Alkitab Mobile SABDA
[VER] : [KARO]     [PL]  [PB] 
 <<  1 Timotius 1 >> 

1Surat enda i bas aku nari, Paulus, si nggo jadi rasul Kristus erdandanken isuruh Dibata Si Ngkelini kita ras Kristus Jesus pengarapenta.

2Surat enda man Timotius, anakku si tuhu-tuhu i bas kiniteken. Dibata Bapa ras Kristus Jesus Tuhantalah mereken lias ate, perkuah ate, ras kemalemen ate man bandu.

Pertenget nandangi pengarapen si papak

3Ateku min gelah tetap kam ringan i Epesus, bagi nggo kupindoken man bandu asum aku nerusken perdalanenku ku Makedoni. I Epesus lit piga-piga kalak si ngajar alu pengajaren si la tuhu. Pengadilah e.

4Suruh gelah ingadikenna ngajarken turi-turin si la tuhu bage pe terombo nini-nininta nai si la erpeltep-peltep, sabap si enda peturah perubaten saja ngenca janah la erguna nandangi rencana Dibata si ieteh kita erdandan kiniteken.

5Tujun perentahku enda guna mpekeke kekelengen si reh i bas pusuh peraten si bersih nari, i bas ukur si bujur nari, bage pe i bas kiniteken si tuhu-tuhu nari.

6Tapi lit piga-piga si nilah i bas tujun enda nari, papak ia erkiteken cakap si sia-sia.

7Sura-surana jadi guru Undang-undang Dibata, tapi cakapna pe la iangkana bage pe la iangkana kerna kai si ibelaskenna i bas kiniteken.

8Sieteh maka Undang-undang e mehuli, adi ipakeken bagi patutna.

9Arus pe i inget maka Undang-undang ibahan labo guna kalak si bujur, tapi guna kalak si ngelanggar undang-undang ras si erbahan jahat, la nandai Dibata, si erdosa, si la eragama dingen si la nggit rukur kerna pertendin, guna kalak si munuh nande-bapana, guna pemunuh-pemunuh,

10guna kalak si erlua-lua, dingen kalak si campur sapih-sapih ia dilaki, guna penculik, guna kalak perbual kesaksinna dingen kalak si la tuhu cakapna, bage pe guna kerina kalak si ndalanken perbahanenna la rikutken pengajaren si payo.

11Pengajaren si tuhu e lit i bas Berita Si Mehuli si ibereken man bangku guna iberitaken. Berita Si Mehuli e rehna i bas Dibata nari, e me Dibata si mulia si arus ipuji.

Ermengkah ate erdandanken perkuah ate Dibata

12Kukataken bujur man Kristus Jesus Tuhanta, si nggo mereken gegeh man bangku i bas aku ndahiken dahinku. Kukataken bujur man BaNa sabap metunggung IakapNa aku, ItangkuhkenNa aku jadi si ErdahinNa,

13aminna pe nai kucekuraki Ia kusiksa dingen kugombang-gombangi. Tapi mekuah ate Dibata aku, sabap paksa si e nai langa aku tek man Jesus Kristus janah la kuangka kai si kubahan.

14Iuseken Tuhanta man bangku lias AteNa si la erkeri-kerin radu ras kiniteken bage pe keleng ate si jadi sikerajangenta erdandanken persadanta ras Kristus Jesus.

15Kata si tuhu-tuhu si patut ialoken dingen tek kal kita e me, "Kristus Jesus nggo reh ku doni enda guna nelamatken kalak perdosa." I bas si e aku me si perdosana kal.

16Tapi erdandanken si e me maka mekuah ate Dibata aku, gelah Kristus Jesus banci ncidahken KesabarenNa si serta i bas nelamatken aku, kalak si mbelinna dosana enda. Janah si enda jadi usihen man kerina kalak si nandangi tek man BaNa dingen ngaloken kegeluhen si rasa lalap.

17Raja si rasa lalap, Dibata si sada, si rasa lalap, si la teridah, man BaNalah kehagan ras kemulian seh rasa lalap. Amin.

18O anakku Timotius, man bandu kusehken dahin enda. Si enda rikutken kata si nggo ndekah me inubuatken kerna kam. Bahanlah kata nubuat e jadi senjatandu asum kam erbebe kerna si mehuli.

19Tetaplah kam tek man Jesus Kristus dingen bersihlah pusuh peratenndu. Piga-piga kalak lit si la nggit megiken isi pusuh PeratenNa; janah kalak si bage ibunuhna kinitekenna.

20Jelmana e me Himeneus ras Aleksander. Si dua kalak enda nggo kuendesken man Iblis, guna ngajarken ia gelah ulanai ipebau-bauna Dibata.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran