Alkitab Mobile SABDA
[VER] : [BIAK]     [PL]  [PB] 
 <<  Kolose 2 >> 

1Snar yamarisen insa mkofawi, fararur ḇemarḇak yafrur faro mko, ma faro si ro Laodikia ma faro mko kam, ḇemambaḇir aya ḇaimsya,

2insa sisnesna naprei ma sḇeoser ro saswari, isof sisma nana ḇeḇor kam ḇekur ḇaḇesnekin ro kakara, inja smambaḇir Allah kankunes ḇyedi isoine Kristus, sna nana ḇaḇemamkarkir ḇeḇor kam ma fawawi anna neḇeyokef ro Kristus.

3Snar nana fawawinanem ḇeḇor kam ma fawawi neknam ro Kristus.

4Roi ḇeḇor nane kam yakofena, insa ono sḇeankar mko maroḇa kuker wos ḇerok marndanden.

5Snar rariso wer kako imburo baken yedi isya rofandu mkoḇa, ḇape rur yedi isya fnoḇek mko ma yamam kuker raryaḇ kankenem aunos ma kakyar ḇedworen mkoḇena snar Kristus.

6Mkona Yesus Kristus, Manseren koḇedi kwar. Inja nari mkokenem faswef kuker i.

7Ma mkoḇerares ro i ma mko ḇeḇeḇawes roi, ma kakyar mkoḇena nadworen syadi ro rosai sḇukfarkor mko, ma mkosnemna nafo kuker kasumasa.

8Mkosasor mko insa rosai sḇukfarkor ninyan mko fasfarkin mko ro nyan sasar awer ma ḇekaku ḇana, snar siso farkarkor ninyan ma rodur ḇero supswan ine, fama ḇyeknam ro Kristus ḇa.

9Snar roi ḇeḇor kam ro Allah naisya ro Kristus, isoine ro ḇaḇesnonkaku ḇyedi,

10ma ssḇuk namnis ḇemko kwar ro Kristus, snar Kristus iso ḇeḇeḇru ro ḇesasosersya ma ḇesma papoiksya kam.

11Ro Kristus mkosma sofakfuk kwar, sofakfuk snonkaku sifrur ḇa, ḇape kuker Kristus sofakfuk ḇyedi, ḇeḇeknam ro ḇaḇemkei baken ḇesasar ine,

12snar kuker Kristus mko ḇeḇekrir ro masisren, ma kuker Kristus mko ḇeḇeḇawes kako snar kakyar mkoḇena faro Allah fararur papoik ḇyedi, ḇeḇawes Kristus rofandu ḇemarsya kwar.

13Mko kako, ro randakya mkomar ro ḇar rurya snar sasar mkoḇena, ma snar mkosma sofakfuk ro ḇaken ḇa, ḇape ro baboine Allah ḇyuk kankenem faro mko fnoḇek Kristus. Allah ipyos sasar ḇeḇor mkoḇena kwar.

14Snar kuker payasyos syap nyakiya, ro fasasna sasoser ḇeḇuksof ma ḇesampum ko. Ma ipyosna ḇo pyaepenna ro ai apropya:

15Kristus pyampum ḇesasosersya ma ḇesma papoiksya kwar ma ifrur si ḇeḇaḇeuni ḇefababa ro ḇaḇefainda ḇyedi faro si.

16Inja mkomam monda awer snonkaku oso ḇeḇuksof faro mko ro roi ḇefor, inja rosai mkan ma mkinem roḇaido ras munara, munara paik babo roḇa wer ras Mananai Yahudi:

17Nane kam nenin monda ro roi nari ḇerama, mboi neknam ro Kristus.

18Mkomam monda awer fainda mkoḇena ḇo neḇeposer ro snonkaku ḇefrur ḇeḇefawi ḇa ḇerun mankun ḇo ḇeḇenadi faro malaikatsya, ḇeḇesewar ro ḇaḇemamam kuker knam oso ḇa ḇekanow mankun ro kakara sena ro supswan ine.

19Mboi iserepen nako ḇa faro Ḇeḇeḇru, ro moḇsai baken ḇesiper ḇyeḇefaduru ma ḇyeḇefesepen faḇyeoser kuker urek ma faswisew, ḇesma sarsur ḇerama ro Allahya.

20Rofyor mkomar fnoḇek Kristus kwar ma mkomkei ro rodur ro supswan ine, rosai eḇedari mkokafyo faro rari ḇeḇor, imnis raris mkoisya mkokenem kaker ro supswan ine:

21Mkopan awer ine, mkorepen awer iwa, mkoḇyunek awer ine;

22nakam nkur monda roi ḇeḇor kona ma nari ḇero snar naso monda sasoser ma farkarkor snonkaku.

23Kaku ḇeri, rari anna komamna nafo kuker fawawi nanem kuker ḇaḇeari sifrur ro mankunsi, imnis raris randun mankun, ḇaḇewayam mankun, nefainda oso ḇa mboi sifrur syopen kankenem sena ro supswan ine.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kolose 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel