Alkitab Mobile SABDA
[VER] : [GULLAH]     [PL]  [PB] 
 <<  Filipi 4 >> 

Paul Tell God People wa Dey Oughta Do

1Me Christian bredren, wa A lob, fa true, A wahn fa see oona. Oona me joy an me payback fa me wok! Now den, me deah bredren, pon all dat A beena say ta oona, oona mus stanop scrong as oona da lib altogeda one wid de Lawd.

2Euodia an Syntyche, A da beg oona, do ya please, try fa gree togeda all de time like sista een de Lawd.

3An ya too, wa da wok longside me fa true, A beg ya fa hep dem two ooman yah, cause dey beena wok han ta han wid me, da tell mo an mo people de Good Nyews. Clement an all de odares ob dem wa beena wok longside me, dey tell plenty people de Good Nyews too. An God done write down dey name dey een de book ob dem wa hab true life fom God.

4Oona oughta rejaice all de time as oona lib jine togeda wid de Lawd. A da tell oona gin say, “Oona oughta rejaice!”

5Leh all people see dat oona kin beah wid people. De Lawd nigh.

6Mus dohn leh nottin warry oona. Steada dat, oona oughta pray ta God bout all ting. Wen oona da pray, aks um fa wa oona need an tell um “Tankya.”

7So den, God peace, wa we ain eben able fa ondastan, dat peace ain gwine leh nottin warry oona so dat oona haat an oona mind gwine be safe, cause oona one wid Christ Jedus.

8Me Christian bredren, las ob all, A da tell oona dat oona mus keep on da study all de time bout jes dem ting wa good mo den all an wa people oughta gii praise fa. Study bout dem ting wa true, dem ting wa honorable, dem ting wa right een God eye, dem ting wa ain neba mek people sin, dem ting wa mek ya wahn fa lob um, an dem ting wa people know fa be good fa true.

9Oona oughta keep on da do dem ting wa A done laan oona. Mus do wa A beena tell oona fa do an wa oona see dat A da do. An God wa da gii we peace, e gwine be dey wid oona.

Paul Tell God People “Tankya” fa wa Dey Gim

10A da rejaice fa true as A lib da waak wid de Lawd, dat atta such a long time, now oona da show gin hommuch oona cyah fa me, da wahn fa hep me yah. Fa true, A know dat oona ain beena stop fa cyah fa me, bot fa a wile oona jes ain git no chance fa show dat oona cyah.

11A ain da say dat cause A hab need. Cause A done laan fa be sattify. Ain mek no diffunce wa happen.

12A know how fa lib wen A ain got nuff fa mek um. An A know how fa lib wen A hab mo den A need. A done laan dis secret, dat A kin be sattify all de time waeba happen. Ain mek no diffunce ef A got plenty fa nyam o ef A ain got nottin fa nyam. An ain mek no diffunce ef A got mo den nuff ting o ef A ain got nuff fa mek um. Waeba happen, A sattify.

13Ain nottin dat A cyahn do wid de hep ob Christ wa mek me scrong.

14Stillyet, oona done good fa hep me wen A been een trouble.

15Me Christian bredren een Philippi, oona know dat fom de time wen A come outta Macedonia, wen A jes beena staat fa tell people de Good Nyews, no oda choch ain hep me none tall. Jes oona beena gii me wa A need.

16An eben wen A been dey een Thessalonica, mo den one time wen A beena need sompin real bad, oona sen me um.

17Dat ain fa say dat A jes wahn oona fa gii me ting. Wa A wahn fa true, e fa oona fa git mo payback fa de mo good ting oona da do.

18Now den, oona done gii me mo den nuff. A got all dat A need now dat Epaphroditus done come gii me de ting wa oona sen ta me. Dem gif a offrin ta God wa smell sweet ta um, a sacrifice wa oona gii ta God, wa good een God eye an please um.

19Me God wa got all ting, wa walyable fa true, shru Christ Jedus, e gwine gii oona all dat oona got need ob.

20Leh we praise an gii hona ta we Fada God fa eba an eba. Amen.

Paul Greet God People een Philippi

21A da say hey ta all God people wa blongst ta Christ Jedus. De Christian bredren wa dey yah wid me da say hey ta oona too.

22An all God people yah, specially dem wa da wok een de house ob Caesar, dey da say hey ta oona.

23A da pray dat de Lawd Jedus Christ gwine keep on da bless oona.


  Share Facebook  |  Share Twitter

 <<  Filipi 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel