Alkitab Mobile SABDA
[VER] : [GULLAH]     [PL]  [PB] 
 <<  Lukas 22 >> 

Jedus Enemy Try fa Figga Out How fa Kill Um

1De time mos come fa de Feas ob Unleaven Bread, de Jew holiday wen dey nyam bread wa ain hab no yeast een um. Dey call dat de Passoba holiday.

2De leada dem ob de Jew priest an de Law teacha dem beena study dey head fa figga how fa kill Jedus dout nobody find out bout um. Cause dey been scaid ob de people.

Judas Gree fa Sell Jedus ta E Enemy

3Den Satan tek hole ta Judas wa dey call Iscariot. E been one ob de tweb ciple.

4So Judas gone off an taak ta de priest leada dem an dem offisa ob dem wa gyaad God house. Judas taak ta um bout how e kin hep um ketch Jedus.

5De leada been glad fa yeh dat, an dey offa fa pay Judas money fa do um.

6Judas gree ta dat. An e staat fa saach fa way fa han Jedus oba ta um. Dey wahn fa do dat wen dey ain gwine be no crowd ob people roun fa know bout um. So Judas look fa dat.

Jedus Dem Git Ready fa de Passoba Suppa

7Jurin de Feas ob Unleaven Bread, de day come wen dey haffa kill de lamb fa mek sacrifice ta God. Dey kill de lamb so dat all de fambly dem kin nyam um an memba de Passoba, de time wen God done bring e people outta Egypt lan.

8So Jedus call Peter an John an tell um say, “Oona go git de Passoba food ready fa we fa nyam.”

9Dey aks um, “Weh ya wahn we fa git um ready?”

10Jedus ansa um, “Wen oona go eenta de city, oona gwine meet a man wa da tote a big jug ob wata. Oona mus folla dat man an go eenta de house weh e go.

11Oona tell de man wa own dat house say, ‘De Teacha da aks ya weh de room weh e an e ciple dem gwine nyam de Passoba suppa?’

12De man gwine show oona a big room opstair, wid all wa we need dey. Mus git de food ready dey.”

13Peter an John gone ta de city, an dey find all de ting jes like Jedus tell um. So dey git de food ready fa nyam de Passoba suppa.

Jedus Dem Nyam de Passoba Suppa

14Wen de time come fa de Passoba suppa, Jedus come ta de table an e tweb postle long wid um.

15Jedus tell um say, “A beena wahn fa nyam dis Passoba suppa wid oona real bad fo A suffa.

16Cause A da tell oona, A ain gwine nyam um gin til all wa de Passoba stan fa come true, wen God gwine rule oba all ting een dis wol.”

17Jedus tek de cup ob wine an e tank God. Den e say, “Oona pass dis cup roun an leh all oona drink some de wine.

18Cause A da tell dat atta dis suppa, A ain gwine drink wine no mo til God rule oba dis wol.”

19Jedus tek some bread an tank God. Den e broke de bread op, gim ta e postle dem. E say, “Dis bread me body wa A gii ta God fa oona sake. Oona mus nyam um fa memba me.”

20Same way, atta de Passoba suppa, Jedus tek de cup ob wine an gim ta e postle dem. E say, “De wine een dis cup, e de nyew greement tween God an e people. A da mek dat greement come true wid me blood, wen A gree fa leh people kill me fa oona sake.

21“Bot look yah! De poson wa gwine sell me, han me oba ta dem people wa wahn fa kill me, e da nyam wid me! E han right yah on de table wid me!

22De Man wa Come fom God gwine dead like God done cide um. Bot e gwine be real bad fa dat man wa da han um oba ta dem wa gwine kill um!”

23Den de postle dem staat fa aks one noda say, “Wish one ob we gwine do dis ting wa Jedus taak bout?”

Who dat Great de Mores?

24De ciple dem staat fa aagy wid one noda bout wish one ob dem dey oughta tink e great de mores.

25Jedus tell um say, “Dey een de wol, de king dem hab chaage oba all dey people. An dem people call dey rula ‘De People Fren.’

26Bot oona mus neba be like dat, stead ob dat, de poson wa great de mores mongst oona mus be like de nyoungis. An oona leada mus be like de one wa da saab.

27Ef oona hab two people, one wa seddown ta de table fa nyam, an de oda poson wa da saab um, wish one great de mores? Dat de poson wa da seddown ta de table, ainty? Bot A stan mongst oona like a poson wa da saab.

28“Oona beena stay wid me, faitful jurin all me haad time.

29Me Fada done gii me tority fa rule oba people. Same fashion, A gwine gii oona tority fa rule.

30Oona gwine nyam an drink ta me table wen A da rule. An oona gwine seddown on trone fa jedge de tweb tribe ob Israel.”

Jedus Say Peter Gwine Say E Ain Know Um

31“Simon, Simon, listen! Satan done git pamission fa test all ob oona fa separate de good fom de bad, like a faama separate e grain fom de chaff.

32Bot A done pray ta God fa ya, Simon, dat ya fait een me wohn gii out. An wen ya done ton back ta me, ya mus hep ya broda dem git mo scronga.”

33Peter ansa Jedus say, “Lawd, A ready fa go wid ya ta de jailhouse an fa dead wid ya too!”

34Jedus tell um say, “A da tell ya, Peter, fo de roosta crow tonight, ya gwine say shree time dat ya ain know me.”

Now Oona Mus Tek Oona Money an Bag an sode Wid Oona

35Den Jedus aks e ciple dem say, “Dat time wen A sen oona fa go an tell de Good Nyews, A done chaage oona dat oona mus dohn tek no money, no bag needa no shoe. Oona ain hab need ob nottin jurin dat time, ainty?” Dey ansa um, “No, we ain hab ob need nottin den.”

