Alkitab Mobile SABDA
[VER] : [BIAK]     [PL]  [PB] 
 <<  Kolose 3 >> 

1Eḇedari rofyor mko ḇeḇeḇawes fnoḇek Kristus, mkosewar roi ḇero boiyaswa, ro moḇ Kristus isya, kyain ro Allah ḇar raku ḇyedi.

2Mkoswarepen monda roi ḇekur boiyaswana, mboi mkoswaruser roi ḇero supswan inena awer.

3Snar mkomar kwar ma kankenem mkoḇena nayokef kuker Kristus snar Allah.

4Rofyor Kristus, ḇeḇeknam kankenem koḇena, nari fyasna mankundi kwar, mko kako nari mkakfasna mkofnoḇek i ro ḇaḇenasan ḇyedi.

5Eḇedari mkomun marisen rosai ḇero baken mkoḇena ro supswan ine, isoine ḇaḇe farḇuk, ḇaḇearwarem, ḇaḇermomen, marisen ḇeḇarḇor, ma faḇri mankun kako, imnis kuker ḇaḇesamsyom faro karwar,

6nakam nafrur fa Allah imsor [faro snonkaku ḇeso Allah ḇasya].

7Ma mko kako ro randakya mkakfrur roi ḇerarirya rofafisu mkokenem rona.

8Ḇape baboine, mkosawen roi ḇerarirya kam, isoine masasor, dosam, ḇarḇor, kankonem ma wos ḇemamas ḇesasyar ro mkosḇamna.

9Ma mko ḇeankaryae awer, snar mkobur snonkaku ḇekwar ani ma rari ḇyena kwar,

10ma mkorer kwarbur snonkaku ḇekwar fnoḇek rari ḇeponiwara, ma mko ḇeḇefrur babo pdef ro ras ḇe ras farari fanir (Allah) ḇefrur mko kwar.

11Roi ḇeradine isya wer ḇa snonkaku Yunani, roḇa snonkaku Yahudi, snonkaku ḇesofakfuk ma snonkaku ḇesofakfuk ḇa, snonkaku Barbar roḇa snonkaku Skit, women roḇa ḇemkei, ḇape Kristus monda ḇyeknam ro roi ḇeḇor nakam.

12Eḇedari, mkomnis snonkaku Allah kyinfir ma fyasren ma iswar syadi, ma mkofasna ḇaḇesneso, snemura, ḇaḇerun sne, ḇaḇefafir ma ḇaḇekaḇaḇaḇ.

13Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada.

14Ma ro roi ḇeḇor nane kam: mkona saswari, ḇekaḇrai ḇefesepen ḇaḇeoser ma ḇaḇemanasnisya.

15Ma saswar-ḇaḇye Kristus ḇyedi ḇyepoik mkosnemna, snar i eḇedari mko ḇeḇeyor kwar famko ḇebaken oser. Inja mkokofen kasumasa.

16Mboi Kristus wos ḇyena nakenem kuker nana ḇeḇor ḇyena kam rofandu mko, isof kuker fawawinanem ḇeḇor kam mkoḇuk farkarkor ma mkosonekyae mko ma mkodisen mazmur, ma sanandik ma dow rurya, ma mkokofen kasumasa ro mkosnemna faro Allah.

17Ma roi ḇeḇor kam mkofrurna, mkofrurna kuker wawos ma fararur, mkofrur nakam kuker snonsnon Manseren Yesus, ma mkokofen kasumasa snar Kristus faro Allah, Kma koḇedi.

18Ne, bin ḇena swa, wasouser swambri imnis faro Manseren.

19Ne, snon ḇena swa, waswar swambri ma bewayam awer i.

20Ne, inai ma romawa mko, indo mkoḇeuser sna-kma mkoḇesi ro roi ḇeḇor kam, snar naiso ḇefrur marisen faro Manseren.

21Ne, sna-kma mkoya, indo mkofrur sneduf awer faro inai ma romawa mkoḇesi, insa sisnesna nfafayaf awer.

22Ne, manfamyan mkoya, mkoḇeuser kuker manseren mkoḇesi ro supswan ine ro roi ḇeḇor kam, mboi mkoḇeuser ro ḇarpon sena monda awer famkofrur sneprei si, mboi kuker sneḇenapes snar mkomkak faro Manseren.

23Ma rosairyawer mkofrurna, mkofrur kuker sne ḇeryaḇ imnis faro Manseren mboi faro snonkaku ḇa.

24Mkofawi, isoine ro Manseren nari mkosma rarwas sfasnaḇadir imnis sasuref. Kristus imnis tuan ma mko ḇemanfamyan ḇei.

25Mansei ḇefrur sasar, nari ḇyar sasar ḇyena, snar ro Manseren kakara ḇyedi snonkaku simnis kame.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kolose 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel