Alkitab Mobile SABDA
[VER] : [BIAK]     [PL]  [PB] 
 <<  Galatia 3 >> 

1Sye, kawasa Galatia mkoyano, ḇemamkarkirḇa, mansei ḇeyawninyan mko kwar? Yesus Kristus ḇyeḇepaiepen kwar ro aprop ani ḇyeḇefasna kwar faro mko ḇake?

2Inja roi yamarisen yafawi ro mko isoine: Mkosma Rurya kwarke snar mkoḇeuser sasoser Refo Yahudi roḇaido snar kakyar faro ḇaḇeḇaryas Ankankinem Ḇeḇyeya?

3Snaro mkomamkarkir ḇaḇeri rarirya? Mkorandak kwar kuker Rurya, raimnai ro ḇarpurya mkomarisen mkosma i kuker papoik ro mankun mko?

4Roi mkosma kwar anna kam nefromoke? Nari nefromoḇa!

5Inja knikine rariso, Allah ḇeḇuk fa mkofo kuker Rurya ma ḇefrur aḇyair kanandor rofandu mko, ifrur rarirya snar mkoḇeuser sasoser Refo Yahudiya roḇaido snar kakyar faro ḇaḇeḇaryas Ankankinem Ḇeḇyeya?

6Rarirya kako kakyar Abraham ḇyedi faro Allah, eḇedari Allah kyor roi ani ḇenapnapesya faro i.

7Inja mkomam, snonkaku ḇekenem kuker kakyarsya sikada Abraham romawa ḇyesirya.

8Ma Refo ifawi ḇepon kwar, Allah ḇyuk napnapesya faro snonkaku ḇeḇe Yahudiḇasya snar kakyar, Ankankinem Ḇeḇye ine ḇyeḇeḇaryas ḇepon faro Abraham kwar: "Snar aw nari er-ersya kam ro sup ine sḇeḇeḇok."

9Inja ḇekenem kuker kakyarsya sikada sisma ḇaḇeḇok fnoḇek kuker Abraham snon ḇekyar ani.

10Snonkaku ḇekyar ma ḇeswarmura ro kankenem sena neknam ro ḇaḇekoreri -- snaro sḇeḇefras? Snar sfas kwar radine: "Fafras faḇe snonkaku ḇeḇeuser ma ḇefrur roi ḇeḇor ḇefas kwar ro syap sasoser Refo Yahudiḇasya."

11Ma ḇaḇenapnapesya isya faro snonkaku osoḇa ro Allah barpon ḇyedi snar ifrur sasoser Refo Yahudi isna kwar, snar: "Snonkaku ḇenapes nari sikenem kuker kakyarya."

12Ḇape sasoser Refo Yahudi ḇyeknam ro kakyaryaḇa, mboi mansei ḇefrur na, nari sikenem snar na.

13Kristus ḇyak namuk ko kwar ro fafras sasoser Refo Yahudi kuker nyan ḇyuk mankundi fa isma fras snar ko, snar sfas kwar radine: "Fafras faro snonkaku ḇekaf ro ai apropya!"

14Yesus Kristus ifrur rarirya kwar, insa kuker i Abraham ḇaḇeḇok ḇyedi rya faro er-er ḇese, isof kuker kakyar kosma Rur ḇeḇeasas kwar ani.

15Naek srar, iḇye yun fasasna oso ro kankenem ras-ras. Asas oso ḇeser kankarem namuk kwar ro snonkaku, osoḇaḇeri faḇyereri roḇa pyami.

16Faro Abraham ma ḇeḇekpu roi Allah ikofen asas ḇeḇor anna kam. Sikofenḇa "faro kpu-kpu ḇyesi" imnis raris kawasa ḇeḇor, ḇape faro snonkaku oser monda: "ma faro kpu besi," isoine Kristus.

17Swaruser ayedi isoine: Allah asas ḇyena ro randakya neḇekarem namuk kwar, inja sasoser Refo Yahudi nari damrer naba, snar insape nasasyar babo ro wampasi wambarek utin rifiak samfur rikior ro ḇarpurya, isof samambraḇ asas ani ipromes.

18Snar, rofyor rosai Allah ḇyuk na neknam ro sasoser Refo Yahudi, mboi neknam ro asasḇa; ḇape snar Allah asas ḇyena ḇyuk saswar-fakamaman ḇyena faro Abraham kwar.

19Rarirya ido fandun rosai kuker sasoser Refo Yahudiya? Sasoser anna nafnoḇek snar ḇaḇeyuk -- sasoser anna nambran isof fafisu kpu ro asas ani ryama -- ma malaikat-malaikatsya ssḇuki faro manfandu oso.

20Manfandu dun wos ro snonkaku oser mondaḇa, mboi Allah ikada ḇyeoser.

21Rariryaido, sasoser Refo Yahudi nasampum kuker Allah asas ḇyenake? Roḇaḇeri. Snar sasoser Refo Yahudi ḇyeḇeḇuk imnis roi oso ḇeḇuk kankenem, rariryaido napnapesya ḇyeknam ro sasoser Refo Yahudiya.

22Ḇape sfas ro Refo radine mboi roi ḇeḇor kam naisya ro ḇaḇepapoik sasarya, insa kuker kakyar faro Yesus Kristus asas ani ḇyeḇeḇuk faro bekyarsya.

23Rofyor kakyar ani ryama ḇaim sasoser Refo Yahudi iwaren warek ko, ma pyadwar ko isof kakyar ani ḇyeḇefasna.

24Rarirya sasoser Refo Yahudi ikfin ko isof Kristus ryama, insa ḇyuk napnapesya maḇe ko snar kakyar koḇena.

25Baboine kakyar ani ryama kwar, inja koisyaḇa kwar ro manwadwaren ḇefarkin ani.

26Snar mkokam mkoḇe romawa faro Allah snar kakyar faro Yesus Kristus.

27Snar mkokam, mkoḇe ḇemasi kuker snonsnon Kristus, inja mkona Kristus kwar.

28Rarisya rarwas oso isyaḇa rofandu snonkaku Yahudi roḇaido snonkaku Yunani, manfyanoḇa roḇaido snonkaku ḇemkei, snon ma bin isyaḇa kwar, snar mko kam mko ḇeoser kuker Yesus Kristus.

29Rofyor Kristus nya mko, mko kako mko ḇeup ro Abraham ma nari mkosma kako Allah asas ḇyena.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel