Dual Panel1Wettunna naéngkalinga Arung Yabin polé ri Hazor passalenna sining apakalanna Israélié, suroni tau lao ri Arung Yobab polé ri kota Madon, lao risining arunna kota Simron sibawa Akhsaf,
2lao risining arungngé ri bulué bagiyang manorang, ri Lompo Yordan seddé yattanna Galiléa, ri daéra pong bulué, sibawa ri daéra wiring tasi’é ri seddéna Dor.
3Suro towi tau lao ri tau Kanaangngé ri bagiyang yajang sibawa alauna Yordan, ri tau Amorié, Hét-é, Féris-é, sibawa tau Yébus-é, ri daéra bulué, enrengngé tau Héwié ri pong Bulu Hérmon ri daéra Mizpa.
4Napoléna iyaro sining arungngé sibawa sininna tentarana mennang iya maéga senna’é pada-pada kessi’é ri wiring tasi’é. Anyarang sibawa karéta musuna mennang maéga senna’to.
5Sininna arungngéro siyempe’i sibawa silaongngi polé patettong markas ri seddéna ana’ Salo Mérom untu’ gasai Israélié.
6Nakkeda PUWANGNGE lao ri Yosua, "Aja’ mumétau lao ri mennang. Ri wettu pada-padaéwé baja, pura manenni mennang Uwuno untu’ Israélié. Harusu’i mupaccappu anyaranna mennang, sibawa karéta-karéta musuna mennang harusu’i mutunu."
7Naluruini Yosua sibawa sininna tentarana iyaro balié tennasenna-sennai ri seddéna ana’ Salo Mérom.
8Na PUWANGNGE mébbui umma Israélié caui mennang. Tau Israélié gasai sibawa lellungngi mennang lettu sibbéla Misréfot-Maim sibawa Sidon ri manorang, sibawa sibbéla Lompo Mizpa ri alau. Matteruni musué angkanna dé’ muwi séddi tau polé ri balié iya nasésaé — maté maneng.
9Napogau’ni Yosua lao ri mennang situru sibawa aga iya puraé napparéntang PUWANGNGE: napaccappuni anyaranna, sibawa natunui karéta-karéta musuna mennang.
10Purairo lisuni Yosua, nainappa nasittai Hazor iya wettuéro iyanaritu kaminang mawatangngé ri yelle’na sininna akkarungengngé kuwaro. Natunui iyaro kotaé, nanaunoi arunna sibawa sininna pabbanuwana; dé’ muwi séddi tau naleppessang tuwo.
11(11:10)
12Nainappa nasittai Yosua iyaro kota-kotaé, nanatikkengngi sining arunna sibawa nauno situru paréntana Musa, atanna PUWANG-ngéro.
13Iyakiya kota-kota iya napatettongngé ri yasé’na bulu-bulu ruttungengngé, dé’ muwi séddi iya natunué tau Israélié, sangadinna Hazor iya natunué Yosua.
14Sininna pabbanuwana iyaro kota-kotaé naunoi; dé’ muwi séddi tau naleppessang tuwo. Iyakiya sininna barab-baranna iya mangke’é sibawa olokolo’na nalai tau Israélié mancaji appunnangenna mennang.
15Sininna iya napparéntangngé PUWANGNGE lao ri Musa, atan-Na, purani napalettu Musa lao ri Yosua, sibawa napogau’na Yosua; dé’ muwi séddi iya dé’é napogau’i.
16Nasittaini Yosua sininna wanuwaéro — daéra buluna, daéra pong bulué, muwi ri manorang iyaré’ga ri yattang; makkuwatoro sininna daérana Gosyén sibawa daéra padang makabuttué ri bagiyang yattanna Gosyén, nenniya Lompo Yordan.
17Lowanna iyaro daéraé mappammulai ri Bulu Makellué ri bagiyang yattang seddéna Edom, lettu ri manorang sibbéla Baal-Gad ri Lompo Libanon ri seddé yattanna Bulu Hérmon. Maitta senna Yosua mammusu sibawa sining arunna daéraéro, iyakiya angkanna natikkeng sibawa nauno maneng mennang.
18(11:17)
19Polé risininna kota-kotaé risininna daéraéro dé’ muwi séddi kota iya mébbué assijancing assisellaongeng sibawa Israélié, sangadinna Gibéon, kotana bangsa Héwié. Sininna kota iya laingngé nacauni ri laleng ammusurengngé.
20PUWANGNGE mébbui mennang matedde ati untu’ mammusu sibawa tau Israélié, kuwammengngi naripaccappu mennang, sibawa riyuno maneng temmaddampeng situru paréntana PUWANGNGE lao ri Musa.
21Ri wettuéttonaro nalao Yosua paccappui bangsa Enak-é, iyanaritu bangsa rassasa iya monroé ri daéra bulué — ri Hébron, Débir, Anab, sibawa sininna daéra buluna Yéhuda nenniya Israélié. Riyuno maneng ri Yosua, sibawa kota-kotana mennang ripaccappu.
22Dé’ muwi séddi tau polé ri bangsa Enak-éro iya nasésaé ri daéra Israélié, banna ri Gaza, Gat sibawa Asdod engka mupa.
23Sininna wanuwaéro nasittaiwi Yosua situru paréntana PUWANGNGE lao ri Musa, nainappa nawéréng bangsa Israélié mancaji appunnangenna mennang. Iyaro wanuwaé natawa-tawai, tungke suku lolongeng séddi bagiyang. Mappésau toni bangsa Israélié mammusu sibawa amanni wanuwanna.