Dual Panel1Nanaobbini Yosua sining tau polé ri suku Rubén, Gad sibawa sibagiyang suku Manasyé iya ri seddé alauna Salo Yordan,
2nainappa makkeda lao ri mennang, "Purani mupogau’ sininna séuwa-séuwaé iya riparéntangngékko polé ri Musa, atanna PUWANG-ngéro. Sibawa pura toni muturusi sininna paréntaku.
3Lettu makkekkuwangngé dé’pa naengka muleppessangngi saudara-saudaramu, tau Israél laingngé, mamusu alé-alé. Purani muturusi parénta-paréntana PUWANG Allataalamu sibawa mattonget-tongeng.
4Nasituru sibawa jancin-Na, PUWANG Allataalamu pura mabbéréyang atennangeng lao ri saudara-saudaramu, tau Israél laingngé. Jaji, makkekkuwangngé lisuno ri daéramu ri seddé alauna Salo Yordanro iya nawéréngngékko Musa riyolo.
5Sibawa jagaiwi kuwammengngi muturusiwi hukkung iya napparéntangngé Musa lao ri iko, iyanaritu: Amaséiwi PUWANG Allataalamu, accowériwi élo-Na, turusiwi sining parénta-Na, atinuluno ri Aléna sibawa attumanino ri Aléna sibawa sissukku atimmu sibawa sukku nyawamu."
6Nainappa nabbéréyang Yosua barakka’na sibawa leppessangngi mennang lisu ri daérana sibawa mpéréngngi pasengngéwé, "Makkekkuwangngé sugino sibawa lisuko namutiwi maéga olokolo, péra’, ulaweng, tembaga, bessi sibawa pakéyang. Bagé-bagéngeng towi wassélé rappamuro lao risining tau sisukummu laingngé." Na suku Rubén, Gad, sibawa suku Manasyé iya ri alaunaé Yordanro nasalaini tau Israél laingngé, nainappa joppa polé ri Silo ri Kanaan mattuju ri tanana mennang ri daéra Giléad. Naonroini mennang tanaéro nasaba paréntana PUWANGNGE naolai Musa. (Sitengngana suku Manasyé purani natarima polé ri Musa, tana ri seddé alauna Salo Yordan, sibawa sitengngana suku Manasyé iya laingngé tarimai polé ri Yosua tana ri seddé yajanna Salo Yordan silaong sibawa suku-suku iya laingngé.)
7(22:6)
8(22:6)
9(22:6)
10Wettunna suku Rubén, Gad sibawa suku Manasyé ri alaunaé Yordanro lettu ri Gelilot — ri seddé yajanna mupi Salo Yordan — patettongngi mennang séddi mézba iya battowaé sibawa magelloé ri seddéna saloé.
11Sining tau Israél laingngé naéngkalingani sibangsana mennang makkeda, "Sining tau suku Rubén, Gad sibawa suku Manasyé ri alauna Yordan purani patettong séddi mézba ri Gelilot seddéna Salo Yordan ri bagiyang daérata!" Nanaddeppungeng manenna mennang ri Silo maélo musui suku-suku Israél ri bagiyang alaunaé Salo Yordanro.
12(22:11)
13Nainappa Pinéhas, ana’na Imang Eléazar, risuro ri umma Israélié lao ri suku Rubén, Gad sibawa suku Manasyé ri daéra Giléad ri alauna Yordan.
14Nasibawang Pinéhas lao towi seppulo tomariyolona bangsa Israélié, — séddi tau polé ri tungke suku ri seddé yajanna Salo Yordan, tungke-tungke iyanaritu kapala kaluwargaé ri laleng appanna mennang.
15Nalettu’na mennang ri onronna suku Rubén, Gad sibawa suku Manasyé ri daéra Giléad.
16Nainappa ri laleng asenna sininna umma’na PUWANGNGE, makkedai mennang lao risining tau polé ri suku Rubén, Gad sibawa suku Manasyéro, "Magi mupogau’i gau’ iya majaéwé lao ri Allataalana Israélié? Sibawa patettongngi mézbamu muto, muéwai PUWANGNGE! Dé’na muturusiwi parénta-parénta-Na!
17Dé’ga muwéngngerangngi dosata ri Péor? Iyaro wettué nahukkukki PUWANGNGE sibawa séuwa sai, namuni idi’é umma’-Na muto! Lettu makkekkuwangngé tatanggung mupi addimonrinna. Aga iyaro dé’topa nagenne?
18Na makkekkuwangngé, aga maélosikoga mabbokoriwi PUWANGNGE? Rékko iyaé essoé muéwai PUWANGNGE, macayii matu baja lao risininna umma Israélié.
19Rékko najisi’i iyaro daéramu sibawa dé’ nasipato untu’ ripancaji onrong assompang lao ri PUWANGNGE, létté bawanno mai ri daérana PUWANGNGE, kégi engka Kémana PUWANGNGE. Ellauni sibagiyang daérata, iyakiya aja’ muéwai PUWANGNGE iyaré’ga muéwaki ri laleng mutambainna séddi mézba laing, na engkana mézbana PUWANG Allataalata.
20Engngerangngi, Akhan ana’ Zérah dé’ namaélo turusiwi paréntana PUWANGNGE passalenna barab-barang iya harusu’é riancuru, na agana addimonrinna? Sininna umma Israélié rihukkung! Iya madosaé banna Akhan, iyakiya iya maté tenniya aléna bawang!"
21Nainappa sining tau suku Rubén, Gad sibawa Manasyé ri seddé alauro mappébali,
22"Iya Pommakuwasaé iyanaritu PUWANGNGE! Iya Pommakuwasaé iyanaritu PUWANGNGE! Naisseng magi tapogau’i gau’éwé, namaéloki kuwammengngi muwisseng towi! Akkalarapanna tapogau’i gau’éro sibawa akkatta méwai PUWANGNGE iyaré’ga nasaba dé’na tamateppe ri Aléna, leppessakki maté makkekkuwangngétto!
23Aléna PUWANGNGE hukkukki, rékko makkattaki méwai PUWANGNGE sibawa patettongngi mézbata untu’ makkasuwiyangengngi akkarobangeng ritunué iyaré’ga akkarobangeng gandongngé iyaré’ga akkarobangeng assisellaongengngé ri yasé’na.
24Tenniya iyaro akkattata, Saudara-saudara! Ripatettongngi iyaro mézbaé, nasaba bata-bataki matti rimunri makkedai matu wija-wijammu lao ri wija-wijatta, ‘Iko dé’ aga-aga muwappunnai assisumpungeng sibawa PUWANGNGE, Allataalana Israélié!
25Itai, Nataroi iyaé Salo Yordan ri tengnga-tengngata mala untu’ sawakki sibawa iko sining tau Rubéngngé sibawa Gad-é. Tongeng iko dé’ muwappunnai assisumpungeng aga-aga sibawa PUWANGNGE.’ Na agana kajajiyang matti? Tentuni wija-wijammu naébbui matu wija-wijatta mappésau massompa lao ri PUWANGNGE.
26Jaji, patettokki mézba, tenniya untu’ akkarobangeng ritunu iyaré’ga untu’ sining pakkasuwiyatta,
27iyakiya untu’ mancaji tanrang ri idi duwa sibawa wija-wijatta rimunri, makkedaé tongeng idi’é massompaki lao ri PUWANGNGE ri Kéma Ahadéréken-Na sibawa tiwi akkarobangeng ritunu, pakkasuwiyang-pakkasuwiyang sibawa akkarobangeng assisellaongeng. Nanallalengiro dé’ nakkeda matu wija-wijammu makkedaé wija-wijatta dé’ nappunnai assisumpungeng sibawa PUWANGNGE.
28Jaji, akkattata iyanaritu: akkalarapanna wija-wijammu makkeda makkuwairo, wija-wijatta weddingngi makkeda, ‘Itani mézbaéro! Néné-nénéta patettongngi séddi mézba iya pada-padaé sibawa mézbana PUWANGNGE, tenniya untu’ akkarobangeng ritunu iyaré’ga untu’ pakkasuwiyang, iyakiya untu’ mancaji tanrang ri idi, sipadduwa.’
29Ateppe’no, dé’ tamaélo méwai PUWANGNGE iyaré’ga mappésau mattumani ri Aléna sibawa tambaiwi mézba laingngé untu’ akkarobangeng ritunu iyaré’ga akkarobangeng gandong iyaré’ga untu’ pakkasuwiyang, na mézbana PUWANG Allataalata engkana ri yolona Kéma Ahadérékenna PUWANGNGE."
30Sininna iya napakatajangngé sining tau polé ri suku Rubén, Gad sibawa suku Manasyé ri seddé alauro naéngkalingani Imang Pinéhas silaong iya seppulo tomariyolona masaraka Israél polé ri yajanna Salo Yordan. Namasennanna sibawa pappakatajangngéro.
31Nanakkeda Pinéhas, ana’na Imang Eléazar, lao risining tau suku Rubén, Gad sibawa Manasyé Alaué, "Riissenni makkekkuwangngé PUWANGNGE sibawakki, nasaba dé’ muéwai Aléna. Purani mupassalama umma Israélié polé ri pahukkungenna PUWANGNGE."
32Purairo joppani Pinéhas sibawa sining tomariyolona Israéliéro. Nasalaini mennang sining tau Rubéngngé sibawa Gad-éro ri Giléad, nanalisu ri Kanaan, nanalaporo’i parakaraéro lao ri umma Israélié.
33Namasennang tona umma Israélié sibawa gau’éro, angkanna mennang napoji-poji Allataala. Dé’na mennang nabbicara passalenna niya’na untu’ musui sining tau Rubéngngé sibawa Gad-é, sibawa untu’ mancuru’i wanuwanna.
34Angkanna makkeda iyaro suku Rubén sibawa Gad, "Iyaé mézbaé mancajiwi sabbi untu’ idi maneng makkedaé PUWANGNGE iyanaritu Allataala." Nanasenni mennang iyaro mézbaé "Sabbi".