Dual Panel1Posa kwar yamam Rumkun Domba ani ḇyas kakop ḇeponya rofandu kakop rifik anna. Ma yarower roi ḇekenem rifiak ansi oso ikofen, "Rwama!" Mkaren ḇyedi ryok imnis rakrok karadu.
2Raimnai yamam, kuda ḇepyoper oso ḇeyekroiya duf saren oser, ma ssḇuk faroi wower oser. Ma rya imnis snon oser ḇesma fainda faḇefaḇri ḇaḇefaindaya.
3Ma ḇarpurya Rumkun Domba ani ḇyas kakop ḇeḇesuruya, ma yarower roi ḇekenem ḇeḇesuruya ikofen, "Rwama!"
4Inja kuda ḇese oser isasyar wer. Kuda ani irik ma dafuk. Ḇeyekiya ssḇuk papoik fadun askibur supna ḇesiper, insa snonkaku smunyae si. Ma ssḇuk faroi sumber ḇeba oser.
5Raimnai Rumkun Domba ani ḇyas kakop ḇeḇekiorya. Ma yarower roi ḇekenem ḇeḇekiorya ikofen, "Rwama!" Yamam, kuda ḇepaisem oser. Ḇeyekiya duf warnkyara risuru ro ḇraminya.
6Ma yarower imnis mkaren rofandu roi ḇekenem rifiak ansi ḇekofen, "Sasuref ras oser fasibu amek oser, ḇyepipi sarak dinar oser; ma sasuref ras oser katera amek rikior, ḇyepipi sarak dinar oser. Ḇape mkokaruk awer zaitun knam ma anggur knam anna."
7Raimnai Rumkun Domba ani ḇyas kakop ḇeḇefiakya. Ma yarower roi ḇekenem ḇeḇefiakya ikofen, "Rwama!"
8Wakmam kada kuda oser sanana ḇyedi ryumek-nyanyar. Ḇeyekiya snonsnon ḇyedi Marmari. Ma mun aiḇui duserfaku ro dokor ḇyedi. Ssḇuk faro si mun ḇeḇefiak ro supna faro papoik sedi, insa smamun kuker ḇaḇe embroḇ, kuker fafisu basbiser, kuker dafduf ma kuker aiwan ḇeḇarḇor.
9Raimnai Rumkun Domba ani ḇyas kakop ḇeḇerimya. Ma yamam ro rokef farsarserya baḇdi rur snonkaku smun faḇemar kwar ansya, snar sḇaryas Allah wos ḇyedi kuker ḇaḇesaksi sena.
10Ma sfararar kuker mkaren ḇeba, "O, Manseren Ḇepoik syadi, ḇesren ma ḇenapes! Fafisu rosai wer insape kwukeḇ kankain supna ma ḇuk samamyai faro si snar smun inko kwar?"
11Ḇarpurya ssḇuk faro si oser-oser syatu ḇepyoper oser. Ma siwan si fasimnaisu fafisu knik wer, isof dandonek sedi imnis min sesi ḇeyuffarmyan ma naek srar sesi nari sḇeḇemun imnis si kako.
12Raimnai yamam Rumkun Domba ani ḇyas kakop ḇeḇewonemya. Ma rim ḇeba ḇeyun nyawa myun. Ori pyaisem imnis sanampuru, ma paikya fyanandik imnis rik.
13Maksya sfarbrubru ro nanki ḇesupna imnis imyui bon ḇekamur ḇerwu ro knamya rofafisu wam doḇerya kyiker.
14Ma nanki ipromes imnis syap ḇeniw, bon ma aimandoi (myos) nakam neḇekanowbur moḇ nena.
15Ma waireksya ro supna, ḇebararasya, mambrisya, kawasa ḇeḇekayan ma kawasa ḇesma papoik, ma kawasa ḇesesya, fnoḇek manfyan ma snonkaku ḇemkei, sikam siyokef ro aḇyaḇ ma ro bon karuina swaf-swafna.
16Ma sfararar faro bon ma karui anna, "Mkomsiserepen inko! Mkoyokef inko ro mamam ḇyedi ḇekain ro karapesa ḇaḇesasoser, snar masasor ro Rumkun Domba ani!
17Snar ras ḇeba ḇeyun nyawa ryama kwar, baboine sfasna masasor sena ma snonkaku oso ḇa kako fyarmku ro ḇarpon sena!"