Dual PanelJop ngaduken kiniseranna man Dibata
1Kedungenna ngerana Jop, isumpahina wari tubuhna. Nina,
2"O Dibata, sumpahilah wari tubuhku; sumpahilah berngi kejadinku.
3(Ayb 3:2)
4Salihkenlah wari e jadi gelap, o Dibata; ndigan pe ulanai inget wari e, ndigan pe ulanai pelepas terang ersinalsal ku je.
5Bahanlah wari e wari si geltem dingen gelap mesangat; tutupilah e alu embun mekapal, dingen sasapken matawarina.
6Sasapkenlah berngi e; ulanai kira i bas wari-wari bulan tah tahun.
7Bahan berngi e berngi si melungen; berngi i ja la lit keriahen.
8Suruh tukang sihir numpahi wari e, kalak si beluh merentahken nipe nagan.
9Ula pelepas bintang erpagi-pagi ersinalsal; ula bere pengarapen kerna matawari pultak erpagi-pagi,
10erkiteken ipelepasna aku tubuh, dingen ijemjemkenna aku kempak kesusahen ras ceda ate.
11Madin kuakap aku mate i bas bertin nandeku, ntah mate tupung paksa aku tubuh.
12Ngkai maka iampu nandeku aku? Ngkai maka ipepinemna aku?
13Adi mate aku tupung si e, tentu senang-senang kuakap genduari,
14medem bagi raja-raja ras menteri-menteri, si mulihi majekken istana-istana si adi.
15Jenari banci aku medem bagi anak raja-raja si ndemi rumahna alu emas ras pirak;
16ntah pe medem bagi anak si mate tupung tubuhna.
17I bas kuburen, kalak jahat ngadi erbahan jahat, dingen kalak si latih erdahin, ndatken pengadi-ngadin.
18Kalak tabanen pe ngenanami kedamen, lanai isergangi, lanai iperentah alu kata mesergi.
19Kalak si kugapa pe lit i je, si terberita ras si la itandai; budak-budak pe kedungenna bebas i je.
20Ngkai maka manusia ipelepas nggeluh i bas kiniseran? Ngkai maka ibereken terang man kalak si sangana erceda ate?
21Itimaina kematen, tapi lalap la reh, ulin akapna kuburen asangken erta si meherga.
22La atena malem adi langa ia mate, dingen ikuburken.
23Kai gunana manusia nggeluh, adi la terarapkenna wari si pepagi? Adi ikarangken Dibata nge ia?
24Nakan pe la terpan tapi tangis ngandung aku, ndehereng aku lanai terpengadi.
25Asa kai si kuaruken ras kubiari nggo tuhu jadi.
26La lit kedamen i bas aku, la lit kesenangen, kesusahenku lalap la erkedungen."