1Syap ine kyur rosai Allah ikofen ḇadir faro Yesus Kristus insa fyasna na faro Allah manfamyan ḇyesi rosai nari ḇerama fasaw na. Kristus iwan malaekat ḇyedi faro manfamyan ḇyedi. Yohanes, insa ikofen ḇadir roi anna faroi.
2Yohanes fyarfyar roi myam anna kam; ma ḇaḇesaksi ḇyedi ḇekur Allah wos ḇyena ḇyuk faro Yesus Kristus.
3Fainda faro snonkaku ḇewasya ma ḇerower ḇaryas ḇardadi syap ine roi ikofen ḇadir na ma isouser rosai sfas roi na. Snar fyoroḇa wer nari nakam ndama.
4Naek srar ḇekain ro jemaat rifik ro supya mnuk Asia! Aya, Yohanes, yakyar naek srar mkosma ro Allah, ḇaḇye ma aski --isoine i sya, ma i sya kwar, ma nari ryama -- ma rur rifik sisya ro ḇarpon karapesa ḇaḇesasoser ḇyedi kako,
5ma ro Yesus Kristus, Saksi ḇeḇeuser. I sḇawes kaḇer ḇepon ro marmar ma ikada isma papoik ḇesyadi ro wairek-wairek ro sup ine. Yesus iswar ko, ma kuker marmar ḇyedi fyaspar ko ro sasar koḇena kuker rikḇyena --
6ḇarpurya ifrur ko fakoḇe er oser, koḇe imam-imam ḇeyuffarmyan Allah, Kma ḇyedi. Yesus Kristus iba syadi ma ḇena papoik isof fyoro-fyoro. Amin!
7Mkomam, ryama kuker mandep! Kawasa kam nari smam i, ḇewan i kuker bomsya kako. Ersya kam ro supna nari skanes snar i. O, Amin.
8"Aya kada ḇeponyama ḇepupesya, Manseren Allah ikofen, isya, isya kwar, ma nari ryama, Ḇesma Papoik syadiya."
9Aya Yohanes, naek mkoḇedi bemnis kuker mko ḇeḇekandera imnis manfamyan oser-oser ḇeso Kristus. Kofarmku ro kandera imnis kawasa ḇyesi. Sisawen aya ro myos Patmos snar yaḇaryas Allah wos ḇyedi, Yesus ḇyuk na.
10Ro Manseren ras ḇyedi, Allah Rur ḇyedi ḇyepoik aya, inja yarower mkaren ḇeba oso -- imnis kḇur ḇerok -- dawos ro dokor ayedi.
11Mkaren ani ikofen, "Fas rosai mam na, ma farem syap ine faro jemaat rifik nane: Efesus, Smirna, Pergamus, Tiatira, Sardis, Filadelfia ma Laodikia."
12Yaknenef ḇedokor fayamam mansei ḇewawos faro aya. Ma yamam padamara ḇeḇewemin rifik ḇeḇemarom sifrur naro brawen.
13Rofandu padamara wemin anna yamam snon oso dores imnis snonkaku. Syansun syatu ḇekwan isof ro wemin ḇyesi. Ro andersi isron sarei brawen.
14Snonburyam ḇyena napyoper imnis manwarefbur, payapyoper mankum. Mka ḇyesi sisak imnis for;
15wemin ḇyesi sinyar imnis kansai sikun ro for. Mkaren ḇyedi imnis sriḇwar ḇesobir ḇerok maum.
16Dufepen kum rifik ro ḇramin ḇyedi ḇar rakuya, ma sumber ḇesar raḇanḇar isya ro sḇadon ḇyedi. Ḇarpon ḇyedi isna imnis ori ro orkok pandaf.
17Rofyor yamam i, yakain wepur ro ḇarpon ḇyedi imnis snonkaku ḇemar kwar. Ḇape ryir ḇramin raku ḇyedi ro aya ma ikofen, "Wamkak awer! Aya kada ḇeponya ma ḇepupesya.
18Aya kada ḇekenem! Yamar kwar, ḇape mam kada, yakenem isof fyoro-fyoro. Yasma papoik syadi ro marmarya ma mun aiḇui.
19Rarirya, fas rosai mam na, isoine rosai naisya ro baboine, ma rosai nari ḇerama na.
20Inekada kankunes ro kum rifik mam ro ḇramin ḇar raku yedi, ma ro padamara ḇeḇewemin rifik ro brawen anna. Kum rifik ansi isoine malaikatsya ro jemaat rifik, ma padamara ḇeḇewemin rifik anna isoine jemaat rifik anna."