Alkitab Mobile SABDA
[VER] : [KARO]     [PL]  [PB] 
 <<  1 Raja-raja 12 >> 

Pemberontaken suku-suku si arah Utara (2Taw 10:1-19)

1Lawes Rehabeam ku Sikem, sabap nggo pulung kerina kalak Israel Utara i je guna ngerajaken ia.

2Kenca Jerobeam anak Nebat megi berita enda, mulih ia i Mesir nari. Gelgel e nggo ia lawes ku Mesir erkiteken lompat i bas Raja Salomo nari.

3Kalak Israel si ringan arah Utara nenahken ia, janah kenca si e ras-ras ia kerina lawes ndahi Rehabeam, janah nina man bana,

4"Mesera kal iakap kami ibahan bapandu Salomo, janah ibahanna mberat tanggungen kami. Adi ipenahangindu tanggungen si mberat enda janah adi ikurangindu dahin kami si mesera nggit kami patuh jadi rayatndu."

5"Reh ka kam ku jenda telu wari nari gelah kubereken jabapku man bandu," nina ngaloi. Emaka lawes kalak e kerina.

6Jenari isungkuni Rehabeam kalak si tertuan asa ia si gelgel nari nggo erdahin jadi penasehat bapana Salomo. "Kai akapndu jabapku man rayat enda?" nina nungkun.

7Nina ngaloi, "Adi atendu erdahin guna bangsa enda alu mehuli, berekenlah jabap si mehuli man bana sue ras pemindona, emaka tentu ia pe pagi tetap erdahin man bandu alu patuh."

8Tapi la iperdiatekenna pedah tua-tua e: lawes ia ndahi kalak si nguda si sebek-bek ras ia si genduari nggo jadi penasehatna.

9"Kai akapndu si mehulina kubahan?" nina nungkun. "Kai arus kukataken man rayat si mindo gelah tanggungenna ipenahangi?"

10Ngaloi ia kerina nina, "Enda me kai si arus ikatakenndu man bana, 'Belinen kap kidel-kidelku asa awak bapangku!'

11Kataken man bana, 'Itamaken bapangku tanggungen si mberat man bandu, terberaten denga ka kubahan asa si e. Iligasna kam alu purih, kuligas kam alu cambuk kuda!'"

12Telu wari kenca si e Jerobeam ras kerina bangsa e reh ka ndahi Raja Rehabeam, sue ras si nggo ikatakenna man bana.

13La iperdiateken raja pedah tua-tua janah alu kata meser ngerana ia man bangsa e,

14sue ras si nggo inasehatken kalak si nguda. Nina, "Bapangku namaken tanggungen si mberat man bandu, terberaten denga ka kubahan asa si e. Iligasna kam alu purih, kuligas kam alu cambuk kuda!"

15Peraten TUHAN kap njadiken kai si nggo ikatakenna man Jerobeam anak Nebat arah Nabi Ahia anak kuta Silo. Enda me sabapna maka la sitik pe bangsa e iperdiateken raja.

16Kenca idah bangsa emaka la nggit raja megiken pemindona, isurakina ia nina, "Man kade kami pe lang Daud ras keluargana! Kai kin si nggo pernah ibahanna man kami? O kalak Israel, ota mulih kita! Pelepas Rehabeam ngurus dirina jine!" Emaka berontak bangsa Israel.

17Daerah Juda nari ngenca tading jadi kerajan Rehabeam.

18Kenca bage Raja Rehabeam nuruh Adoniram, si ngurus kerja paksa, lawes ndahi kalak Israel, tapi ibenteri kalak ndai ia alu batu seh mate. Kenca jadi si enda, pedas-pedas Rehabeam nangkih ku das gereta perangna jenari lompat ia ku Jerusalem.

19Mulai i bas paksa e nari rayat si i bas kerajan Israel Utara nggo berontak ngelawan kesusuren Raja Daud.

20Kenca nggo ibegi bangsa Israel maka Jerobeam nggo mulih i Mesir nari, iundangna ia ku bas perpulungen bangsa e, jenari ibahanna ia jadi raja Israel. Suku Juda ngenca si patuh man kesusuren Daud.

Nubuat Nabi Semaya (2Taw 11:1-4)

21Kenca seh Rehabeam i Jerusalem, ipepulungna 180.000 tentera si Abisana i bas suku Juda ras Benyamin nari. Lawes atena erperang guna majekken kuasana mulihken i bas suku-suku Israel Utara.

22Tapi isuruh Dibata Nabi Semaya

23nehken kata enda man Rehabeam ras man kerina kalak i bas suku Juda ras Benyamin,

24"Ula iperangindu seninandu, bangsa Israel. Mulihlah kam kerina ku rumahndu. Kai si nggo jadi e, peratenKu kap." Kerina ia ngikutken pedah TUHAN janah mulih ia kerina.

Jerobeam nadingken TUHAN

25Ipeteguhi Jerobeam, raja Israel, benteng kuta Sikem i taneh deleng-deleng Eperaim janah i je me ia ringan kentisik. Kenca bage itadingkenna janah ipeteguhina ka kuta Penuel.

26Nina i bas ukurna, "Adi bagi si genduari enda kin, rayatku lawes ku Jerusalem, lako nehken persembahen i jah man TUHAN i bas Rumah Pertoton, sambar pagi ukurna, janah ikutkenna Rehabeam, raja Juda, jenari ibunuhna pagi aku."

27(1Raj 12:26)

28Kenca ia rukur kerna si e, ibahanna dua lembu emas, jenari nina man rayatna, "Nggo cukup ndekah kam lawes ku Jerusalem ersembah. O bangsa Israel, enda kap dibatandu si maba kam ndarat i Mesir nari!"

29Itamakenna lembu emas e sada i Betel sada nari i Dan.

30Emaka erdosa me bangsa e; lawes ia nembah i Betel ras i Dan.

31Tole ipajekken Jerobeam ka ingan-ingan ersembah i datas uruk-uruk, janah iangkatna imam-imam i bas suku Lewi nari.

Ukumen man kebaktin i Betel iberitaken

32Jenari itetapken Jerobeam ka sada wari raya agama i bas wari si pesepuluh limaken, bulan si pewaluhken, bali ras wari raya i Juda. I das batar-batar i Betel ibahanna persembahen man lembu emas si nggo ibahanna, janah itamakenna i Betel imam-imam guna ertugas i bas ingan-ingan ersembah si nggo ipajekkenna.

33Janah i bas wari si pesepuluh limaken, bulan si pewaluhken, i bas wari si nggo itentukenna, lawes ia ku Betel ibahanna persembahen i das batar-batar guna ngerayaken wari raya si nggo itetapken guna bangsa Israel.


  Share Facebook  |  Share Twitter

 <<  1 Raja-raja 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel