Dual Panel1Well den, wa good e da fa be a Jew? Wa good e da fa be circumcise?
2A tell oona say, dat dey plenty good ting fa de Jew dem een ebry way! Fus off, God gii e wod ta de Jew dem so dey gwine keep um an tell oda people.
3Some dem Jew ain do wa God wahn um fa do, ainty? Dat ain mean dat cause ob dat, God ain gwine keep ta e wod.
4Fa true, dat ain so tall! God gwine keep ta e wod fa sho, eben ef all people da lie. Jes like dey done write een God Book, say, “Ebry time God da taak, people see dat waeba e say, dat right, fa true. God gwine win out oba ebrybody wa cuse um.”
5Bot wa ef de ebil we da do show eben mo betta dat God da do right. Wa we gwine say ta dat? Kin we say dat God ain do right wen e punish we fa de ebil we do? (A da taak yah like people taak.)
6Dat ain so! Ef God ain do right, den fa sho e cyahn jedge de people ob de wol, ainty?
7Bot some people kin aagy say, “Ef de lie A da lie gwine show eben mo betta dat God da taak true, an dat mek people gim mo glory, hoccome God stillyet condemn me, da say dat A a sinna?”
8So den, people kin say, “Leh we do ebil so dat good gwine come outta dat ebil we do.” Fa true, some people da lie, da say A say dat! God gwine condemn dem people wa da tell lie pon me like dat, an e right fa condemn um.
De Law Mek People Know Dey Sin
9Well den, wa we kin say? We Jew people, we betta een God eye den dem oda people wa ain Jew? No, we ain no betta, eben a leetle bit! Cause A done show oona dat sin da rule oba all people, oba de Jew people, an oba dem wa ain Jew.
10Jes like dey done write down een God Book say: “Ain nobody wa stan right een God eye, ain eben one poson.
11Ain nobody wa da ondastan wa right, fa true. An ain nobody wa da try fa come close ta God fa know wa e wahn.
12All people done ton dey back pon God. Ain none ob um wot nottin no mo. Ain nobody wa da do wa right. Ain eben one.
13De wod dem wa come outta dey mout, dey bad fa true, like de bad smell ob a open grabe. All de time dey mout da taak ceitful lie, wod wa da kill, like snake poison, fom dey mout.
14Dey mout full op wid bad an bitta cuss wod.
15Dey ron quick so dey kin haam people an kill um.
16Ebryweh dey go, dey stroy an mek people suffa.
17Dey ain know nottin tall bout de way ob people wa got peace een dey haat.
18Dey ain neba laan fa hona God. Dey ain feah um needa.”
19Now den, we know dat ebryting wa done been write een de Jew Law da taak ta dem people wa spose fa lib coddin ta dat Law. De Law dey so dat nobody kin say e ain know wa right fa do an so dat all de people een de whole wol gwine haffa ansa ta God fa wa dey do.
20So e ain cause a poson do wa de law say e haffa do, dat gwine mek dat poson right een God eye. Steada dat, de Law dey fa mek people know dey sin.
De Way God Done Mek Ebryting Right
21Bot now God show we de way e done mek ebryting right twix esef an all de people een de wol. An dat ain coddin ta de Law, eben dough wa de Law say an wa de prophet dem beena say, dey da tell we bout dat way.
22God mek ebryting right twix esef an people ef dey bleebe pon Jedus Christ. God do dat fa all people wa bleebe pon Jedus, fa de Jew people an fa dem people wa ain Jew. Cause dey ain no diffunce tall tween um.
23All people beena sin an ain able fa do right nuff fa medja op ta God glory.
24Bot God show we e blessin, fa mek ebryting right twix um an all people. E done dis wen Christ Jedus buy all people wid e blood fa mek um free fom sin.
25God pick Jedus an sen um fa sacrifice e life een we place. An wen Jedus done dead fa we sin, dat de way God paadon people sin wen dey bleebe pon um. Een dis way, God show dat fa true e da do wa right all de time. Op til now e beena pit op wid people sin.
26Bot now God ain pit op no mo wid people sin. Wen Jedus dead fa we sin, e show dat e right. E da do wa right all de time. E show dat fa true e mek ebryting right twix esef an ebrybody wa bleebe dat Jedus done dead een dey place.
27So den, wa we kin brag bout? Ain nottin we kin brag bout, ainty? Hoccome we cyahn brag? We cyahn brag cause we da do wa de Law tell we fa do, an dat mek ebryting right tween God an we, ainty? No, fa sho we cyahn brag, cause ebryting ain right twix God an we jes cause we do wa de Law tell we fa do. Ebryting right tween God an we cause we bleebe.
28So den, we know fa sho dat ebryting right tween God an we cause we bleebe, jes dat. Ain cause we da do wa de Law tell we fa do.
29An God ain dey jes fa de Jew people. Ain e dey fa dem wa ain Jew too? Fa true, e dey fa de Jew an fa dem wa ain Jew.
30Dey jes one God an no mo, fa de Jew dem an fa dem wa ain Jew. An e gwine mek ebryting right tween dem an de Jew people, ef dey bleebe pon Jedus. E gwine mek ebryting right twix esef an de people wa ain Jew too, ef dey bleebe pon Jedus.
31Dat mean fa say dat cause we bleebe pon Jedus, we say de Law ain mean nottin ta we? No, dat ain true tall! We ain gwine push de Law ta one side. Steada dat, wen we bleebe pon Jedus, we sho dat de Law mean sompin fa sho.