Alkitab Mobile SABDA
[VER] : [DAIRI]     [PL]  [PB] 
 <<  Matius 26 >> 

1Enggo kessa pul ipeddahken Jesus karina sindai, nina mo taba sisinNa:

2"Ibettoh kènè ngo dua ari nai dapet mo Ari Raya Paskah, ipesakat mo Anak Jelma asa ipersilangken!"

3Sinderrangna idi merpulung ngo imam-imam ekuten dekket pengulu-pengulu Jahudi i bages Imam Huntuun i mo si Kayafas.

4Irungguken kalak i ngo lako menangkup Jesus dekket cara tipu lako memunuhSa.

5"Tapi," idokken kalak idi, "ulang mo siulaken bagidi tikan pèsta i, asa ulang gontar jelma nterrem idi."

6Tikan i Betania Jesus, i bages si Simon imo sikoliten tikanna i,

7roh mo sada kalak daberru mendahi Jesus. Iembah ngo sada botol bagak merisi minak baungkus maharga kalohoon. Sinderrang kundul Jesus mangan, iarirken daberru i mo minak mi babontakal Jesus.

8Mellaga mo sisiin Jesus mengidah bagidi, "Man kadè mo gunana baingenna bagi mbuasna?" nina kalak i.

9"Otang lotiin idèaken minak i dekket harga mahal, asa niberrèken tokorna taba kalak sincoor?"

10Ibettoh Jesus ngo pikiren kalak idi, nai nina mo, "Kasa isusahi kènè daberru ènda? Mendè ngo pemaingna i bangKu.

11Pukpuk ngo lot kalak sincor bai ndènè, tapi ukum Aku oda menettap rebbak dekket kènè.

12Merkitè iarirken minak baungkus idi mi dagingKu, solo-solo mengkuburken Aku ngo i.

13Èngèt kènè mo! Barang i dikè luas ibagahken Sukuten Kelluahen bai Dèbata nai, dekket ngo pemaing daberru ènda isukutken, lako mernèngèt ia."

14Nai sada kalak ibas sisiin sisipuluh dua idi nai, mergerar si Judas Iskariot, laus mendahi imam-imam ekuten.

15Idokken mo taba kalak idi, "Kadè iberrèken kènè bangku, mula kupesakat Jesus bai ndènè?" Nai mènter ibilang kalak i mo tellupuluh riar pirak, iberrèken mo riar i bana.

16Mulai i sidi nai mo itulus si Judas Iskariot ketika cocok lako menelbuh Jesus.

17I ari perlebbè tupung Pèsta Roti Siso Meragi, roh mo sisiin Jesus tabaSa. Ikusoken kalak i mo, "Idikè sèkel Tuhan idi kipangan pangaan Paskah asa kuhantari kami?"

18Ialoi Jesus mo, "Laus mo kènè mendahi sada kalak i kuta, dokken kènè mo tabasa, 'Tennah Guru i, enggo mo dapet katikangKu, jadi naing mengerayaken Paskah ngo Aku i bagesmu rebbak dekket sisinKu.'"

19Ibagahken sisiin idi mo bagè nidokken Jesus idi taba kalak i. Laus mo kalak i menghantari pangaan Paskah idi.

20Gellap kessa mo ari, kundul mo Jesus rebbak dekket sisinNa lako mangan.

21Sinderrang mangan idi, mongkam mo Jesus, "Dengkohken kènè: sada kalak bai ndènè nai naing menelbuh Aku."

22Idengkoh sisiin i kessa mo rana Jesus idi, mellui kalohon mo ukur kalak idi. Nai gennep mo kalak i mendokken taba Jesus, "Otang oda ma ngo aku nidokkenmi Tuhan?"

23Ialoi Jesus mo, "Sirebbakken dekket Aku mengosepken roti mi bagasen caban, ia mo sinaing menelbuh Aku.

24Kennah matè ngo Anak Jelma i, ai tersurat ngo ibas Bibèl, kennah matè ngo ia. Tapi merjaya mo kalak simenelbuh Anak Jelma idi! Lotiin kin ngo ulang sanga tubuh ia i dunia ènda!"

25Nai mongkam mo si Judas penelbuh idi, "Otang oda ma ngo aku nidokken Guru i?" Ialoi Jesus mo, "Bagi ngo nimu!"

26Enggo kessa bagidi, ibuat Jesus mo roti idokken mo lias atè, nai ipenggelli mo roti idi ibas tanganNa, ipemberrèken mo taba sisinNa ninganna idokken, "Jalo kènè mo janah pangan kènè, dagingKu ngo ènda."

27Enggo kessa i, ibuat mo perènumen anggur, idokken mo melias atè bai Dèbata. Nai ipepènumken mo taba sisinNa ninganna idokken, "Mènum mo kènè karina i sidi nai!

28Ai darohKu ngo ènda, pehotken perpadanen -- Iorèken ngo darohKu mahan kesasaan dosa bai jelma mbuè.

29Èngèt kènè mo: Oda nèngè ènumenku anggur idi soh mi katikana Aku rebbak dekket kènè mengènum anggur sirimbaru i Dunia Sirimbaru dekket BapangKu."

30Enggo kessa bagidi, iendèken kalak i mo endè pemoji-mojiin, kessa pul i laus mo kalak i mi Uruk Zaitun.

31Nai idokken Jesus mo taba sisinNa, "Berngin èn, itadingken kènè mo Aku lako mperrus; ai tersurat ngo ipas Bibèl, 'ibunuh Dèbata ngo permakan i janah mermèrapen ngo biri-biri simpulguken idi.'

32Tapi kèkè kessa Aku, Kulebbèi ngo kènè mi Galilea."

33Nai idokken si Petrus mo taba Jesus, "Barang karina kalak i menadingken Kono Tuhan, tapi ukum aku oda!"

34Nai idokken Jesus mo tabasa, "Èngèt mo, sinderrang madèng takuak manuk berngin ènda, enggo mo ipersomada ko Aku tellu kali."

35Ialoi si Petrus mo, "Mula pè matè aku rebbak Kono Tuhan, oda kudokken baMu; oda kutandai Kono Tuhan." Janah karinana ngo sisiin idi mendokken bagidi ma.

36Nggo kessa i laus mo Jesus dekket sisinNa mi sada bekkas mergerar Getsemane. Idokken Jesus mo taba kalak i, "Kundul mo kènè i sènda, laus Aku lebbè mersodip mi sandi."

37Iarahken mo si Petrus dekket anak si Sebedeus si dua i laus rebakken Jesus. Nderrang bagidi teridah ngo Jesus bonek janah bulisah kalohoon.

38Idokken mo taba sisinNa, "Bonek kalohon ngo kuakap ukurKu, bagè naing matè ngo. Isèn mo kènè, merjaga-jaga rebbak dekket Aku."

39Nai misir mo Jesus narih merkellang situk, i sidi mo Ia tangkep mi tanoh janah mersodip, "Ialè Pa," nina, "Ukum ndorok, pesisi mo bangku nai kinipersuk simahan kugongken ènda. Tapi ulang mo lemmongku, lemmoMu mo."

40Enggo kessa bagi, balik mo Jesus mendahi sisinna sitellu kalak idi, tapi meddem ngo kalak i idapet. Nina mo taba si Petrus, "Oda ngo kèppè tergong kè ndungo rebbak dekket Aku giam sinempas?

41Merjaga-jaga mo kènè ninganna mersodip, asa ulang talu kènè i pengojiin. Tuhuna bennar ngo naing iulaken tendi ndènè, tapi oda tellap kè, kerna ndotè ngo tabiat jelma i."

42Nai iolihi Jesus nola mo mersodip pedua kaliken, nina mo, "Ialè Pa, mula kennah Kubellus ngo kinipersuk ènda janah mak ndorok mada, saut mo lemmo atèMu alè Pa!"

43Balik nola mo Jesus, idapet ma mo tong meddem sisinNa idi. Oda terbuka kalak i nèngè matana, ai mbotong ngo cilèbenna.

44Itadingken Jesus mo kalak i sikali nai, lako mersodip petellu kaliken. Dos ngo sodipNa bagè perlebbè idi.

45Nai molih mo Ia mendahi sisinna janah nina mo, "Dak iempet kènè dèng ngo meddem janah mentadi? Tengngen mo, enggo dapet katikana ipesakat mo Anak Jelma i taba kuasa jelma perdosa.

46Kèkè mo kènè, ita kènè mo. Tengngen kènè mo! Enggo soh mi sèn kalak simenelbuh Aku!"

47Tikan mengerana dèng Jesus, roh mo si Judas, sada kalak ibas sisipuluh dua idi nai. Rebbak roh ngo ia dekket mbuè jelma merembah peddang dekket palu-palu, imo pasulaken imam ekuten dekket pengulu-pengulu Jahudi.

48Enggo kin ngo ibagahken penelbuh idi bai kalak idi tandana: "Barang isè nahan kusanggoh, i mo kalakna. Tangkup kènè mo Ia!"

49I si soh mi bekkas idi, mènter idapetken si Judas mo Jesus janah nina mo, "Njuah-njuah mo Guru!" Ninganna isanggoh mo Jesus.

50Ialoi Jesus mo, "Merkadè ko roh mi sèn anggia?" Nai mènter roh mo jelma mbuè i, itangkup mo Jesus.

51Sada kalak sisiin Jesus sini gembar Jesus idi menintak peddangna. Ipastik mo naposo imam huntuun idi, sampè mistak pènggelna.

52Idokken Jesus mo taba sisinNa idi, "Sembungken peddangmi, kerna barang isè mengasangken peddangna, matè ngo ia bakinen peddang.

53Katèmu oda ndorok kupido bai Bapa, asa ipasulak bagèndari sipuluh dua ntinegu tenterra malaèkat?

54Tapi mula bagi ngo, bakunè mo persautna bagè sienggo ikataken ibas Bibèl, kennah masa ngo bagèen?"

55Nai idokken Jesus mo taba jelma mbuè idi, "Roh kènè lako menangkup Aku merembah peddang ninganna merpalu-palu, bagè dempak kalak perjahat! Gennep ari ngo Aku mengajari i Bages Dèbata, tapi oda itangkup kènè Aku.

56Tapi karinana ènda kennah ngo terjadi, asa saut bagè nisuratken nabi-nabi i bagasen Bibèl." Enggo kessa bagi, mperrus mo karina sisiin idi menadingken Jesus.

57I iring kalak i mo Jesus mi bages Imam Huntuun Kayafas. Enggo mo pulung i sidi guru-guru agama Jahudi dekket pengulu-pengulu Jahudi.

58Tapi ukum si Petrus dak ièkut-èkut ngo Jesus ndaoh-ndaoh i podi nai, soh mi kasèan imam huntuun i. Ibengketti si Petrus mo mi kasèan i, janah rebbak kundul dekket perjaga ni sidi. Ai naing bettohenna ngo barang bakunè dungna.

59Karina imam-imam ekuten dekket kerungguun idi menulusi saksi-saksi palsu, asa ndorok Jesus idi ihukum matè.

60Tapi oda dapet bukti-bukti bai kalak i, tukasi pè enggo mbuè saksi ipecènder. Perpodi kalohon lot mo dua kalak cènder mi lebbè.

61Nina mo, "Idokken kalak ènda, boi ngo irumpakken Bages Dèbata, janah ndorok nola ipecènder ibagasen tellu ari."

62Nai cènder mo imam huntuun idi, idokken mo taba Jesus, "Oda ngo ialoi Kono tukas sinidokkenna baMu idi?"

63Tapi sip sambing ngo ukum Jesus. Iulaki imam huntuun i mo sikali nai mendokken taba Jesus, "Merkitèken Dèbata singgelluh idi, dokken mo bai nami tuhu ngo kono Raja Sipaluah Anak ni Dèbata?"

64Ialoi Jesus mo, "Bagi ngo nimu. Tapi percaya mo kènè, mulai bagèndari nai idahen ndènè mo Anak Jelma idi kundul i kamuhun Dèbata Pergegoh Sisotercodi janah roh merkitè-kitè hembun i langit!"

65Nai mènter iribakken imam huntuun idi mo olesna, ninganna idokken, "Ilèai Ia ngo Dèbata! Oda perlu nè tulusen saksi. Karina kè enggo mendengkohken pengelèaina mi Dèbata.

66Bagèndari pè bakunè katè ndènè?" Ialoi kalak i mo, "Sah mo ia ihukum matè!"

67Nai icèduri kalak i mo abè Jesus janah iligasi. Lot mo dèba memarap.

68Ninganna idokken, "Bagahken bai nami alè Raja Sipaluah! Isè ngo simemarap Kono?"

69Kundul ngo si Petrus i ruar kasèan i. Roh mo sada kalak daberru, naposo imam huntuun idi, nina mo taba si Petrus, "Kono pè dekket ngo dengan Jesus kalak Galilea idi?"

70Tapi iperso si Petrus ngo i hadeppen ni kalak i. "Kadè ngo nimu, oda kubettoh i!" nina si Petrus.

71Nai laus mo si Petrus narih mi pèntu kasèan, iidah sada kalak naposo daberru sidèbanna mo ia janah mendokken taba jelma ni sidi, "Rebbak ngo ndai kalak ènda dekket Jesus i Nazaret nai."

72Memerso dèng ma mo si Petrus janah mersumpah. "Tuhu-tuhu ngo oda kutandai ia!" nina si Petrus.

73Oda ndekkah nèngè kessa bagidi, roh mo mendahi si Petrus kalak si cènder ni sidi janah mendokken, "Pasti kono ngo sada kalak bai kalak i nai, ai kennataan ngo arap permongkammu!"

74Nai mersumpah-sumpah mo si Petrus mendokken, "Oda kutandai kalak i!" Nai mènter gejapkenna i mo takuak manuk.

75Ièngèt si Petrus mo nidokken Jesus tabasa, "Sinderrang madèng takuak manuk berngin èn, enggo iperso kono Aku tellu kali, mendokken: Oda itandai kono nimu Aku." Nai laus mo si Petrus, tangis mo ia kerna bonekna soh mi ruar.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran