Dual Panel1Purairo sininna tauwé, battowa baiccu, silaong parawira-parawiraé muttama’ni Yohanan ana’ Karéah sibawa Azarya ana’ Hosaya laoni
2ri iyya sibawa makkeda, "Pa’, pada-pada iya alénaé Bapa’ mitai, riyolo maégaki, makkekkuwangngé céddé mani monro. Riyéllauwi Bapa’ maélo massempajangekki lao ri PUWANG Allataala iya nasompaé Bapa’. Assempajangekki iya risésaéwé,
3kuwammengngi nappaitangngi PUWANG Allataala lao ri idi kégaki harusu lao sibawa aga harusu ripogau’."
4Umappébali, "Makessinni rékko makkuwaitu. Utarimai paréllaummuro. Maéloka massempajang lao ri PUWANG Allataalata, na muwi aga pappébalin-Na, uwappaissengeng manengngi matu; muwi séddi dé’to usubbui polé ri iko."
5Makkedani mennang ri iyya, "Riyéllauwi Bapa’ massempajang lao ri PUWANG Allataalata, nasaba maéloki mapato lao ri Aléna, kuwammengngi namancaji makessing keadaatta. Jaji, makessing iyaré’ga maja iyaro pasenna PUWANGNGE, maéloki turusiwi. Leppessanni PUWANGNGE mancaji sabbi iya malempué nenniya matinulué lao ri idi, narékko dé’ nariturusi maneng parénta iya nabbéréyangngé PUWANGNGE lao ri idi naolai Bapa’."
6(42:5)
7Seppulo esso ri munrinna mabbicarani PUWANGNGE lao ri iyya.
8Nauwobbini Yohanan enrengngé parawira-parawirana sibawa sininna tau laing iya polé silaong aléna.
9Makkedaka lao ri mennang, "Musuroka palettu’i paréllaummu lao ri PUWANGNGE, Allataalana Israélié. Nah, makkedai PUWANGNGE,
10‘Rékko maéloko tette monro ri wanuwaéwé, Uwakkako matu, tenniya pasempé’ko; Upatettokko matu, tenniya ruttukko. Messé senna’-Ka nasaba purai Upapolé acilakangngé ri yasé’mu.
11Aja’na mumétau lao ri arung Babél-éro. Engkaka ri tengnga-tengngamu untu’ mattulung sibawa paleppe’ko polé ri akuwasanna.
12Nasaba maressé babuwa-Ka lao ri iko, Uwébbui matu arung Babél messéiko sibawa palaloko lisu. Iyya, PUWANG, pura mabbicara.’"
13Iyakiya iko iya monroé mupa ri Yéhuda apatono lao ri PUWANG Allataalamu sibawa aja’ muwakkeda, "Dé’ tamaélo monro ri wanuwaéwé. Maéloki lao ri Maséré sibawa monro ri wanuwaéro. Dé’na naripéneddingi musué kuwaro, dé’ taéngkalinga oni tarompé iya mangobbié untu’ mammusu, sibawa dé’to tamanrasa-rasa makkadéreng." Rékko matedde atiko untu’ lao ri Maséré sibawa monro kuwaro, iyanaé pasenna PUWANG Iya Pommakuwasaé, Allataalana Israélié, lao ri iko:
14(42:13)
15(42:13)
16"Musu sibawa akkadéreng iya muwétauriyéro nalellukko matu lettu ri Maséré, namumaté matu ri wanuwaéro.
17Sininna tau iya matedde atié untu’ lao ri Maséré sibawa monro kuwaro matéi matu ri laleng musué, iyaré’ga matéi ri akkadérengngé iyaré’ga saié. Dé’ muwi séddi tau leppe polé ri abala iya Upapolé matu ri yasé’na mennang; maté manengngi matu.
18Pada-pada Iyya, PUWANG Allataalana Israélié tuppa’i cai-Ku sibawa apéddarak-Ku ri yasé’na pabbanuwana Yérusalém, makkuwatoro Utuppa’i matu apéddarak-Ku ri yasé’mu iya laowé ri Maséré. Masélengngi matu tauwé mitako; ripakatunako matu, sibawa ripakéi matu asemmu selaku tanro. Dé’na muwitai matu iyaé tana ancajingemmu."
19Nainappa makkedasika, "Purani napparéntang PUWANGNGE kuwammengngi iko iya risésaé mupa ri Yéhuda dé’ mulao ri Maséré. Rimakkuwannanaro uparéngngerangiko makkekkuwangngé
20makkedaé purako mébbu séuwa asalang battowa. Muwéllauka kuwammengngi massempajakka lao ri PUWANG Allataalata untu’ iko, sibawa majjanciko untu’ pogau’ manengngi iya napowadaé PUWANGNGE.
21Makkekkuwangngé purani upalettu pasenna PUWANG Allataalata lao ri iko, iyakiya dé’ mumaélo turusiwi iyaro pasengngé.
22Rimakkuwannanaro, éngngerangngi: wanuwa iya muwacinnaiyé laowi untu’ mattette kuwaro, matéko matu ri laleng musué, iyaré’na nasaba akkadéreng iyaré’ga sai."