Dual Panel1"Faro malaikat jemaat ro Efesus, fas radine: Inekada ananun ro i ḇeyufepen kum rifik ro ḇramin ḇar raku ḇyedi, ma ḇembran rofandu padamara brawen ḇeḇewemin rifik anna.
2Yafawi roi mkofrurna: mko fararur sambraḇ ma mkosnemna nadworen kaku. Yafawi mkomewer mkoso ḇeḇarḇorsya. Ma snonkaku ḇekarem mankun si ḇemanwawan ḇape roḇa, iḇye mkomnasen si, insa mkofawi wawan sisyaḇa, mboi sankarkar.
3Ma mkoknon mboi mkoḇekandera snar aya, ma mkofawi mkomor ḇa.
4Ḇape yasampum mko: Snar saswar ḇepon mkobani maro aya isyaḇa kwar.
5Rarirya mkoswarepen mkosapi ḇinkwan kaku! Mkombror ro sasar mkoḇena, ma mkofrur rosai mkofrur ro ḇepon kwar ani. Rarirya ḇaido, nari yarama ma yapas padamara wemin mkoḇanibur moḇ ḇyedi.
6Ḇape roi ḇeḇye oso isya ro mko isoine: Mkayin fararur ro ḇeso Nikolaus sya, aya kako yayin si.
7Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari yaḇuk fadan bon ro ai knam kankenem ḇesur ro Allah yaf ḇyedi."
8"Faro malaikat jemaat ro Smirna, fas radine: Inekada ananun ro i ḇeponya ma ḇepupesya -- ḇemar kwar ma ḇekḇok kaḇer.
9Yafawi kandera mkoḇena; yafawi mkosaḇarar -- ḇape mkoḇekayan kaku ḇeri! Yafawi anonef ro kawasa ḇekarem mankun siḇe Yahudi, ḇape rarirya ḇa; sikada Ibiris kawasa ḇyesiri!
10Mkomkak awer kandera nari fyoro ḇa mkosma na. Mkoswarepen, Ibiris nari ḇyeono ro mko fassun ro bui faifrowes sas mko. Nari mkosma kandera ras samfur. Iḇyesyadi mkofarmku nako faro aya isof mkomar, nari yaḇuk faro mko wower ḇekakuya.
11Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari ismaḇaḇeri kandera marmar ḇeḇesuruya."
12"Faro malaikat jemaat ro Pergamus, fas radine: Inekada ananun ro i ḇeyuf sumber ḇesar raḇanḇar.
13Yafawi moḇ mkokain rona. Mkokain ro moḇ karapesa ḇaḇesasoser Ibirisya. Mkofarmku nako faro aya. Rofafisu Antipas, saksi ḇeḇeuser ayedi, ḇyeḇemun rofandu mko, ro ayar mamun. Ibirisya kyain roya, rofyor ani kako mkofamyun kakyar mkoḇena ḇa faro aya.
14Ma rariryano roi ono naisya yamarisen naba ro mko: Rofandu mko ono sisya siso farkarkor rosai Bileam ḇyukna. Bileam ḇyuk farkarkor faro Balak insa ḇyeninyan kawasa Israel, fasifrur sasar; ḇyeḇuk si fasan roḇean ḇefarser kwar faro amfyanir ma sifrur farbuk.
15Rarirya kako rofandu mko snonkaku ono sisya siso farkarkor ro ḇeso Nikolaus.
16Snar rarirya mkombror ro sasar mkoḇena! Mkofrur rarirya ḇaido, kniko nari yarama faro mko wer ma yaḇe embroḇ snonkaku ansi kuker sumber ḇero sḇadon ayedi.
17Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari yaḇuk fadan mamami (manna) ḇeyokef, ma nari oser-oser isma ro aya karui ḇepyoper oser. Ro karui ani sfas snonsnon babo oso, manseirya wer kako ifawi ḇa, mboi snonkaku ḇesma iya derer."
18"Faro malaikat jemaat ro Tiatira, fas radine: Inekada ananun ro Allah Rumkun ḇyedi, mka ḇyesi sisak imnis for, ma wemin ḇyesu sumnis kansai ḇenyar sikun ro for.
19Yafawi roi ḇeḇor mkofrur na -- yafawi mkosaswar, mkosouser, mkofararur, ma mkofarmku ro kandera. Yafawi baboine mkofararur nabor syadi ro ḇeponiwara.
20Ḇape yasampum mko: Snar mkoḇuk mkosnemna faro Izebel kwar, bin ḇekarem ḇinkundiḇe Allah wawan ḇyedi. Manfamyan ayesi sibor kwar isrer si ma fyarkor si fasifrur farḇuk ma san roḇean sḇukfarser kwar faro amfyanirsya.
21Yaḇuk fafisu kwar faro si fasimbror ro sasar sena, ḇape simarisen simnai ḇa rofararur farḇuk.
22Mkoswarepen! Nari yapyasbos i isof iduf ro kamboi ḇyedi. Rodia i kuker snonkaku ḇefrur farḇuk fnoḇek isya nari sisma kandera ḇeba. Nakam nari yafrurna ro baboine -- mboi rofyor simnai ro sifrur roi ḇeḇarḇor fnoḇek kuker iḇa.
23Ma ḇeso isya nari yamun si kako insa jemaat sifawi kam aya kada yafawi snonkakusya swaruser sena. Nari yamunsu faro mko kam imnis oser-oser fararur ḇyedi.
24Ḇape eḇesesya ro Tiatira ḇeyakso farkarkor ḇeḇarḇor ani ḇa, ma ḇefarkor fawawi Ibiris ani ḇa. Yakofen nari yaḇuk kamnam ḇemarḇak faro mko ḇa.
25Ḇape isof rofyor nari yaramumaya, iḇyesyadi mkoso faswef rosai mkosma kwar.
26Mansei ḇeḇefainda, ma ḇefararur pdef isof ro papupesya ḇefrur rosai yamarisen, nari yaḇuk papoik faroi imnis yasma ro Kma yedi. Nari sisma papoik ro aya fasḇuk sasoser faro er-er kuker ankyon mankarmomen, ma ḇyuki ryaḇdiwer er-er ansi isof semommom imnis uren saprop.
27(2:26)
28Nari sisma kum mesri ro aya.
29Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"