1Swaruser ayedi isoine: rofyor snon ḇena waris oso ḇyesnonkuf ḇaim, imnisbos kaku manfyan oso, ḇape i ḇena waris ḇeḇor anna;
2ḇape isya ro manwadwaren ḇefaduru i isof fafisu kmari ikofen faroiya imnis kwar.
3Rarirya ko kako: rofyor koḇesnonkuf ḇaim, koḇemanfyan faro rodur ḇero supswan ine.
4Ḇape fafisuya imnis kwar, Allah iwan Rumkun ḇyedi, ma bin oso daḇen i ma kyunem faro sasoser Refo Yahudi.
5Ḇyeḇewan faḇyak namuk kawasa kam ḇekunem faro sasoser Refo Yahudisya, insa nya ko ḇeromawa ḇyesi.
6Ma snar nya mko ḇeromawa ḇyesi, inja Allah iwan Rumkun ḇyedi Rur ḇyedi fasyun ro kosnesna, ma kyaru: "o Mami, o Mami yedi!"
7Inja mkoḇemanfyan wer ḇa kwar, mboi mko ḇeromawa; rofyor mko ḇeromawa, nari mko kako mkasma Allah waris ḇyena kam.
8Ro ḇeponiwara, rofyor mkomamḇaḇir Allah ḇa, mko ḇemanfyan faro papoik-papoik imnis allah, ḇape Allah ḇekaku naisya ḇaḇeri.
9Ḇape baboine mkofawi Allah kwar, roḇaido Allah ifawi mko kwar, inja rariso mko kaḇer wer faro rodur-rodur ro supswan ḇesambraḇ ḇa ma ḇesaḇarar ma mkomarisen mkorandak mko ḇemanfyan faro na wer?
10Kuker aunos mkofaduru ras ono, paik ono, fafisu ono faswef ma wampasi wambarek ono.
11Yamames warek imbude kandera yena faro mko nefromo mondari.
12Naek srar yor faro mko, insa mkomnis raris aya, snar aya kako yamnis raris mko kwar. Mko frur roi ḇeḇyeḇa oso ḇaim maro aya.
13Mkofawi, mboi ro randakya yaḇaryas Ankankinem Ḇeḇyeya faro mko kwar isoine snar baken ayedi iduf.
14Kaku ḇeri rariryano baken ayedi ḇyefafrowes faro mkono, mkayin ayaḇa mboi mkosrow aya kwar, imnis mkosrow Allah malaikat ḇyesi oso, isyadi wer imnis mkosrow Yesus Kristus mankundi.
15Fyor ani aski ḇeba faro mko! Ma baboine, ḇaḇeaski mkoḇani ryoiyo? Snar yaḇesaksi ḇemko, mboi rofyor ani mkomarisen mker mka mkoḇesi maḇe aya kwar.
16Inja baboine mkokara aya ḇembroḇ mkoḇedi, snar yafasna napnapesya faro mko?
17Sikada sfaḇri sesewar insa ssun mko, ḇape kuker sne ḇenapesḇa sena, snar simarisen ssun mko fa mkoso si kuker kaku ḇeri.
18Mboi iḇye rofyor snonkaku sesewar fasun snonkaku ḇese faro roi ḇeḇye, mboi sifrur rarirya rofafisu nakam, imbude rofafisu aya isya rofandu mko mondari.
19Ne, romawa yesi, snar mko yaḇekandera dafduf yaḇeyaḇen wer, isof rari Kristus ḇyair ro mko.
20Yaswarkuf kaku aya isya rofandu mko rofyor ine fa yawawos kuker mko kuker mkaren ḇese, snar yafawi werba yafrur rosai mufabemko.
21Mkokofen maḇe aya, ne, mko kam ḇemarisen ḇeso sasoser Refo Yahudi, mkomnaf ḇaimke sasoser Refo Yahudiya?
22Ro dia isya sfas, Abraham nya romawa risuru, oso ro infyan bin ḇyedi ma oso ro bin ḇemkeya?
23Ḇape romawa ro infyan bin ani ḇyeḇeaḇen imnis marisen snonkaku ma romawa ro bin ḇemkei ani ḇyeḇeaḇen snar Allah asas ḇyedi.
24Inekada wospeper. Snar bin risuru ansuya supeperyar ḇaḇeasas risuru ro Allah: Oso ḇyeknam ro bon Sinai (isoine Hagar) -- (Hagar daḇen romawa ḇyesi simnis manfyan.)
25Hagar imnis bon Sinai ro sup Arab -- ma imnis kuker Yerusalem ro baboine, snar ikenem ro ḇaḇeinfyan kuker romawa ḇyesi.
26Ḇape Yerusalem ro boiyaswa ikada bin ḇemkeiya ma ikada sna kobedirya.
27Snar sfas kwar radine: "Mkoryaḇ naba ḇae, ne, bin ḇepansnasem ḇefawi ḇeaḇen ḇaim! Mkoryaḇ ma mkobras, ne aw ḇefawi ḇaḇekandera ḇaim dafduf aḇaḇenya! Snar bin swa ḇyedi iburya nari daḇen romawa sibor syadi ro bin ḇeḇeswaya."
28Inja naek srar, mkokada romawa sḇeasas imnis Ishak.
29Ḇape imnis ḇeponiwara, saḇen kuker marisen snonkaku, ḇyewayam faro saḇen kuker marisen Rurya, rarirya baboine kako.
30Ḇape rosai sfas ro Refoya? Ro Refo sfas radine: "Mkoyaw infyan ani kuker romawa ḇyedi, snar romawa ro infyan ani nari daksma warisḇa fnoḇek kuker romawa ro bin ḇemkei ani."
31Inja, naek srar, koine romawa ro infyan aniḇa, mboi romawa ro bin ḇemkeiya.