Dual PanelUndang-undang kerna kebadian ras keadilen
1Ikataken TUHAN man Musa,
2gelah ipesehna man perpulungen kalak Israel bagenda, "Badia lah kam, erkiteken Aku, TUHAN Dibatandu badia kap.
3Kerina kam arus mehamat man nande ras bapandu, janah arus nginget wari Sabat, bagi si nggo Kuperentahken. Aku kap TUHAN Dibatandu.
4Ula tundalken Aku, jenari erkusur nembah dibata-dibata si deban; ula bahan dibata-dibata si deban i bas logam nari. Aku kap TUHAN Dibatandu.
5Adi igelehndu asuh-asuhen man persembahen persadan, ikutken lah peraturen-peraturen si nggo Kubereken man bandu; emaka Kualoken persembahen e.
6Dagingna arus maka ipan i bas wari sanga asuh-asuhen e igeleh, ntah pe pepagina. Adi lit denga iba i bas wari peteluken arus maka itutung,
7sabap daging si bage pantangen. Janah adi lit kalak si manca, la Kualoken persembahen e:
8Si manca ersalah ia, erkiteken ipeserina pangan biasa ras persembahen si khusus man TUHAN, emaka lanai ia ikira jadi bangsangKu.
9Adi iperanindu jumandu, ula perani seh ku duru, janah ula nai ulihi perani ruhi page si tading-tading.
10Ula nai ulihi niar-niar kebun anggurndu guna pepulung anggur si tading ntah pe mumahi si nggo naktaken; tadingken e man kalak si musil ras man kalak si tandang. Aku kap TUHAN Dibatandu.
11Ula nangko, ntah nipu, ntah erbual.
12Ula kam erpadan i bas gelarKu adi labo atendu itepatindu padanndu e; perbahanen si bage njuruken gelarKu kap. Aku kap TUHAN Dibatandu.
13Ula kam cari kesempaten i bas ise pe, ntah ngerampuk ia. Ula tahan gaji kalak si erdahin ras kam, sada berngi pe ula.
14Ula sumpahi kalak pasek, ula amparken kai pe i lebe-lebe kalak pentang erbanca ia terkutuk. Mbiarlah man bangKu. Aku kap TUHAN Dibatandu.
15Bujur ras adillah pemutusenndu adi kam ngadili perkara kalak; ula kapiti kalak musil, ula mbiar man kalak bayak.
16Ula pebelang si la tuhu kerna ise pe; janah adi lit kalak si sangana iadili rutang kesah, ngerana lah adi kesaksinndu e banci nampati ia. Aku kap TUHAN.
17Ula buniken elem-elem i bas ukurndu man ise pe tapi tangkas ukur tangkas kata lah ndungi perjengilenndu ras ia, gelah ula kam erdosa erkiteken ia.
18Ula kam erbalas man ise pe, ntah pe tetap rate segat man bana, tapi kelengilah temanndu manusia, bali ras kam ngkelengi dirindu jine. Aku kap TUHAN.
19Patuhlah man perentah-perentahKu. Ula kawinkenndu asuh-asuhen si la sebangsa. Ula suan dua macam benih i bas sada juma. Ula pake paken adi dua macam kainna.
20Adi lit kalak si nggo erpadan ndayaken budakna diberu man kalak si deban gelah jadi ndeharana, tapi langa igalarina tukur budak e, jenari adi ersada kula empu budak e ras budak diberu e, la banci ia iukum mate, tapi duana ia iukum, sabap diberu e budakna denga kap.
21Ibaba dilaki e lah sada biri-biri bajarna ku pintun Kemah Perjumpan ku adep-adepenKu jadi persembahen penebusna.
22Gelah alu e imam ngelakoken lakon pembersihen guna ngalemi dosa kalak ndai, emaka ialemi Dibata ia.
23Adi nggo kam seh kerina i taneh Kanaan, jenari nuan batang kayu si erbuah, ntah batang kai gia e, pantangken lah buahna i bas telu tahun si pemena. I bas si telu tahun e la banci ipanndu buahna.
24Peempat tahunken, kerina buahna, endeskenlah jadi persembahen pengataken bujurndu man bangKu, TUHANndu.
25Tapi i bas tahun pelimaken, banci ipanndu buahna. Adi kerina si enda ilakokenndu la banci lang reh lalana buah batang kayundu. Aku kap TUHAN Dibatandu.
26Ula pan daging si lit denga darehna. Ula kam ertendung ntah pe erbahan kinigurun.
27Ula keret buk sekelewet takalndu, bage pe ula keret ujung janggutndu.
28Ula bahan gambar-gambar i bas dagingndu alu ncucukisa, bage pe ula lukai badanndu erkiteken lit si mate-matendu. Aku kap TUHAN.
29Ula njuruken anakndu si diberu alu mahan njadiken ia pendahinna erlua-lua i bas rumah persembahen kalak perbegu; adi bage perbahanenndu, nandangi nilah me kam ku dibata-dibata si deban, janah negeri e nandangi dem alu lagu langkah si nggesuh.
30Inget wari Sabat, dingen pehaga lah inganKu isembah. Aku kap TUHAN.
31Ula ngguru man guru si baso. Adi bage perbahanndu, lanai kam bersih rikutken aturen agama. Aku kap TUHAN Dibatandu.
32Mehamat lah man kalak si nggo metua, janah pehaga lah Aku. Aku kap TUHAN.
33Ula tokohi bangsa si deban si tading i bas negerindu.
34Bahanlah man bana bali ras man bangsandu jine, janah kelengilah ia bagi ikelengindu dirindu jine. Inget maka kam pe pernah kesilang i negeri Mesir. Aku kap TUHAN Dibatandu.
35Ula tipu kalak alu mpergunaken sibar-sibar, timbangen, ntah sukat-sukat si la payo.
36Pake lah sibar-sibar, ntah timbangen, ntah sukat-sukat si bujur. Aku kap TUHAN Dibatandu, si nggo maba kam i taneh Mesir nari.
37Patuhilah kerina undang-undang ras perentah-perentahKu. Aku kap TUHAN."