro Epafroditus, farsarser ḇediref oso, samsom oso ḇefrur marisen ma Allah imarisen na.

19Allah yedi nari myunsu fandun mkoḇena kam imnis raris nana ma papoik ḇyedi ro Yesus Kristus.

20Sanandik faro Allah ma Kma koḇedi isof fyoro-fyoro! Amin!

21Mko kofen aroo ayena faro Allah kawasa ḇyesi ḇeḇeoser kuker Yesus Kristus. Aroo faro mko ro naek srar ḇewarpu aya rodinesya.

22Allah kawasa ḇyesi kam rodine, isyadi wer snonkaku ro istana (rum) Kaisar, sfarem aroo faro naek srar.

23Saswar-ḇaḇye ro Manseren Yesus Kristus ryowus rur mkoḇesi! Ro nu, Paulus ma Timotius



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Filipi 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel