Dual Panel1Malaikat ani fyasna maro aya kako, war ḇesnaper imnis kristal (fanin ḇesren); war kankenem rirya. War ani idaf ro Allah karapesa ḇaḇesasoser ḇyedi ma ro Rumkun Domba ani,
2ipdef ḇenyan morya faduri ro mnu ani. Ro war andir ani, ḇanḇarya ai knam kankenemna naisya, namarem ḇesamfur seser risuru ro wampasi wambarek oser, isoine paik oser namarem ḇeoser. Ram ḇyena ssḇuk nafrur ersya fasiprei.
3Ro mnu ani kosma roi osoḇa kako ḇesma fras ro Allah. Allah karapesa ḇaḇesasoser ḇyedi ma Rumkun Domba ani nari naisya ro mnu ani. Allah manfamyan ḇyesi sḇeari faro Allah
4ma nari smam ḇarpon ḇyedi. Allah snonsnon ḇyedi nari ḇyeḇefas ro andar sena.
5Nari sfandun padamara roḇa ori sananai ḇyediḇa, -- snar roḇ isyaḇa kwar, mboi Manseren Allah mankundi nari isnai si. Ma nari sḇesasoser imnis wairek isof fyoro-fyoro.
6Raimnai malaikat ani ikofen maro aya, "Wawos nane nkaku ma neḇekyar. Manseren Allah ḇeḇuk Rur ḇyedi faro nabisya, iwan malaikat ḇyedi kwar fafyasna faro manwawan ḇyesi rosai nari fyoroḇa ḇeramana."
7"Waswarepen nane!" Yesus ikofen. "Fyoroḇa nari yarama wer. Fainda faro snonkaku ḇeswarepen wos ḇararyar ro syap inesya!"
8Ma aya, Yohanes, ḇerower ma ḇemam roi nane kam kwar. Yarower ma yamam posa kwar, yakain wepur ro ḇarpon malaikat ḇefasna nakamya maro aya, ma yamarisen yaḇansuba faroi,
9ḇape ikofen maro aya, "Bansuba awer! Bansuba maro aya awer! Bansuba faro Allah kada! Snar aya kako manfamyan imnis aw, ma imnis naek srar besi nabisya ma snonkaku kam ḇeswarepen farkarkor ro syap ine!"
10Ma ikofen wer, "Bekankunes awer wos ḇararyar ro syap ine, snar fafisuya fyanam kwar fa roi nane kam nari ndarirya.
11Snonkaku ḇeḇarḇor, iḇye ifrur pdef ḇarḇor; snonkaku ḇemamas, iḇye ifrur mamas mankundi; snonkaku ḇeso Allah marisen ḇyedi iso pdef Allah marisen ḇyedi, ma snonkaku ḇekenem faro Allah, ikenem pdef faro Allah kada."
12"Waswarepen ine!" Yesus ikofen, "Fyoroḇa nari yarama wer ma yun sasuref fayakmunsu faro snonkaku oser-oser imnis rosai ifrur kwarya.
13Ayai ḇeponya ma ḇepupesya; aya Manseren ro Randakya isof ro Papupesya."
14Aski faro snonkaku ḇepap syatu ḇyedi isof isren. Sikada nari san bon ro ai knam kankenem ma simbran ma ssun ro mnu ani ro kedwai ḇebaya.
15Ḇape snonkaku ḇefrur ayin, ḇena rawan, ḇefrur ker farḇakḇuk, ḇemamun, ḇeḇansuba faro karwar ma ḇeḇeankarkarsya, iḇye ro wos ma kuker fararur, sine kam moḇ seja isya ro mnuya ḇandiri.
16"Aya, Yesus, yafarem malaikat ayedi faro mko kwar insa ḇyaryas roi nane faro fandun jemaatna. Aya ine yaḇe ḇarpur ro Daud; aya kum wamurem ḇesna ani."
17Allah Rur ḇyedi ma Ḇinfakawin ikofen, "Rwama!" Mansei ḇerower i kako ikofen, "Rwama!" Mansei ḇembrow, ryama kada! Ma mansei ḇemarisen, dun war ḇeḇuk kankenem ani waworek monda!
18Faro snonkaku oser-oser ḇerower wos ḇararyar ro syap ine, aya, Yohanes, ḇeḇuk swarepen ine: Snonkaku ḇepam syadi roi oso ro wos ḇararyar ine, samamyai snonkaku ani kako nari Allah pyam syadi faroi kanderana sfas ro syap ine.
19Ma snonkaku ḇekaruk roi oso ro wos ḇararyar ine, mun ḇyedi sfas ro syap ine nari Allah kyaruki kako -- isoine mun ro ai knam kankenemya ma ro mnu ḇesren ani.
20I ḇeḇuk ḇaryas ḇeḇor nane kam i kofen, "Kaku, nari yarama fasaw!" Kaku! Rwamuma, o Manseren Yesus!
21Saswar ma aski ro Manseren Yesus kyainus mko kam kada! Amin.