1Raimnai kwar yamam malaikat oso isabu ro boiyaswa. Dufepen asyopder munaiḇui -- ma wanka ḇeba oso.
2Raimnai fyorepen korḇen ani, ikak mansar ani, -- isoine Ibiris roḇa Setan, (manfamyan Ibiris) ani ma ḇyewankai isof wampasi wambarek syaran oser.
3Ḇarpurya malaikat ani isawen korḇen ani ḇemunaiḇui, ma syopder der ani ma ryir kakop ḇesisen, insa korḇen ani ḇyeankarkar ersya wer ḇa, rofyor wampasi wambarek syaran oser iḇro ḇaim. Posa kwar nari speri faro fafisu ḇeknampu wer.
4Ma yamam karapesa ḇaḇesasoser nabor, ma snonkaku ḇekain ro karapesa ḇaḇesasoser anna ssḇuk papoik farosi fasawos namuk samamyaiya. Yamam kako rur snonkaku skauk ḇru sena snar sḇesaksi Yesus, ma sḇaryas Allah wos ḇyedi. Snonkaku sinema sakḇansuba maroḇa faro aiwan, roḇa amfyanir ḇyedi kako. Si kako saksma aḇyair ḇaim ro aiwan ani ro andar roḇa ḇramin sena. Sikada sikenem kaḇer wer ma sḇesasoser imnis wairek fnoḇek Kristus rofafisu wampasi wambarek syaran oser.
5Ine kada kaḇakḇok ḇepon ro snonkaku ḇemar si. [Ḇape snonkaku ḇese ḇemarsya sakḇok ḇaim rofafisu wampasi wambarek syaran oser ani.]
6Aski faro snonkaku ḇesma ḇaḇeḇok ḇeso kaḇakḇok ḇepon ine. Marmar ḇeḇesuruya ipok siḇa. Nari sḇeimam faro Allah, ma sḇeimam faro Kristus; ma nari ssḇuk sasoser fnoḇek i ro wampasi wambarek syaran oser.
7Ma wampasi wambarek syaran oser ani isyonde kwar, insape Ibiris ḇyeḇesasyar ro bui,
8ma nari rya ḇyeankarkar ersya ḇekain ro supna ḇesiper, isoine Gog ma Magog (wairek Gog ro sup Magog). Ibiris iryur si fasḇe embroḇ, dandonek sedi iba kaku, imnis barbor karyen ro soren.
9Ma sisasyar ḇesupswan ḇesiper, ma seruren kankain rum Allah kawasa ḇyesi ma mnu Allah iswar ani. Ḇape for isabu ro nanki ma ikun pres si.
10Ḇarpurya Ibiris ḇeḇeankar si ani ḇyeḇeso ḇesoren for ma belerang (roi ḇesak ḇenanyar ḇesam kaku). Isoine moḇ sisawen ḇepon aiwan ma nabi ḇekakuḇa ansuya roya. Nari susma kandera ḇemnai ḇa roḇ meser isof fyoro-fyoro.
11Raimnai kwar yamam karapesa ḇaḇesasoser ḇepyoper ḇeba oso ma ḇekain ro iya. Nanki ma supna napromes ro ḇarpon ḇyedi, isof komamna wer ḇa.
12Ma yamam snonkaku ḇemarsya, ḇeba ma kasun, sores kam ro ḇarpon karapesa ḇaḇesasoser ani. Ma syapna neḇeḇas. Ḇarpurya syap oso ḇese ḇyeḇeḇas, isoine syap kankenemya. Ma rofafisu ani samamyai ssḇuk faro snonkaku ḇemarsya, imnis rosai sifrur kwar siso fasfasepen ro syap anna.
13Raimnai sorenya ḇyefa ḇemar roisya sisasyar. Marmar ma munaiḇui daksasyar ḇemar roisya. Ma sikam sisma samamyai imnis kuker rosai sifrur kwar.
14Ḇarpurya Marmari ma Munaiḇui sisawen suḇe soren for. [Soren for inekada marmar ḇeḇesuruya.]
15Snonkaku sfasepen sisnosna ḇa ro syap kankenemya, sisawen si ro soren for ani.