Alkitab Mobile SABDA
[VER] : [BIAK]     [PL]  [PB] 
 <<  Wahyu 17 >> 

1Raimnai snon oso ro malaikat rifik ḇeyuf sek rifik anna ryama ikofen maro aya, "Rwama, insa yafasna faro aw rariso ḇefrur farḇuk ḇesyakwar ani nari isma samamyai, isoine mnu ḇeba ani sḇawes fanam warna.

2Waireksya ro supna sifrur farḇuk kuker i, ma ḇekain ro supna simser snar sinem anggur farḇuk ḇyena."

3Ma Allah Rur ḇyedi ḇyepoik aya, ma malaikat ani dun aya ḇesup ḇeursḇa. Rodiwa yamam bin oso kyain ro aiwan ḇerik ḇesak oso bori, ifo kuker fasfas snonsnon ḇeyonef Allah. Aiwan ani ḇyeḇru rifik ma ḇyeknapur samfur.

4Bin ani syansun sansun ḇerik ḇeyafuk, ma sfamankor i kuker karamas brawen, permatasya (karui ḇekakur) ma mustika. Dufepen sek brawen oso ḇefo kuker roi ḇefrur ayin ma ḇemamas, bon ro farḇuk ḇyena.

5Ro andar ḇyedi sfas snonsnon oso ḇesma kankunes. Snonsnon ani isoine "Babel Ḇeba, sna ro ḇefrur farḇuk sawawek ma snonkaku ḇeyarwarem ro supswan ine."

6Ma yamam bin ani imser kuker rik ro Allah kawasa ḇyesi ma rik ro kawasa smunsya snar sisouser faro Yesus Kristus. Rofyor yamam bin ani, yakandor kaku.

7Raimnai malaikat ani ikofen maro aya, "Snaro wakandor rarirya? Iḇye syadi yakofen ḇadir kankunes ro bin ani ḇyedi faro aw ma kankunes ro aiwan dek ani, isoine aiwan ḇeḇeḇru rifik ma knapur samfur.

8Aiwan ani ikenem ḇepon kwar, ḇape baboine ikenem wer ḇa. Nari fyoroḇa isasyar wer ro munaiḇui ma nari rya faro ḇaḇeraroya. Snonkaku ḇekenem ro supna, snonsnon sena neḇefas ḇa [rofyor supswan ḇyeḇefrur ḇaimya] ro syap snonkaku ḇekenem, nari snonkaku ansi sikandor rofyor smam aiwan ani. Snar aiwan ani ikenem ro ḇepon kwar. Baboine ikenem wer ḇa, ḇape nari isasyar kaḇer wer.

9Inja fandun kaku mamam karkir ma fawi nanem. Ḇru rifik nakada urek rifik; isoine urek moḇ bin ani kyain roya. Ma ḇru rifik anna kada wairek rifik kako;

10rim ro si sisapi kwar, oser isya ḇyesasoser kaker, ma oso wer ryama ḇaim. Rofyor nari ryamaya, nari ḇyesasoser knik monda.

11Ma aiwan ḇekenem ro ḇepon kwar, ḇape baboine ḇekenem wer ḇa, ikada wairek ḇeḇewar. Ikada oso ro wairek rifik ansi kako, ḇape ḇaboine ḇeraḇe ḇaḇeraroya.

12Knapur samfur mam anna kada wairek samfur ḇeḇesasoser ḇaim. Ḇape nari ssḇuk papoik faro si fasakḇe sasoser kam imnis wairek fnoḇek aiwan ani ḇeoras oser.

13Wairek samfur ansine sna wos oser; sikam ssḇuk sambraḇ ma papoik sena kam faro aiwan ani.

14Nari se embroḇ sisampum Rumkun Domba ani. Ḇape Rumkun Domba kuker ḇeso ma ḇeḇeuser isya sḇeḇeyor kwar ma sḇeḇekinfir insa skafyo wairek ansi, snar ikada Tuan ro tuansya kam, ma Wairek ro waireksya kam."

15Malaikat ani ikofen kako, "War mam ani, moḇ bin ḇefrur farḇuk ani kyain roya, ikada er, kawasa, ma wosna kam.

16Knapur samfur mam anna ma aiwan ani nari dayin ḇefrur farḇuk ani. Nari sfasyar nana ḇeḇor ḇyena, ma seifa ḇyaḇer. Nari san kraf ḇyedi ma sikuni kuker for.

17Snar Allah ifrur sisnesna fasifrur Allah aw ḇyena. Allah ḇyefaseoser fasḇuk ḇaḇepapoik faro aiwan ani, insa aiwan ani ḇyesasoser isof Allah roi ikofen na ndarirya.

18Bin mam ani kada mnu ḇeba, ḇeḇesasoser waireksya ro supna."



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Wahyu 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel