Alkitab Mobile SABDA
[VER] : [KARO]     [PL]  [PB] 
 <<  1 Raja-raja 1 >> 

Raja Daud metua

1Genduari Raja Daud nggo metua kal. Emaka aminna piga-piga lapis pe ibahan suruh-suruhenna cabinna, mbergeh denga akapna lalap.

2Emaka nina pegawaina man bana, "O Raja ma labo akapndu dalih bicara idarami kami sekalak singuda-nguda man temanndu si pekena-kena kam. Banci ia rembak medem ras kam gelah melas akapndu."

3Emaka idarami me i belang-belang Israel sekalak singuda-nguda mejile, janah ijumpai me i Sunem sekalak singuda-nguda si cocok, Abisah gelarna, emaka ibaba ia man raja.

4Singuda-nguda e seh kal jilena, janah ia jadi pelayan raja ras si pekena-kenasa, tapi raja la ersada kula ras ia.

Adonia nuntut gelah ia irajaken

5Genduari kenca Absalom nggo mate, anak Daud i bas ndeharana Hagit, si Adonia gelarna, eme anakna sintua si nggeluh denga. Ia sekalak dilaki mejile kal rupana. Ia la pernah ipandang Daud subuk kerna kai pe, janah merhat kal ia jadi raja. Isikapkenna guna dirina gereta ras kuda, ras si ngarakken ia rusur erdalan, lima puluh kalak teremna.

6(1Raj 1:5)

7Arih-arih ia ras Joap (nandena Seruya) bage pe ras Imam Abiatar, janah duana kalak enda setuju nampatisa nehken sura-surana e.

8Tapi Imam Sadok, ras Benaya anak Joyada, Nabi Natan, Simei, Rei, ras pengawal Daud la ikapitina Adonia.

9I bas sada wari Adonia erbahan persembahen. Igelehna biri-biri, jenggi lembu, ras anak lembu si mbur i Batu Nipe, deher ulu lau Enrogel. Iundangna kerina seninana ras pegawai-pegawai raja si asalna i Juda nari reh ku pesta man-man persembahen e,

10tapi seninana lain nande, Salomo, ras Nabi Natan, Benaya, ras pengawal raja la iundangna.

Salomo jadi raja

11Kenca bage idahi Natan me Batseba nande Salomo, jenari isungkunna ia, "La kin ibegindu Adonia anak Hagit nggo iangkatna man bana jadi raja? Janah Raja Daud sitik pe la meteh kerna si e!

12Adi keleng atendu kesahndu ras kesah anakndu Salomo, kupedahken man bandu:

13Minterlah kam lawes ndahi Raja Daud jenari sungkun ia, nindu, 'O, Raja, ma nggo kam erpadan man bangku maka anakku Salomo pagi nggantiken kam jadi raja? Ngkai maka Adonia nggo jadi raja?'"

14Jenari itambahi Natan katana nina, "Kenca bage, asum kam sangana ngerana denga ras Raja Daud, reh aku bengket janah kuesahken katandu e."

15Emaka lawes Batseba ndahi raja ku kamar inganna medem. Nggo metua kal ia, janah Abisah, singuda-nguda i Sunem nari pekena-kenasa.

16Mungkuk kal Batseba i lebe-lebe raja, jenari isungkuni raja ia, "Kai atendu?"

17Ngaloi ia, "O, Raja, kam nggo erbahan padan man bangku i bas gelar TUHAN Dibatandu maka anakku Salomo me jadi raja nggantiken kam.

18Tapi Adonia nggo jadi raja, janah kam sitik pe la itehndu kerna si e.

19Nggo igelehna mbue jenggi lembu, biri-biri, ras anak lembu mbur man persembahen, janah iundangna kerina anak-anakndu si dilaki, Imam Abiatar ras Joap puanglima tenterandu ku pesta man-man e, tapi anakndu Salomo la iundangna.

20O Raja, kerina bangsa Israel genduari sangana natap man bandu. Ikatakenndu dage man bana ise kin si tuhuna si nggantiken kam jadi raja.

21Adi la itetapkenndu genduari, kenca kam pagi mate la banci lang anakku Salomo ras aku minter iukum desken musuh bangsa enda."

22Asum Batseba ngerana denga Nabi Natan nggo seh i bas istana raja.

23Iberitaken man raja maka nabi e reh ku istana, lawes Natan ku bas, janah mungkuk kal ia i lebe-lebe raja.

24Kenca bage nina, "O Raja, nggo kin imomokenndu maka Adonia me pagi si nggantiken kam jadi raja?

25I bas wari si sendah enda kal, nggo ia lawes, igelehna melala jenggi lembu, biri-biri ras anak lembu si mbur man persembahen. Iundangna kerina anakndu si dilaki, Joap puanglima tenterandu, ras Imam Abiatar, janah genduari paksana ia kerina erpesta man-man ras Adonia janah ersurak nina, 'Mejuah-juah Raja Adonia!'

26Tapi aku, Raja, bage pe Imam Sadok, Benaya, ntah pe Salomo la iundangna.

27Setuju kin kam kerina si enda, janah la kin atendu iturikenndu sitik pe man pegawaindu ise si nggantiken kam jadi raja?"

28Nina Raja Daud, "Dilo Batseba bengket mulihken." Emaka reh ia tedis i lebe-lebe raja.

29Jenari nina raja man bana, "Erpadan aku man bandu erkite-kiteken TUHAN si nggeluh, si nggo mulahi aku i bas kerina kesusahenku nari,

30maka sendah ku sehken me padanngku si nggo nai kubahan man bandu i bas gelar TUHAN, Dibata kalak Israel, maka anakndu Salomo la banci lang nggantiken aku pagi jadi raja."

31Minter Batseba mungkuk, jenari nina man raja, "Nggeluhlah Tuanku Raja asa lalap!"

32Kenca bage isuruh Raja Daud gelah idilo Imam Sadok, Nabi Natan, ras Benaya. Kenca ia bengket kerina,

33ikataken raja man bana, "Babalah pegawai-pegawai istanangku ras kam. Suruh anakku Salomo ngersak kaldengku, jenari arakkenlah ia ku berneh ku ulu Lau Gihon.

34I je Imam Sadok ras Nabi Natan arus namaken minak ku takalna nangkuhken ia jadi raja Israel. Kenca bage embus terompet ersuraklah nindu, "Mejuah-juahlah Raja Salomo!"

35Arakken ka ia mulihken ku jenda gelah kenca seh kundul ia i bas kursi kinirajanku. Ia nggantiken aku jadi raja, sabap ia nggo kupilih ngerajai Israel ras Juda."

36"Jadi me bagi katandu e," nina Benaya ngaloi, "janah TUHAN Dibatandulah netapkenca.

37Bagi TUHAN nggo nemani Tuanku Raja, ia ka lah si nemani Salomo, janah ialah si erbahanca maka kinirajanna mulian asa kinirajanndu."

38Emaka Sadok, Natan, Benaya, ras pengawal-pengawal raja namaken me Salomo ku das kalde Raja Daud, jenari iarakkenna ku ulu Lau Gihon.

39Ibuat Imam Sadok ingan minak saitun si nggo ibabana i bas Kemah Perjumpan ras TUHAN nari, jenari iminakina Salomo. Iembus kalak ndai terompet, janah kerina rayat ersurak nina, "Mejuah-juahlah Raja Salomo!"

40Kenca bage iarakkenna mulih, janahna ersurak meriah ras ngembus suling, megang sorana seh maka taneh pe kumetter ibahanna.

41Asum Adonia ras kerina temuena nandangi elah man i bas pesta e, ibegina sora si megang e. Janah kenca ibegi Joap sora terompet e nungkun ia nina, "Sora kai nge si gejek i bas kota ah?"

42Ope denga ngerana, reh Jonatan, anak Imam Abiatar. "Mari kubasken," nina Adonia. "Kam kalak mehuli tentu kam maba berita si mehuli."

43"Labo," nina Jonatan ngaloi. "Tuanta Raja Daud nggo ngangkat Salomo jadi raja.

44Isuruhna Sadok, Natan, Benaya, ras pengawal-pengawal raja ngarakken ia. Kalak ndai namaken ia ku das kalde raja,

45jenari iminaki Sadok ras Natan ia i ulu Lau Gihon. Kenca bage lawes kalak ndai ku kota, ersurak-surak alu meriah, janah genduari rayat sangana ersurak-surak. Eme sora gejek si sangana ibegindu.

46Salomo kap genduari raja.

47Lebih asa si e, pegawai-pegawai istana nggo reh ndahi tuanku Raja Daud nehken pasu-pasuna janah nina: 'Dibatandulah si erbahanca maka Salomo lebih terberita asa kam, janah kinirajan Salomo lebih ermulia asa kinirajanndu.' Kenca bage Raja Daud mungkuk i bas inganna medem nembah.

48Janah ertoto: 'Sipujilah TUHAN, Dibata Israel, si sendah nggo erbahan sekalak i bas kesusurenku nari nggantiken aku jadi raja, janah nggo IbereNa aku nggeluh ngidahsa!'"

49Emaka mbiar kerina temue Adonia, keke ia kerina jenari lawes sekalak-sekalak nepet dalinna.

50Adonia, seh kal biarna man Salomo, lawes ku Kemah Perjumpan ras TUHAN jenari ijemakna tanduk batar-batar.

51Man Raja Salomo iberitaken maka Adonia mbiar man bana janah ia sangana njemak tanduk batar-batar nina, "Ersumpah min lebe Raja Salomo maka la atena munuh aku."

52Ngaloi Salomo, "Adi ia setia, selambar buk pe i bas takalna la banci ikuit, tapi adi lang la banci lang mate ia."

53Jenari Raja Salomo nuruh Adonia pesusur ia i das batar-batar nari. Lawes Adonia ndahi raja jenari mungkuk ia lebe-lebena, janah nina raja man bana, "Banci kam mulih ku rumah."


  Share Facebook  |  Share Twitter

 <<  1 Raja-raja 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel