Dual Panel1"Faro malaikat jemaat ro Sardis, fas radine: Inekada ananun ro i ḇena Allah Rur rifik ḇyesi ma kum rifik ansi. Yafawi rosai mkofrurna. Soḇeda mkokenem ḇape mkomar kwar!
2Inja, mkokḇok, ma mkosambraḇser rosai isya kaker faro mko ḇepon ro nakam namar ḇaimya. Snar yasma mboi rosai mkofrurna, oso imnis ḇaim ro Allah ḇarpon ḇyedi.
3Inja, mkoswarepen kaḇer wer rosai sfarkor ḇepon kwar faro mko ma rosai mkomnaf kwar. Mkofrurna ma mkombror ro sasar mkoḇena. Rofyor mkombror ḇa, nari yarama faro mko imnis raris ḇekaraw; ma nari mkofawi ḇa fafisu yaramaya.
4Ma rofandu mko ro Sardis snonkaku ono sisya siwaren sansun sena insa nasren faswef. Sima nari simbran fnoḇek aya kuker ssun sansun ḇepyoper, snar sikada sisyus.
5Mansei ḇeḇefainda, nari ssḇuk fasyun sansun ḇepyoper. Snonsnon sena nari yapyosna ḇa ro syap kawasa ḇekenem. Ma roḇarpon Kma yedi ma malaikat ḇyesya nari yakarem si ḇekawasa ayesi.
6Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"
7"Faro malaikat jemaat ro Filadelfia, fas radine: Inekada ananun roi Ḇesren, Ḇenapes. Ikada dufepen asyopder Daud ḇyedi; rofyor syeḇen, oso fakyeni ḇa, ma rofyor kyeni, oso fasyeḇeni ḇa kako.
8Yafawi rosai mkofrurna. Yafawi mkosambraḇ mankun ḇa; mkoso farkarkor ayena kwar ma mkoḇeuser faro aya. Yaseḇen kedwai oso faro mko kwar, oso fakyeni ḇa kako.
9Mkoswarepen ine: Mansei ḇeḇekawasa Ibiris ani, ḇeḇeankarkar ḇekarem mankundiḇe Yahudi, mboi sima roḇa. Nari yafrur fasrama sḇansuba ro ḇarpon mkoḇena. Ma nari sifawi mboi yaswar mko.
10Snar mkoso sasoser ayena kwar ma mkofarmku kwar, aya kako nari yafadiren mko rofafisu kandera nari ḇemun supswan ḇesiper ine. Roi ḇeradine nari ndama nefarawrowes faro kawasa kam ro supna.
11Nari yarama fasaw! Mkowaren naḇye rosai mkona kwar, insa oso fadun awer wower ḇeḇefainda mkoḇedi ḇa.
12Mansei ḇeḇefainda, nari yafrur faimnis adir ro Allah yedi rum ḇesren ḇyedi, ma nari isasyar ro moḇ ani wer ḇa. Snonsnon Allah yedi, ma snonsnon mnu Allah yedi -- isoine Yerusalem babo nari ḇesabu roboiyaswa, ro Allah yedi -- nari yafas i ro snonkaku ani mankundi. Snonsnon babo yedi kako nari yafas i ro mankundi.
13Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"
14"Faro malaikat jemaat ro Laodikia, fas radine: Inekada ananun ro i ḇenirḇe Amin (Yesus) saksi ḇeḇeuser ma ḇenapes, knam ḇedafdif roi ḇeḇor kam Allah ifrurna.
15Yafawi rosai mkofrurna; Yafawi mkoprim ba ma mkosam ba kako. Iḇyekada mkoprim roḇa mkosam!
16Ḇape mkofarmandin; mkosam ba ma mkoprim ba kako. Rarirya nari yaḇayorem mko.
17Rofyor mkokofen, 'Nko ḇekayan ma nana nko ḇena namnis; nkananjar royo ḇa.' Ḇape mkofawi ḇa mkosaḇarar ma mkofrur saneso mankun mko! Mkosaḇarar, mkoḇaḇer, ma mkoparyaref.
18Inja yanun faro mko insa mkokoḇes brawen ro aya, isoine brawen ḇekaku, insa mkoḇekayan. Mkokoḇes ro aya sansun ḇepyoper kako famkosansunwarek baken ḇeḇaḇer mkoḇena ḇefrur mamyai. Ma mkokoḇes aryawin kako fasḇuki isfu mka mkoḇesi insa mkomam.
19Snonkaku yaswarsya si yasonek ma yaprersya. Inja mkomarisen ido mkombror ro sasar mkoḇena.
20Mkomam! Yores ro kedwaya ḇarpondi ma yanuk. Rofyor oso ryower mkaren yedi, ma syeḇen kedwai, nari yasun fayasrowi; nari yanan fnoḇek i ma dakanan fnoḇek aya.
21Mansei ḇeḇefainda, nari yaḇuk fakyain ro karapesa ḇaḇesasoser ayedi fnoḇek aya. Snar mankun daya kako yaḇefainda kwar ma baboine yakain fnoḇek Kma yedi ro karapesa ḇaḇesasoser ḇyedi.
22Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"