Dual Panel1Ri uleng mapitué taungngéro Ismaél ana’ Nétanya sibawa eppona Elisama laowi silaong seppulo tau ri Mizpa untu’ siruntu sibawa Gedalya. (Ismaél iyanaritu séddiwi arung, sala séddinna parawira tanréna akkarungengngé.) Wettunna mennang manre maneng sisama,
2Ismaél sibawa iya seppulo tauwéro rampui peddanna mennang nanaunoi Gedalya, gubernur iya riyakkaé ri tau Babél-éro.
3Nauno towi Ismaél sininna tau Yéhuda iya engkaé silaong Gedalya ri Mizpa, sibawa sininna tentara Babél iya nasitujuwangngé engkai kuwaro.
4Esso rappina, wettunna dé’pa naissengngi tauwé riyunona Gedalya,
5poléni aruwa pulona tau polé ri Sikhem, Silo, sibawa Samaria. Purani mennang nacukkuru janggo’na, sapé’i pakéyanna, sibawa cori-cori’i watakkaléna mennang. Tiwii mennang gandong sibawa kamennyang untu’ nakkasuwiyangeng ri Bolana PUWANGNGE.
6Nanassuna Ismaél polé ri Mizpa nanalao méwai sita mennang. Nakkeda, naterito, "Laono mai taitai Gedalya."
7Lettu’na muwa mennang ri tengnga-tengngana kotaé, Ismaél sibawa sining taunna mammulani mpunoi mennang. Iyakiya seppulo ri yelle’na mennang makkeda lao ri Ismaél, "Aja’ muwunoki! Mappunnai mupi duwanrupa gandong, makkuwatoro minnya zaitun, sibawa cani. Iya manenna risubbui ri saliweng kota." Rimakkuwannanaro dé’na nariyuno mennang ri Ismaél, iyakiya iya laingngé naunoi nanaggenrungengngi ujuna mennang muttama ri bujungngé.
8(41:7)
9Iyaro bujungngé iyanaritu bujung battowa iya naébbué Arung Asa ri wettu rigasana ri Baésa arung Israél.
10Nainappa natikkeng Ismaél sining ana’ makkunrainna arungngé sibawa sininna tau iya engkaé mupa ri Mizpa iya puraé nabbéréyang Nébuzaradan lao ri anganrowangenna Gedalya. Ritawanni mennang ri Ismaél nainappa joppa silaong mennang mattuju ri daérana Amon.
11Yohanan ana’ Karéah sibawa sininna parawira iya sibawangngéngngi naéngkalingani passalenna jana Ismaél.
12Nasilaonni mennang ana’ buwana lao lellungngi, nanaruntu’ni ri kolang battowana Gibéon.
13Naitana Yohanan silaong parawira-parawiraéro polé, marennu senna’ni sining tawangenna Ismaél,
14nainappa balé’ nalari lisu méwai sita rombonganna Yohanan.
15Iyakiya Ismaél sibawa aruwa ana’ buwana leppe’i, nalari lao ri wanuwa Amon.
16Nainappa Yohanan sibawa parawira-parawirana paddeppungengngi sining prajuri’é, makkunraié, ana’-ana’é, sibawa sining pegawé saoraja iya ritawangngé ri Ismaél puranana nauno Gedalya.
17Métau manenni mennang lao ri tau Babél-é, nasaba purai Ismaél mpunoi Gedalya iya nakkaé arung Babél mancaji gubernurna wanuwaéro. Jaji, larini mennang lao ri Maséré. Ri tengnga laleng, mappésauwi mennang ri Kimham seddéna Bétléhém.
18(41:17)