Alkitab Mobile SABDA
[VER] : [GULLAH]     [PL]  [PB] 
 <<  Yohanes 12 >> 

Mary Pour Pafume Pon Jedus Foot

1Six day fo de Passoba holiday staat, Jedus gone ta Bethany, weh Lazarus lib. Dat de man wa done dead an Jedus mek um git op fom e tomb, an lib gin.

2Some ob Jedus fren dey beena cook suppa fa hona Jedus. Martha da hep fa saab de food, an Lazarus one ob de people wa da seddown long side de table wid Jedus.

3Wen dey da nyam, Mary git a whole pint ob pafume. Dey mek dat pafume fom jes de nard plant, an e cost a whole heapa money. Mary pour dat pafume pon Jedus foot. Den e wipe um op wid e hair. All de people een de house da smell de sweet scent ob dat pafume.

4One ob Jedus ciple, Judas Iscariot wa been gwine ton Jedus een, e ain like wa Mary done.

5E say, “Hoccome dey ain sell dis pafume yah fa shree hundud silba coin, an gii de money ta de po people wa ain got nottin?”

6Judas ain say dat cause e beena wahn fa hep de people wa ain got nottin. E say dat cause e a tief. E beena keep de money bag fa Jedus an e ciple dem, bot e da tief some dat money fa esef.

7Bot Jedus say, “Mus dohn bodda dat ooman! E right dat e done keep de pafume fa pour pon me foot jes fo de day wen dey gwine bury me.

8Dem people wa ain got nottin gwine stay wid oona all de time. Bot A mesef ain gwine stay wid oona all de time.”

Dey Mek Scheme fa Kill Lazarus

9A big crowd ob Jew people yeh say Jedus dey een Bethany, so dey gone dey. Dey ain gone jes fa meet Jedus. Dey gone dey fa see Lazarus too. Dat de man wa done dead an Jedus mek um git op fom e tomb an lib gin.

10So de head man dem ob de priest beena mek scheme fa kill Lazarus too.

11Cause wen Jedus done mek Lazarus lib gin, a heapa Jew people beena lef dey leada dem an bleebe pon Jedus.

De People Praise Jedus Wen E Go Eenta Jerusalem

12De nex day, de big crowd wa done come ta Jerusalem fa de Passoba Feas, dey yeh say Jedus da come ta Jerusalem.

13So den, dey cut a whole heapa palm branch an gone out fa meet Jedus een de road. Dey beena holla say, “Praise God! God bless de one wa come een de name ob de Lawd! God bless de King ob Israel!”

14Jedus find a nyoung donkey, an ride pon um. All dis been jes like dey done write een God Book.

15E say, “Oona mus dohn be scaid, oona wa dey een Zion! Look yonda! Oona king da come, e da ride pon a nyoung donkey.”

16Wiles all dat been gwine on, Jedus ciple dem ain been ondastan wa dat mean. Bot wen God done mek Jedus git op outta e tomb an lib gin, an God gim hona an glory fa true, de ciple dem memba say, dis wod wa been write een God Book been bout Jedus. An dey see dat all wa been write down, e happen jes like God Book say.

17De crowd wa done been dey wid Jedus wen e call Lazarus fa come outta e tomb an mek um lib gin, dey beena spread de nyews bout wa happen.

18Dat mek a whole heapa people go out fa meet Jedus. Cause dey beena yeh say e done do dat miracle.

19Den de Pharisee dem tell one noda say, “See dey, we ain able fa do nottin! All de people da folla um!”

Some Greek People Come fa See Jedus

20Some Greek people been dey mongst de people wa gone fa woshup God een Jerusalem, wen de time fa de Feas come.

21Dem Greek gone ta Philip. E de one wa come fom Bethsaida, dey een Galilee. Dey tell Philip say, “Sah, we wahn fa see Jedus.”

22Philip gone an tell Andrew. An den, dem two gone an tell Jedus wa de Greek people wahn.

23Jedus ansa um say, “De time done yah wen God gwine show de true glory ob de Man wa Come fom God.

24A tell oona fa true, one seed ob wheat jes gwine stay one seed, ef e ain faddown an go eenta de groun an dead. Bot ef dat seed go eenta de groun an dead, e gwine grow an beah a whole heapa seed.

25De poson wa lob e own life gwine loss um. Bot ebrybody wa hate e own life een dis wol gwine keep e life faeba.

26De poson wa wok fa me, e haffa do wa A tell um fa do. De poson wa da wok fa me, e gwine stay wid me wehsoneba A da. Fodamo, me Fada gwine gii hona ta ebrybody wa da wok fa me.”

Jedus Taak bout E Det

27“Now me haat burden down, an wa A gwine say? A cyahn say, ‘Fada, sabe me fom dat hour wen A gwine suffa.’ Cause ob dis bery ting, A come eenta dis wol.

28Fada, mek people see dat dey oughta gii ya glory!” Den a boice speak fom outta heaben say, “A done beena mek people see dat dey oughta gii me glory an A gwine mek um see dat gin.”

29De crowd wa beena stan op dey yeh de boice, an dey say e da tunda. Oda people say a angel taak ta um.

30Bot Jedus say, “Dis boice yah ain taak fa sake ob me. E done taak fa oona sake.

31Dis de time now wen God gwine jedge all de people een de wol. An dis de time now wen e gwine win out oba de one wa da rule dis wol an dribe um out.

32Wen dey hice me op fom de groun, A gwine draw all people ta me.”

33Wen Jedus say dat, e beena tell bout how e gwine dead.

34De crowd ansa Jedus say, “We Law say, de Messiah ain gwine dead. E gwine lib faeba. Hoccome ya say e haffa happen dat dey gwine hice op de Man wa Come fom God? Who dat dis Man wa Come fom God?”

35Jedus tell um say, “De light gwine stay wid oona jes a leetle bit mo. Oona mus keep on da waak wiles de light dey dey, so dat de daak ain gwine meet oona wen oona da waak. Cause de one wa da waak een de daak ain know weh e da gwine.

36Now wen de light dey wid oona, bleebe pon de light, so dat oona kin be de kinda people wa stay een de light all de time.”

De Jew People Still Ain Bleebe

Atta Jedus say dat, e lef de people an gone ta a place weh dey ain able fa find um.

37Eben dough Jedus done beena do all dem miracle yah wa de people see fa deysef, dey still ain bleebe pon Jedus.

38All dis happen so dat de wod wa de prophet Isaiah done say, gwine come true. E done say, “Lawd, who dat wa been bleebe we wod? Who dat de Lawd show e powa ta?”

39De people ain able fa bleebe cause like Isaiah say dis yah too,

40“God done bline de people eye, an e done mek dey haat haad, so dat dey ain able fa see wid dey eye, an dey ain able fa ondastan wid dey haat, an dey ain ton ta me fa heal um.”

41Isaiah done say dem wod yah cause e done see how God gwine gii Jedus glory.

42Stillyet, eben heapa Jew tority dem done bleebe pon Jedus een dat time. Bot cause dey beena scaid ob de Pharisee dem, dey ain beena tell oda people dat dey bleebe pon Jedus. Dey beena scaid de tority dem gwine dribe um outta de Jew meetin house.

43Dey beena lob fa hab praise fom people mo den dey lob fa hab praise fom God.

Jedus Come fa Sabe

44Jedus taak een a loud boice say, “Ebrybody wa bleebe pon me, e ain jes bleebe pon me. E da bleebe pon de one wa sen me too.

45An wen somebody da look at me, e da see de one wa sen me.

46A done come eenta de wol like light, so dat ebrybody wa bleebe pon me, ain gwine stay een de daak.

47Wen somebody yeh me wod an ain do wa A da tell um, A ain gwine jedge um. A ain come fa jedge de people een de wol. A come fa sabe de people.

48Dey a jedge dey wa gwine jedge ebrybody wa ton e back pon me an wa ain wahn fa bleebe de wod wa A da say. Dem wod wa A done say gwine condemn dat one wen de las day come!

49Dat so e stan cause A ain jes da taak on me own. Me Fada wa sen me done chaage me, e tell me wa A haffa say an how A haffa say um.

50An A know dat de wod wa me Fada chaage me fa say, dat da mek people git life wa gwine las faeba. So den, wa me Fada tell me fa say, dat jes wa A da say.”


  Share Facebook  |  Share Twitter

 <<  Yohanes 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel