Alkitab Mobile SABDA
[VER] : [GULLAH]     [PL]  [PB] 
 <<  2 Tesalonika 2 >> 

De Wickity One wa da Fight God

1Now den, we wahn fa taak ta oona bout wen we Lawd Jedus Christ gwine come back an geda we all togeda fa be wid um. We Christian bredren, we da beg oona,

2mus dohn leh nobody confuse oona noway, needa leh um git oona opsot all ob a sudden cause dey da say dat de Day ob de Lawd done come. Wen somebody tell oona dat een a bision e done see de Lawd come, o wen somebody say e done yeh say dat e done come, o dat e yeh say we done write dat een a letta, oona mus dohn bleebe um.

3Mus dohn leh nobody fool oona nohow. Cause dat Day ob de Lawd ain gwine come til de time ob de las rebellion ginst God, wen heapa people gwine ton ginst God. An dat day ain gwine come needa til de man wa da fight ginst God een ebry way appeah. God done mek plan fa sen dat wickity man ta e ruint faeba een hell.

4Dat man wa da fight God, e gwine fight ginst all de sperit an ting dem dat people call dey god an dat dey bow down ta an woshup. E gwine pit esef op high, da say e got mo powa den all ob dem ting dey. An e eben gwine seddown een God House an tell ebrybody dat e God.

5Oona memba, ainty? Wen A stillyet been dey wid oona, A beena tell oona bout all dat.

6An oona know wa da keep de man wa da fight God fom come yet so dat wen de right time come, dat man gwine appeah.

7Bot already dat same powa wa da wok een dat man, e da wok so dat plenty people da do dem ting wa God say we ain oughta do. An wa God done show dat oda people ain know, dat we mek we able fa ondastan dis. Bot all dat wa gwine happen, ain gwine happen til God tek way de one wa da keep um fom come.

8Dat de time wen de one wa da fight God gwine appeah. Bot de Lawd Jedus gwine kill dat one wid de bret wa come outta e mout. De bright glory way ob de Lawd Jedus wen e come back, dat gwine stroy dat one.

9Satan gwine mek dat one wa da fight God, come, an e gwine wok een um fa gim all de powa e need. Dat one gwine mek people fool, da confuse um wid de plenty lyin miracle an wondaful sign an wok e gwine do.

10E gwine do all kind ob ebil ting wa gwine ceebe dem wa gwine be loss. Dem people, dey gwine be loss cause dey ain wahn fa lob de trute so dat dey kin git sabe.

11Cause ob dat, God gwine sen a powa wa ceebe people an wa ain gwine leh um tink scraight, so dat dey gwine bleebe de ting wa ain true.

12An dat wa gwine mek God condemn all ob dem wa ain bleebe de trute, bot beena lob fa do wickity ting.

God Done Pick Oona fa Sabe Oona

13We Christian bredren, oona wa de Lawd lob, we mus tell God tankya fa oona all de time. Cause fom de fus, God done pick oona fa sabe oona by de powa ob de Holy Sperit fa mek oona come fa be God own holy people, an fa sabe oona by oona fait een de trute.

14God call oona fa be e own people shru e Good Nyews wa we tell oona. Dat so oona gwine git oona paat een dat same glory way ob we Lawd Jedus Christ.

15So den, we Christian bredren, oona mus stan scrong een de Lawd. All de time oona haat mus hole on ta all de trute wa we been laan oona, wen we been dey da taak ta oona an wen we write letta ta oona.

16We pray dat we Lawd Jedus Christ an God we Fada, wa lob we an een e mussy mek we git courage faeba an mek we all de time able fa look fowaad ta good ting,

17courage oona haat an mek oona scrong fa do an fa taak all wa good fa true.


  Share Facebook  |  Share Twitter

 <<  2 Tesalonika 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran