1Ma ḇarpurya yamam ḇekain ro karapesa ḇaḇesasoser ani, ro ḇramin ḇyeja syap oso isya, syap ḇeniw. Syap ani ifo kuker fasfas ro ḇanḇar. Syap ḇeniw ani ḇyeḇekakop kuker kakop rifik.
2Raimnai yamam malaikat ḇesambraḇ oso, kyaru naba, "Mansei ḇesyus faḇeḇas kakop ma syap ḇeniw ine?"
3Ḇape snon oso ḇa iḇye ro boiyaswa, ma sup ine, roḇa ro sup ine baḇdi osoḇa faḇyas syap ani, ma myam rodori.
4Inja yakanes rawo yamarpapyoi, snar snon oso isya ḇa kako isyus faḇyas syap ani, ma myam rodori.
5Raimnai snon oso ro manfamyan ansi ikofen maro aya, "Kwanes awer! Mame! Singa (aiwan ḇeyan ḇepek) ro er Yehuda, ḇeḇeḇarpur ro Daud ḇeba ani, ḇyefainda kwar. I ḇesyus faḇeḇas kakop rifik ma syap ḇeniw ani."
6Ma yamam Rumkun Domba oso dores rofandu karapesa ḇaḇesasoser ani, ma roi ḇekenem rifik kuker manfarkin-manfarkin ansi sores yar i. Rumkun Domba ani imnis raris ḇyeḇekauk kwar. Ḇyeknapur rifik ma mka rifik: isoine Rur rifik ro Allah, iwan kwar ḇesupna ḇesiper.
7Ḇarpurya Rumkun Domba ani rya dun syap ḇeniw ani ro ḇramin ḇar raku ḇekain ro karapesa ḇaḇesasoser ani.
8Ro fafisu Rumkun Domba ani dun syap ḇeniw ani, roi ḇekenem rifiak ma manfarkin samfur risuru seser rifiak ansi skain wepur ro ḇarpon ḇyedi. Manfarkin ansi oser-oser duf sonker ma sek brawen ḇeser mamboḇo, isoine Allah kawasa ḇyesi nadi sena.
9Ma sidisen mkaren dow ḇaḇo oso: "Aw kada wasyus fawun syap ani, ma bas kakop ḇyena. Snar beḇemun kwar, ma kuker marmar ḇedi, snonkaku ro keret kam, wos, kawasa ma er bak namuk si kwar faro Allah.
10Wafrur si fase er oser seimam-imam, insa suffarmyan Allah koḇedi, ma ssḇuk sasoser imnis wairek ro supna."
11Ḇarpurya yamam wer ma yarower mkaren malaikat sibor sesyaran-syaran ma syaran samfur-risamfur! Sores yar karapesa ḇaḇesasoser ma roi ḇekenem rifiak ma manfarkin ansya.
12Sidisen kuker mkaren ḇeba, "Rumkun Domba skawuk kwar ani, isyus faisma papoik, ḇaḇekayan, ḇaḇefawawi ma ḇaḇesamambraḇ; i syus fasesyowi i, isma baba ma sisandik i!"
13Ma yarower roi ḇekenem ro nanki, ro supna, ro supna baḇna, ro sorenya dori -- roi ḇekenem ḇeḇor kam ro farsyos sansoren ine -- nadisen, "I ḇekain ro karapesa ḇaḇesasoser, ma Rumkun Domba ani, ikada isma sanandik ma syowi ma baba ma ḇaḇepapoik isof fyoro-fyoro!"
14Ma roi ḇekenem rifiak ansi skarem: "Amin!" Ma manfarkin ansi kako skain wepur ma sḇan suba.