36Den Jedus tell um say. “Bot now, ef oona hab money eeda a bag, mus tek um wid oona. An ef oona ain got no sode, mus sell oona coat an buy um.

37Cause A da tell oona, wen de prophet write een God Book say, ‘People tink dat e one ob dem wicked people,’ e beena write bout me. Dat mus come true bout me. All wa God wod say bout me da happen, fa true.”

38De ciple dem say, “Look, yah, Lawd! We hab two sode.” Jedus ansa um say, “Dat nuff!”

Jedus Pray at de Mount ob Olib

39Jedus lef de city an gone ta de Mount ob Olib, jes like e nyuse fa do. An de ciple dem gone long wid um.

40Wen e git ta de place, e tell um, “Oona mus pray ta God so dat wen Satan tempt oona, oona ain gwine fall eenta sin.”

41Den Jedus lef um an gone a leetle bit foda, bout one hundud foot way. An e kneel down an pray ta God.

42E say, “Fada, ef ya gree, do please, dohn mek me drink dis cup ob suffrin. Stillyet, ya mus dohn do wa A wahn. Mus do wa ya wahn fa do.”

43Den one angel come outta heaben ta Jedus an gim scrent.

44Jedus beena suffa tommuch, an e pray eben mo haada. E sweat been like blood wa da drop down ta de groun.

45Wen Jedus git op fom e pray, e gone back ta de ciple dem. Bot e see dat dey da sleep. Dey dat tired, cause dey haat been too hebby.

46Jedus tell um say, “Oona ain oughta be da sleep, ainty? Git op an pray ta God so dat wen Satan tempt oona, oona ain gwine fall eenta sin.”

Jedus Enemy Dem Tek Um

47Wiles Jedus beena taak, a crowd come op. Judas, one ob de tweb ciple, beena lead de people. An e come op ta Jedus fa kiss um.

48Bot Jedus aks um say, “Judas, fa true, wid a kiss ya da han de Man wa Come fom God oba ta e enemy dem?”

49Wen de ciple dem wa been wid Jedus see wa bout fa happen, dey aks Jedus say, “Lawd, kin we fight dem wid we sode?”

50An one dem ciple tek e sode an scrike de man wa wok fa de head man ob de Jew priest dem. E cut de right yea ob dat wokman off.

51Bot Jedus chaage e ciple dem say, “Dat nuff. Oona stop dat!” E tetch de wokman weh e yea done been an mek de yea come back gin.

52Jedus aks de leada dem ob de priest an de leada dem wa beena gyaad God house an de oda Jew leada dem wa done come dey fa git um, e say, “Oona haffa come yah fa git me wid sode an stick like A been a robba?

53A been wid oona ebry day een God house, an oona ain try fa grab hole ta me. Bot dis de time wen God gree fa leh oona tek me, now wen Satan, wa da rule oba ebil, e dey een chaage.”

Peter Say E Ain Know Jedus

54Dey grab hole ta Jedus an tek um ta de head man ob de Jew priest dem, eenta e house. Peter folla long hine um bot e ain git close ta um.

55Now a fire been light dey een de middle ob de head man yaad, an people beena seddown roun dat fire. So Peter gone an jine um.

56One de gyal dem wa da wok dey see Peter da seddown dey, wid de fire light da shine on um. Dat gyal study Peter good fashion an tell de people dey, say, “Dis man too been wid Jedus!”

57Bot Peter say dat ain so. E tell um say, “Ooman, A ain eben know dat man!”

58Atta wile, a man beena watch Peter. Dat man say, “Ya one ob dem wa been wid Jedus dem too!” Bot Peter ansa say, “Man, A ain!”

59Atta bout one hour, noda man tell de people say, “Fa true, dis man yah been wid Jedus. Cause e come fom Galilee too.”

60Peter ansa um say, “Man, A ain know wa ya da taak bout!” Dat same time wen e beena say dat, a roosta crow.

61De Lawd ton roun an look scraight at Peter. An Peter memba dat de Lawd done tell um say, “Fo de roosta crow taday, ya gwine say shree time dat ya ain know me.”

62Peter gone outta de yaad an e cry real haad.

Dey Beat Jedus an Hole Um Cheap

63De sodja dem wa beena gyaad Jedus da mek fun ob um an beat um.

64Dey tie a rag oba e eye. Den dey knock um an say, “Ef ya a prophet, guess who dat knock ya? Tell we!”

65An dey tell Jedus plenty oda ting fa sho dey hole um cheap.

Dey Tek Jedus ta de Jew Council

66Wen day clean, dey hab meetin ob de Jew Council. De people leada dem, de leada dem ob de priest, an de Law teacha dem geda togeda. De sodja dem tek Jedus fo dat Council.

67De people ob de Council chaage Jedus say, “Ef ya de Messiah, ya mus tell we.” Jedus ansa um say, “Ef A tell oona, oona ain gwine bleebe me.

68An ef A aks oona a queshon, oona ain gwine ansa me.

69Bot fom now on, de Man wa Come fom God gwine seddown ta de right han ob God, wa hab all powa.”

70All de people wa da jedge um een de Council aks um say, “Well den, ya God Son?” Jedus ansa um say, “Oona right wen oona say dat.”

71Den de people wa da jedge um say, “We ain need no mo people wod ginst um. Wid we own yea we done yeh wa e say!”


  Share Facebook  |  Share Twitter

 <<  Lukas 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran