Dual PanelPegawai Raja Salomo
1Salomo raja kerina Israel,
2enda me pegawaina si erpangkat meganjang: Imam si mbelin: Asaria anak Sadok.
3Sekretaris kerajan: Elihorep ras Ahiya, duana anak Sisa. Juru tulis ras nimpan surat-surat: Josapat anak Ahilut.
4Puanglima tentera: Benaya anak Joyada. Imam-imam: Sadok ras Abiatar.
5Kepala gubernur-gubernur daerah: Asaria anak Natan Penasehat raja: Imam Sabut anak Natan.
6Kepala pelayan istana: Ahisar Si ngurus kerja paksa: Adoniram anak Apda.
7Salomo ngangkat sepulu dua kalak gubernur daerah i negeri Israel. Gubernur-gubernur enda arus ngelitken pangan i bas daerahna nari guna raja ras kerina isi istana, i ja setiap kalak ertanggung jawab guna sada bulan i bas sada tahun.
8Si tersurat arah teruh enda me gelar-gelar gubernur si sepulu dua kalak ras daerah tugasna: Ben-Hur: taneh deleng-deleng Eperaim.
9Ben-Deker: Kota-kota Makas, Salbim, Bet-Semes, Elon, ras Bet-Hanan.
10Ben-Heset: Kota-kota Arubot ras Sako ras kerina daerah Heper.
11Ben-Abinadap, si ngempoi anak Raja Salomo, Tapat: kerina daerah Dor.
12Baana anak Ahilut: Kota-kota Taanak, Megido, ras kerina daerah deher Bet-Sean, deher kota Saretan, arah Selatan kota Jesreel, seh ku kota Abel Mehola ras kota Jokneam.
13Ben-Geber: Kota Ramat i Gileat, ras kota-kota i Gileat si jadi sikerajangen terpuk Jair, sekalak kesusuren Manase, ras daerah Argop i Basan, enem puluh kota kerinana, si ibentengi alu tembok ras jerijak tembaga i bas pintu gerbangna.
14Ahinadap anak Ido: daerah Mahanaim.
15Ahimas, si ngempoi Basmat, sekalak i bas anak-anak Raja Salomo: daerah Naptali.
16Baana anak Husai: Daerah Aser ras Kota Bealot.
17Josapat anak Para: daerah Isakar.
18Simei anak Ela: daerah Benyamin.
19Geber anak Uri: daerah Gileat, si nggo nai iperentah Sihon, raja kalak Amori ras Og raja Basan. I babo si sepulu dua kalak enda lit sekalak gubernur guna kerina negeri e.
Kemulian Raja Salomo
20Penduduk Juda ras Israel teremna bagi kersik i tepi lawit; cukup panganna ras inemenna, janah meriah akapna.
21Kerajan Salomo kerina bangsa i Lau Eprat nari seh ku taneh Pilisti ras ku perbalengen Mesir. Kerina bangsa e nggalar pajak man bana, dingen tetap i teruh kuasana kidekah ia nggeluh.
22Perbekalen si iperluken Salomo tiap wari lima ribu liter tepung si mejilena ras sepuluh ribu tepung biasa;
23sepuluh lembu mbur, dua puluh lembu si ipermakani i mbalmbal, ras seratus biri-biri; tambah si e lit denga ka belkih, balua, napuh, ras bangsa manuk si ipiara.
24Salomo erkuasa i belang-belang taneh si arah Barat Lau Eprat, mulai i Tipsah nari i tepi Lau Eprat seh ku kota Gasa. Kerina raja-raja si arah Barat Eprat lit i teruh kuasa Salomo, janah la ia rubat ras kerajan-kerajan isekelewetna.
25Kidekah ia nggeluh, kerina rayat i belang-belang Juda ras Israel nggeluh aman, tep-tep keluarga lit batang anggurna ras batang arana.
26Karang kuda Salomo lit empat puluh ribu, ipergunaken man ingan kuda si narik gereta perangna ras sepulu dua ribu kuda-ersaken tentera.
27Gubernur-gubernurna si sepulu dua kalak e, sekalak-sekalak i bas sada bulan si nggo itetapken man bana, ngelitken pangan si iperluken Raja Salomo ras man kerina kalak si man i bas istana. Kerina gubernur-gubernur e tetap ngelitken kai si iperluken.
28Bage pe gandum ras batang gandum guna kuda si narik gereta perang ras asuh-asuhen si deban, isikapken gubernur e sekalak-sekalak, i ja iperluken.
29Dibata mereken kepentaren mesangat ras perukuren si mbages man Salomo, ras pemeteh si la tersipati ganjangna.
30Kepentaren Salomo ngelebihi kerina kalak pentar i Timur nari ntah pe kalak pentar i Mesir nari.
31Ia me si pentarna i bas kerina manusia: pentaren asa Etan kalak Esrah, asa Heman, Kalkol ras Darda, anak-anak Mahol, janah terberita gelarna ku kerina negeri i sekelewetna.
32Isuratkenna telu ribu kuan-kuanen ras lebih seribu ende-enden.
33Ngasup ia ercakap kerna kayu-kayu ras sinuan-sinuan, mulai i bas batang pinus si merim si turah i Deleng Libanon nari seh ku dukut isop si turah i bas lingling. Ngasup ia ercakap kerna rubia-rubia, perik-perik, kerna rubia-rubia si njoler, ras nurung.
34Raja i belang-belang doni megi kerna kepentarenna, janah isuruh raja-raja e kalak megiken Salomo.