Alkitab Mobile SABDA
[VER] : [BIAK]     [PL]  [PB] 
 <<  Wahyu 13 >> 

1Ma yamam aiwan oso isasyar ro sorenya dori. Ḇyeknapur samfur ma ḇyeḇru rifik. Knapur oser-oser isya wower oser, ma ro ḇru oser-oser sfas snonsnon anonef faro Allah.

2Aiwan yamam ani isna imnis harimau, (aiwan ḇeyan ḇepek) ma weminsya simnis beruang (aiwan ḇeḇarḇor) wemin, ma snonipoiya imnis singa (aiwan ḇeyan ḇepek) snonipoi. Ma korḇen ani ḇyuk samambraḇ ḇyena faroi, ma karapesa ḇaḇesasoser ḇyedi, ma papoik ḇeba ḇyedi.

3Oso ro ḇru rifik ro aiwan ani komam imnis ḇyepar ḇeba kwar, ḇape par ani iprei wer. Supna kam sḇaḇir i, sikandor ma siso aiwan ani.

4Ma sikam sḇansubaina faro korḇen ani snar ḇyuk papoik ḇyedi faro aiwan ani! Ma sḇansubaina faro aiwan ani kako. Sikofen, "Oso imnis kuker aiwan ani ḇa! Oso nari ḇye embroḇ ma isampum i ḇa!"

5Aiwan ani imarisen faikofen roi ḇeḇor ḇefrur marares ma ḇeyonef Allah. Sḇeifa ḇyesasoser paik samfur rifiak seser risuru monda.

6Raimnai irandak donef Allah ma snonsnon ḇyedi. Rarirya kako Allah moḇ kankain ḇyedi, ma kankain ro boiyaswa donef si kam.

7Simarisen faḇye embroḇ Allah kawasa ḇyesi ma ifrur kafyo si. Ma ssḇuk papoik faro i robo keret, kawasa, wos, ma ersya.

8Kawasa kam ḇekenem ro supna, nari sḇansuba faro aiwan ani, derer kawasa sfasepen snonsnon kwar, ro syap snonkaku ḇekenem, ḇepon ro supswan ḇyeḇefrur ḇaimya, isoine kawasa ro Rumkun Domba skauk kwar ani ḇyesi.

9Mansei ḇeḇeknaram ido imnaf naḇye ḇaryas ine kada:

10"Mansei ḇefasna fasemanfyan nari ḇyemanfyan. Ma mansei ḇefasna fasḇeḇemun kuker sumber nari smuni kuker sumber. I eḇedari Allah kawasa ḇyesi nari sfarmku ma sesyowi i."

11Ma yamam aiwan oser ḇese isasyar ro supna don na. Ḇyeknapur risuru imnis knapur ro rumkun domba. Mkarenya imnis mkaren korḇen.

12Nya ḇaḇepapoik ḇeba ro aiwan ḇepon ani ro ḇarpon mka ḇyedi. Supna ḇesiper ma ḇekain ro borisya, ḇyedusu si fasḇansuba faro aiwan ḇepon ani, ḇena par ḇeba ḇeprei wer ani.

13Aiwan ḇeḇesuru ine ifrur aḇyair kanandor ḇeba. Ifrur for ḇesabu ro nanki ḇesupna ro ḇarpon kawasa kam.

14Kawasa kam ḇekenem ro supna isrer si kuker fararur kanandor ro ḇarpon aiwan ḇepon ani. Ma iwan sikam fasifrur amfyanir oso fa sḇukḇesyowi aiwan skorpar kuker sumber, ḇape ikenem faswef.

15Aiwan ḇeḇesuru ine ssḇuk faḇyuk kankenem faro amfyanir ani, isof amfyanir ani dawawos ma myun kawasa kam ḇemewer ḇeḇan suba faroisya.

16Kawasa kam, ḇeba ma kasun, ḇeḇekayan ma ḇesaḇarar, manfamyan roḇa ḇemkei, aiwan ani ḇyedafdifer si fasisma aḇyair ro ḇramin ḇar raku sena roḇa ro andar sena.

17Ma osoḇa fakyoḇes roḇa ḇyoḇ roi oso, rofyor nya aḇyair ani ḇa, isoine snonsnon aiwan ani mankundi, roḇa nomor ḇefasna snonsnon ḇyedi.

18Rodine fandun kaku mamkarkir. Snonkaku ḇefawi nanem sikada sawof kankunes ro nomor aiwan ani, snar nomor anna kada snonsnon ro snonkaku oso, nomor anna naiso nane utin riwonem samfur riwonem seser riwonem.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel