Alkitab Mobile SABDA
[VER] : [BIAK]     [PL]  [PB] 
 <<  Ibrani 12 >> 

1Snar kona saksisya sibor ḇesiryaryar ko raris mandepna, eḇedari mkoramuma kosawen roi ḇemarḇakna ma sasar ḇekrof roko ma mkorama kofarmku koso famfaḇri sḇukma ḇeko.

2Mkorama komam monda faro Yesus, snar i ḇefnoḇek ko faro ḇaḇekakyarya faro i ro randakya isof papupesya! Ḇyefandun ḇa imar ro apropya imnis roi oso ḇefrur mamyai. Iswarepen monda marisen nari ḇyaḇir ro ḇarpurya. Baboine ḇyuk sasoser fnoḇek Allah ro ḇar raku karapesa nasanya.

3Mko karasas rariso Yesus kandera ḇyedi ro ḇarpon snonkaku ḇesasar ḇesampum i. Rarirya mkosambraḇ ma kakyar mkoḇena namuk awer.

4Snar mkofaḇri mkosampum sasar, isof ro mkosasyar rik ḇaim.

5Ma mkosampum awer Allah ananun ḇyena faro mko imnis kma oso dawawos kuker romawa ḇyesi! Allah ikofen, "Ne, rumkun yedi, kwara nabye rofyor Manseren fyarkor aw, ma kakyar mkoḇena namuk awer rofyor imsor mko.

6Snar Manseren fyarkor snonkaku saneraro ḇyesi, ma iprer snonkaku kyarem imnis romawa ḇyesi."

7Rofyor mkosma aprer ro Allah imnis raris farkarkor ro kma oso. Snar rariso romawa oso isma aprer ro kmari ḇa?

8Rofyor mkoso aprer ḇyena ḇa imnis romawa fyarkor, mkoḇeromawa kaku ḇa, mboi mkoḇeromawa daḇyor.

9Kosma kma ro supswan ine. Kosma farkarkor ro kma ani, ma nari koḇesyowi i. Rarirya kako faro kma rur koḇedi ro boiyaswa, kokenem syadi faroi insa kosma kankenem.

10Sinan koḇesi ro supswan ine ssḇuk farkarkor rofyor ḇeknampu monda, ro rosai skara ḇeḇye. Ḇape Allah fyarkor ko faro ḇaḇye mankun koḇena, insa kosren fnoḇek i.

11Rofyor sfarkor ko, aprer anna nbuk marisen ro kosnesna ḇa. Ḇape ro ḇarpurya, sfarkor kwar koya, koso kankenem Allah imarisen na, isof nbuk bon ḇeḇaḇir aski maro ko.

12Snar rarirya swambraḇser ḇramin ḇemor bedi ma wepur ḇeradadai bedi.

13Wambran ro nyan ḇepyom insa wemin ḇeryarḇa bedi ryosdis awer mboi iprei.

14Besewar wakenem kuker aski faro kawasa kam, ma faḇri fawakenem nasren kuker Manseren, snar kuker nyan ine ḇa snonkaku osoḇa nari myam Manseren.

15Mkowaren insa snon oso ḇaḇeri isasyarbur awer Allah saswar-fakamaman ḇyedi, insa ono simnis awer rokaker ḇemamur rofandu naek srar isof nḇuk rakrakrok ma makakok snonkaku ḇeḇor kuker mamur ḇyedi.

16Mkowaren insa mkokenem ro farḇuk awer roḇaido mkofandunḇa rosai ḇesren, imnis raris Esau, ḇyoḇ nasan romawa rawer ḇyedi kuker roḇean ben oser monda.

17Snar mkofawi mboi ro ḇarpurya Esau imarisen isma ḇok ani ro kmari, ḇape ḇyeḇepampum. Esau dor kuker kankanes, ḇape isma fafisu osoḇa fa fyadwer sasar ḇyena.

18Snar mkaksrow roi oso ḇaim imnis er Israel fyoriwara sisrow kwar. Sisrow bon span roya, isoine Bon Sinai kuker for ḇesber ḇyena; sisrow ḇaḇepampan, fnureḇ ma wam doḇer,

19sisrow kḇur ḇerok, ma mkaren ḇerok nababos. Rofafisu kawasa Israel ansi srower mkaren ani, sor insa mkaren ani dawawos kaker faro si awer.

20Snar ssambraḇ srower mkaren ani ḇa ro sasoser ḇyuk na. Snar mkaren ani ikofen, "Rofyor aiwanke roḇa manseirya wer kako, ḇefanam bon ine, nari ḇyeḇeso kuker karui isof imar."

21Ma rosai kawasa Israel smam ani dun nyawa isof Moses ikofen, "Yamkak ma yaradai!"

22Ḇape mkora kwar ḇe Bon Sion Allah mnu ḇekenem ḇyedi, isoine Yerusalem ro boiyaswa kuker malaikat syaran-syaran ḇyesi.

23Ma mkorower raryaḇ fananjur oso--fananjur Allah rumkun rak ḇyesi, snonsnon sena neḇefas epen ro boiyaswa. Mkorower Allah, Mankara ro snonkaku kam. Mkosrow snonkaku ḇeḇye rur sesi sifrur faḇemnis kwar.

24Ma mkosrow Yesus manfandu ḇeyun asas ḇebabo ḇeyaḇek epen ani; mkosrow rik ḇesepek ḇefaduru roi ḇeḇye syadiya ro fadaduru Habel rik ḇyedi.

25Rarirya mkepen mko imbude ḇeyawawos ani mkomewer mkorower indi. Rofyor simewer simnafi, ḇefkai ḇayir Allah wos ḇyedi ro sup ine, nari sikfisbur ḇa, isyadi wer koine ḇemnaf i ḇeyawawos ro boiyaswa ani! Rofyor komewer komnaf i, rariso nari kokfisbur i?

26Rofafisu ani mkaren ḇyedi imkiker sup ine. Ḇape baboine ḇyuk asas kwar, "Nari yamkiker ḇerarwan oser wer, sup ine derer monda ḇa mboi nanki kako."

27Wos "ḇerarwan oser wer" fyasna roi ḇeḇor kam sifrur faḇemkiker kwar anna, nari sena fanakrenbur insa ḇemkiker ḇa na nkain faswef.

28Inja kokofen kasumasa faro Allah, snar kosma kwar ro Allah ḇaḇesasoser oso nari ḇemarmer ḇa. Inja kokofen kasumasa ma koḇeari kuker kakyar faro Allah kuker syowi ma makakak, imnis raris Allah mankundi marisen ḇyedi.

29Snar Allah koḇedi imnis for ḇekun.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel