Alkitab Mobile SABDA
[VER] : [BIAK]     [PL]  [PB] 
 <<  Wahyu 21 >> 

1Raimnai yamam nanki ḇebabo ma supna ḇebabo. Snar nanki ḇepon ma supna ḇepon nasyonde, ma sorenya ipromes.

2Ma yamam mnu ḇesren ani, isoine Yerusalem ḇebabo, isabu ro boiyaswa ro Allah. Mnu ani ḇyeḇefasos kwar imnis ḇinfakawin oso sḇekaramasi faisrow swa ḇyedi.

3Ma yarower mkaren ro karapesa ḇaḇesasoser ani kyaru naba, "Baboine Allah rum kruḇen ḇyedi isya rofandu snonkakusya! Nari ikenem kuker si, ma sḇekawasa ḇyesi. Nari Allah mankundi isya kuker si ma ḇye Allah faro si.

4Nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes."

5Ma ḇekain ro karapesa ḇaḇesasoser ani, ikofen, "Baboine yafrur nakam fanbabo!" Ikofen maro aya kako, "Fasepen nane, snar wos nane nkaku ma neḇekyare."

6Raimnai ikofen, "Posa kwar! Aya kada ḇeponya ma papupesya; Ayaine Manseren ro Randakya isof ro Papupesya. Mansei ḇembrowsya nari yaḇefa sinem ro war sun ḇeḇuk kankenem; ma nari sḇak royoḇa.

7Snonkaku ḇeḇefaindaya, nari isma roi anna kam ro aya. Nari yaḇe Allah faroi, ma nari ḇyeromawa maro aya.

8Ḇape snonkaku ḇemakakak, ḇekyar ḇa, ḇefrur ayin, ḇemamun, ḇefrur farḇakḇuk, ḇena rawan, ḇeḇansuba faro amfyanir ma ḇeḇeankarkarsya kam, moḇ sedi isoine soren for ma belerang (roi ḇesak ḇenanyar ḇesam kaku), ikada marmar ḇeḇesuruya."

9Ma malaikat oso rofandu malaikat rifik ḇeyuf sek anna ḇefo kuker kandera rifik ḇepupes ani ryama ikofen maro aya ḇo doḇo, "Rwama! Nari yafasna faro aw Ḇinfakawin, isoine Rumkun Domba ani swari."

10Ma Allah Rur ḇyedi ḇyepoik aya, ma malaikat ani dun aya ḇebon ḇekaki oso bori. Fyasna maro aya Yerusalem, mnu ḇesren ani. Mnu ani isabu mufes ro boiyaswa, ro Allah,

11kuker kamayai ma Allah baba ḇyedi. Mnu ani idameser imnis karui permata (karui ḇesnai fafirek ḇesisye), imnis karui baiduri pandan (karui ḇerumek ḇesnai fafirek ḇesnaper), ḇesren imnis kristal (fanin ḇesren).

12Ayar karui ḇeyarwareki, ikaki ma iḇam, kuker kedwai ḇeba samfur seser risuru ma malaikat samfur seser risuru siwaren na. Ro kedwai ḇeba anna sfas snonsnon keret samfur seser risuru ro er Israel.

13Kedwai ḇeba rikior nfasna ḇeḇar oser-oser. Roḇar wamurem kedwai rikior, roḇar wambraw kedwai rikior, roḇar wambrur kedwai rikior, ma roḇar wambarek kedwai rikior.

14Mnu ani ayar karui ḇyedi sḇawesi robo araref karui samfur seser risuru. Ro karui araref anna sfas snonsnon manwawan samfur seser risuru ro Rumkun Domba ani.

15Malaikat ḇeyawawos kuker aya ani nya ankyon warnkyara ro brawen, faḇyuk ḇewarnkyara mnu ani, kedwai ḇeba ḇyena ma ayar karui ḇyena.

16Mnu ani ḇyedopir rifiak -- kawanwanya imnis kuker aḇaḇamya. Ma malaikat ani ḇyewarnkyara mnu ani kuker ankyon warnkyara ḇyedi; ma kawanwanya kilometer syaran risuru utin rifiak; aḇaḇam ma kakakiya imnis kawanwanya.

17Rofafisu malaikat ani ḇyewarnkyara ayar karui ḇyena, kakaki ayar ani ḇyemeter samfur riwonem. Warnkyara malaikat ani ḇyukḇewarnkyaraya ikada warnkyara ro snonkaku.

18Ayar karui ro mnu ani ḇyeḇefrur ro karui baiduri pandan (karui ḇerumek ḇesnaper) ma mnu ani ḇardi ro brawen ḇekaku, isren imnis fanin.

19Araref karui ro mnu ani sḇekaramasi kuker karui permata (karui ḇesnai fafirek ḇesisye) nabor. Araref karui ḇepon sifruri ro karui baiduri pandan (karui ḇerumek ḇesnaper), ḇeḇesuruya ro karui nilam (karui ḇesnai fafirek ḇeramen), ḇeḇekiorya ro karui yakut (karui ḇesnai fafirek ḇerumek), ḇeḇefiakya ro karui zamrud (karui ḇesnai fafirek ḇerumek ḇeḇemaeja kaku),

20ḇeḇerimya ro karui baiduri sepah (karui ḇepyoper ma ḇesasyek ḇesnai rakrik), ḇeḇewonemya ro karui delima (karui ḇesnai fafirek ḇerik), ḇeḇefikya ro karui ratna cempaka (karui ḇesnai fafirek ḇenar ḇebrawen), ḇeḇewarya ro karui pirus (karui ḇesnai fafirek ḇerumek ḇeramen), ḇeḇesiwya ro karui topas (karui ḇenanyar ḇeḇemaeja), ḇeḇesamfurya ro karui krisopras (karui ḇesnai fafirek ḇerumek ḇesasyek), ḇeḇesamfur seser oserya ro karui lazuardi (karui ḇesnai fafirek ḇeramen), ma ḇeḇesamfur seser risuruya ro karui kecubung (karui ḇesnai fafirek ḇefuk).

21Kedwai ḇeba samfur seser risuru ḇyena nasma mutiara (mustika) samfur seser risuru; kedwai oser-oser sifruri ro mustika oser. Nyan mor ro mnu ani sifruri ro brawen ḇekaku, imnis fanin ḇesnaper.

22Yamam Allah Rum ḇyedi ro mnu ani ḇa, snar Allah mankundi ḇeḇe Rum Allah, Allah Ḇepoik syadi, ma Rumkun Domba ani.

23Mnu ani ḇyefandun ori sananai ḇyedi ḇa roḇa paikya snar Allah baba ḇyedi ḇyeisnai yari, ma Rumkun Domba ani kada padamara ḇyedi.

24Ma nari ersya ro supna simbran ro isna ḇyedi, ma nari waireksya kako ssun ḇaḇekayan sena ḇemnu ani.

25Kedwai ḇeba anna ro mnu ani nari neḇeseḇen ro ras ḇesiper; nari sken naba, snar roḇ isya rodiwa ḇa.

26Ḇaḇebaba ma ḇaḇekayan ro ersya nari ssun naḇe mnu ani.

27Ḇape snonkaku ḇefrur roi ḇeyarwarem, ma ḇeḇeankarkar ssḇuk fasaksun ḇa -- rosai ḇemamas, sun naḇaḇeri fansun ro dori. Mboi ḇesun ro mnu ani, derer snonkaku snonsnon sena neḇefas ro syap Rumkun Domba ani, isoine syap kankenemya.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Wahyu 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel