1Ḇarpurya yarower roi oso imnis mkaren snonkaku ḇeḇor ḇerok ḇeruran ro boiyaswa ḇekaru, "Haleluya (Sanandik) faro Allah! Allah koḇedi ikada Allah ḇena aski ma koreri, ikada Allah ḇeba syadi ma ḇesma papoikya!
2Ḇaḇemankara ḇyedi inapes ma kyaku! Ḇyuk samamyai faro pelacur yang besar (ḇinfarḇuk ḇeba) ani kuker ḇaḇefarḇuk ḇyena. Allah ḇyuk samamyai kwar faro ḇinfarḇuk ani, ma myun Allah manfamyan ḇyesi."
3Raimnai mkaren snonkaku ḇeḇor ansi skaru wer, "Haleluya (Sanandik) faro Allah! For ḇekun mnu ḇeba ani paw ḇyena nek ḇesya kwar ma namnai ḇa!"
4Ma manfarkin samfur risuru seser rifiak ma roi ḇekenem rifiak ansi skain wepur ma sḇansuba faro Allah ḇekain ro karapesa ḇaḇesasoser ani. Sikofen, "Amin! Haleluya (Sanandik), faro Allah!"
5Raimnai korower mkaren oso ryok ro karapesa ḇaḇesasoser ani ikofen, "Allah manfyan ḇyesi kam, ma kawasa kam -- ḇeba ma kasun -- ḇeḇansuba faro Allah, mkosandik Allah!"
6Posa kwar yarower rakrok oso imnis mkaren fananjur kawasa ḇeḇor kaku; rakrok ḇyedi imnis ḇak ḇemef ḇemaum ma imnis karadu ḇerok ḇeruru. Yarower sikofen, "Sanandik faro Allah! Snar Manseren, Allah koḇedi Ḇepoik syadi ani baboine ḇyewairek.
7Mkorama komarisen ma koryaḇ; mkorama kosandik baba ḇyedi! Snar ras fakawawin Rumkun Domba ryama kwar ma ḇinfakawin ḇyedi fyasos kwar faro wafwofer ḇyedi.
8Sansun ḇepyoper ḇesnaper neḇeḇuk faroi kwar fasyansun." [Sansun ḇepyoper ani kada fararur ḇeḇye Allah kawasa ḇyesi sifrur kwar.]
9Raimnai malaikat ani ikofen maro aya, "Fasepen roi nane: 'Aski faro snonkaku ḇesma fararyor ḇemunara fakawawin Rumkun Domba ani.' " Ḇarpurya malaikat ani ikofen wer, "Wos inekada wos ḇekaku ro Allah."
10Ma yakain wepur ro malaikat ani ḇarpon ḇyedi yamarisen yaḇansuba faroi, ḇape ikofen maro aya, "Bansuba awer! Bansuba faro aya awer, mboi bansuba faro Allah! Snar aya kako manfamyan imnis aw ma imnis naek srar besi ḇeyufepen wos ḇekaku ro Yesus ḇyaryasna!" Snar ḇekofen ḇadir faro nabisya ikada wos ḇekaku Yesus ḇyaryasna.
11Ḇarpurya yamam boiyaswa ḇyeḇeḇas, ma yakmam kuda ḇepyoper oser. Ḇeyekiya snonsnon ḇyedi Ḇesouser ma Ḇekaku. Inapes ro ḇyuk samamyai ro ḇaḇe embroḇ ifrurna.
12Mka ḇyesi simnis for ḇesak ma isaswo wower nabor ro ḇru ḇyedi. Sfas kwar ro baken ḇyedi snonsnon oso; ma mankundi derer monda ifawi snonsnon ani.
13Syatu syansunya ḇyeḇesowen kwar ro rik. Ma sniriḇe "Allah wos ḇyedi."
14Sarar ḇero boiyaswa ssansun sansun ḇepyoper ḇesren ma sek kuda ḇepyopersya ḇo sisoi.
15Sumber ḇesar oso isya ro sḇadon ḇyedi ma kuker sumber ani nari ḇyukfrur kafyo ersya kam, ma nari ḇyesasoser si kuker ankyon mankarmomen. Ma nari ikafos anggur ro moḇ ḇeyisdiwer anggur masasor Allah ḇepoik syadiya.
16Ro syatu ḇyedi ma wesop ḇyedi sfas snonsnon ine, "Wairek robo waireksya, ma Tuan robo tuansya."
17Raimnai yamam malaikat oso dores ro orya bori. Ma kyaru kuker mkaren ḇeba faro mansya kam ḇeroḇ ro farsyos sansorenḇoka, "Mkorama mkofanjur mkoso munara ḇeba Allah ifrurya!
18Mkorama mkan waireksya baken sena, mambrisya baken sena ma mambri ḇemarsya baken sena; mkorama mkan ḇeyek kudasya baken sena kuker kudasya baken sena ma snonkaku kam baken sena, ḇeba ma kasun, manfyan ma ḇemkei!"
19Ḇarpurya yamam aiwan ani, ma waireksya ro supna kuker sarar embroḇ sesi, sfanjur fase embroḇ sisampum ḇeyek ro kuda ḇepyoper ansi, ma sarar embroḇ ḇyesi.
20Ma aiwan ani ḇyeḇefor fnoḇek nabi ḇekakuḇa ḇefrur kwar roi kanandor ro ḇarpon aiwan ani. [Kuker roi kanandor anna aiwan ani dankar snonkaku ḇena aḇyair aiwan ani, ma snonkaku ḇeḇansuba faro amfyanir aiwan ani.] Raimnai aiwan ani ma nabi ḇekakuḇasya sikenem ḇo sisawen si ro soren for ḇesber kuker belerang (roi ḇesak ḇenanyar ḇesam kaku).
21Ma sarar embroḇ sesi sḇeḇemun kuker sumber ḇesasyar ro sḇadon ḇeyek kuda ḇepyoper ani. Ma mansya kako srama ma san aipyokem snonkaku ansi kuker masaḇsoḇ isof sarbor.