1Ḇarpurya, yamam malaikat rifiak sores ro dopir rifiak ro supna. Ma sidwarek wam rifiak ro supna insa wamo iso awer roḇande, roḇa rosoren, roḇa ro ai knamna.
2Raimnai yamam malaikat oso ḇese isasyar ro ḇar ori dek. Dun Allah kakop ḇekenem ḇyedi. Ma kuker mkaren ḇeba malaikat ani dor malaikat rifiak ḇesma Allah papoik ḇyedi faḇemkok ḇande ma soren.
3Malaikat ani ikofen, "Mkomkok ḇepon awer ḇandeya, roḇa sorenya, roḇa ai knam na, rofyor koḇuk kakop aḇyair ro Allah koḇedi faro manfamyan ḇyesya andar sena ḇaim."
4Raimnai ikofen ḇadir maro aya, snonkaku ssḇuk kakop aḇyair Allah ro andar sena, dandonek seja syaran utin oser samfur rifiak seser rifiak. Snonkaku sine sunsi ro er Israel keret samfur seser risuru;
5ro keret oser-oser syaran samfur oser seser risuru. Isoine ro keret ma er: Yehuda, Ruben, Gad,
6Asyer, Naftali, Manasye,
7Simeon, Lewi, Isakhar,
8Zebulon, Yusuf ma Benyamin.
9Ḇarpurya yamam, snonkaku sibor syadi wer -- isof snon oso nari kyor dandonek sejaḇa! Sikada snonkaku ro ersya kam, keret, kawasa ma wosna. Ssansun syatu ḇepyoper ma suf srai ram, snonkaku ḇeḇor ansi sores roḇarpon karapesa ḇaḇesasoser ma roḇarpon Rumkun Domba ani.
10Raimnai skaru kuker mkaren ḇeba, "Korer koḇeja ryama ro Allah koḇedi, ḇekain ro karapesa ḇaḇesasoser ḇyedi, ma ro Rumkun Domba ani!"
11Malaikatsya kam sores yar karapesa ḇaḇesasoser ma manfarkinsya kuker roi ḇekenem rifiak ansi. Malaikat ansi skain wepur roḇarpon karapesa ḇaḇesasoser ma sḇansuba faro Allah.
12Skaru kam, "Amin! Allah koḇeja ikada Allah ḇesma sanandik, baba ma ḇefawinananem. Ko kofen kasumasa nabor kaku faro Allah ma ḇaḇesyowi. I Allah ḇepoik ma ḇesambraḇ isof fyoro-fyoro! Amin."
13Ma snon oso ro manfarkin ansi ifuken aya, "Snonkaku ḇesun syatu ḇepyoper sine, mansesirya ma sramakero?"
14Yakarem, "Yafawi ḇa, tuan. Tuan mankundaw wafawi." Inja ikofen maro aya, "Sinekada snonkaku ḇesma koreri kwar, posa ro sisasyarbur kandera ḇeba. Spap syatu sena kwar ma sifrurna fanapyoper kuker Rumkun Domba ani rik ḇyena.
15Rarirya sores ro ḇarpon karapesa ḇaḇesasoser Allah, ma ssesyowi faro Allah roḇ meser ro Allah rum ḇesren ḇyedi. Ma i ḇekain ro karapesa ḇaḇesasoser ani nari iso si fafyadiren si.
16Nari sibiser ma simbrow wer ḇa; samsam ori nari myun si wer ḇa,
17snar Rumkun Domba ḇekain rofandu karapesa ḇaḇesasoser ani nari ḇyemanfarandows faro si. Nari fyarkin si ḇewar baken ḇeḇuk kankenem. Ma nari Allah ipyos mkaru senabur simkasna."