1Raimnai yamam malaikat oso ḇese isabu ro boiyaswa. Isma papoik ḇeba, ma sananai ḇyedi ifrur supswan ḇesiper faisnai.
2Ma kuker mkaren ḇeba, kyaru, "Bin ani isapi kwar! Babel Ḇeba isapi kwar! Baboine ḇyemoḇ faro setansya ma rur ḇemabak. Rodori man ḇeḇor kam ḇeyarwarem syososyoso ma snonkakusya sayin sikenem roi.
3Er ḇeḇor kam sinem anggur rmomen farḇuk ḇyena. Waireksya ro supswan sifrur farḇuk kukeri, ma ḇefaḇaḇyan ro supswan sekayan snar syambraḇser rmomen-nafsu ḇyedi ḇa."
4Raimnai yarower mkaren ḇese ro boiyaswa ḇekofen, "Kawasa yesi, mkosasyar! Mkosasyar buri! Mkoso awer sasar ḇyena, ma mkakḇar awer samamyai ḇyedi!
5Snar sasar ḇyena nkamnamnam isof ro nanki, ma Allah iswarepen ḇarḇor ḇeḇor ḇyena.
6Mkomunsu faroi imnis ifrur faro mko kwar; mkomunsu syadi faroi ro roi ḇeḇor kam ifrur kwarna. Mkoser sek ḇyedi kuker aninem ḇepakrek syadi ro anininem sfasos faro mko kwar.
7Mkoḇuk faroi kandera ma marindi nabor namnis baba ḇyedi ma marisen ssḇuk faro mankundi ḇardi. Snar ikofen sawawek faro mankundi, 'Aya ine wairek bin ḇesasoser! Yaḇe kabom ḇa; ma nari yasma marindi ḇa!'
8Snar rarirya, nari ro ras oser monda isma kandera -- dafduf, snefafardun, ma basbiser. Ma nari sikuni kuker for, snar Manseren Allah ḇekukeḇ iya nya papoik ḇeba."
9Waireksya ro supna ḇeso fararur farḇakḇuk ma rmomen bin ani nari skanes mnu ani rofafisu smam for ḇekuniya paw ḇyena nek.
10Nari sores ḇinkwan snar simkak saksma kandera ḇyedi. Sikofen, "Syee, raro ḇefnakḇa mnu ḇesma snonsnon ine -- mnu Babel ḇesambraḇ ḇesyaḇo! Ro ras oser monda samamyai bedi myun marmar aw!"
11Ḇefaḇaḇyan ro supna skanes kako ma smandak snar bin ani, snar snonkaku oso ḇaḇeri nari ḇekoḇes roi ḇefarḇyan sena.
12Osoḇa nari kyoḇes brawen, sarak, mutiara (mustika), ma permata (roi ḇesnai fafirek ḇesisye) sesi; kain lenan (kruḇen ḇepyoper) kako, kain ungu (kruḇen ḇefuk), sutera, ma kain merah padam (kruḇen ḇerik ḇeyafuk); ai ḇeḇor kam kosma famfnomḇa, roi ḇeḇor ro gading (kakyom) ma roi ḇekakur, ro kansai, mankarmomen ma pualam (karui afer ḇepakrek ḇenyaser);
13ai kif ḇemarnden, kefikefi, setagi (roi oso sikuni paw ḇyena nadiref), mur, ma mamboḇo; anggur ma mani, tepung ma fasibu; sapi ma domba, kuda ma kereta, manfamyan ma kankenem snonkaku kako.
14Ḇefarḇaḇyan sya sikofen faro bin ani, "Roi ḇeḇor wamarisen nwa na naisyaḇa kwar, ma marares ḇeḇor kam ma roi ḇepyum bena ndo kwar. Nari wasrowna wer ḇa!"
15Ḇefarḇaḇyan ro mnu ani isof sḇekayan nari sores ḇinkwan, snar simkak kandera ḇekuriya. Nari skanes ma smandak,
16ma sikofen, "Syee, raro ḇefnakḇa ro mnu ḇeḇesnonsnon ine! Indo syun pakaian lenan (sansun ḇepyoper), kain ungu (kruḇen ḇefuk) ma kain merah menyala (kruḇen ḇerik ḇesak); indo ifo kuker karamas brawen, permata (roi ḇesnai fafirek ḇesisye) ma mutiara (mustika)!
17Ḇape ro oras oser monda, kayan ḇyena kam ndoburi kwar!" Nakhoda (manfarasya) kam, ḇesosya, ma ḇefararur ro jawarana, ma mandaswan ro sorensya kam sores ḇinkwan
18ma sar rofafisu smam for ḇekun mnu ani paw ḇyena nekya. Ma sikofen, "Mnu oso imnis mnu ḇeba ineḇa!"
19Inja skokef fafen ro ḇru sena ḇeaḇyair mandak, ma sarḇo skanes, "Syee, mnu ḇeba ine raro ḇyedi ifnakḇa! Kayan ḇyena nafrur fasnonkaku kam ḇena jawarasya ro soren sḇekayan! Ḇape ro oras oser monda, roi ḇeḇor anna ndoburi!"
20Ne, boiyaswa, mkoryaḇ naba snar mnu ani fyarmambriwer! Ne, Allah kawasa ḇyesi, manwawan, ma nabisya, mkoryaḇ naba! Snar Allah ḇyuk samamyai ḇei imnis myunsu rosai ifrur faro mko kwar!
21Raimnai malaikat ḇesambraḇ oso ikanow karui oso -- iba imnis karui ḇeyisdiwer -- ma syoi ḇesoren ma ikofen, "Radine mnu Babel ḇeḇesnonsnon ani nari ḇyeḇeso isof sisrowi werḇa.
22Ma mkaren ḇefnak sonker, ḇedasdisen, ma ḇewuf sonker, ma ḇewuf kḇur, nari neḇerower wer ḇa ro aw! Ma snon ḇefawinananem oso ro manwarwor nari isrowi wer ḇa rodiya, ma rakrok ro roi ḇeyisdiwer nari ḇyeḇerower wer ḇa.
23Snonkaku nari smam padamara ḇena nasnai wer ḇa; ma nari srower munara marisen fakawawin rodia wer ḇa. Ḇefaḇaḇyan besi snonkaku ḇefawi syadi ro supna, ma kuker fawawi rawan bena beankar ersya ro supna!"
24Babel isma samamyai snar ro mnu ani sisma kwar nabisya rik sena, kawasa Allah ḇyesi rik sena -- ma kawasa ḇeḇor rik sena smun ro supna.