Dual PanelIturiken Jesus kerna keruntuhen Rumah Pertoton (Mrk 13:1-2; Luk 21:5-6)
1Ndarat Jesus i bas Rumah Pertoton nari. Asum Ia lawes nadingken Rumah Pertoton e, ideheri ajar-AjarNa Ia, jenari ituduhken ajar-ajar e man BaNa Rumah Pertoton.
2Nina Jesus man ajar-AjarNa, "Ma idahndu kin kerina enda? Kukataken man bandu: Kerina nge pagi runtuh, lanai sada batu pe pagi tading i bas inganna."
Kiniseran ras peniksaan (Mrk 13:3-13; Luk 21:7-19)
3Kenca kundul Jesus i Uruk Seton, reh ajar-AjarNa ndeheri Ia jenari ercakap-cakap ia ras. Nina ajar-AjarNa man BaNa, "Kataken min man kami: Ndigan kin kerina enda jadi? Kai nge pagi tanda-tanda KerehenNdu dingen kai nge pagi tanda-tanda kedungen jaman enda?"
4Erjabap Jesus, "Jagalah gelah ula kam papak ibahan kalak.
5Nterem pagi kalak reh i bas gelarKu nina, 'Aku kap Raja Penampat si ipadanken Dibata,' janah nterem ibahanna jelma papak.
6Ibegindu pagi sora perang ras berita kerna perang i bas ingan si ndauh. Amin bage gia ula aru atendu, sabap kerina si enda arus jadi, tapi e pe langa bo seh ku kedungenna.
7Bangsa pagi ngelawan bangsa, kerajan ngelawan kerajan. I jah-i je terjadi kelihen ras taneh pe linuren.
8Tapi kerina enda permulan denga nge, seri ras penggejapen mesui sanga kalak nandangi mupus.
9I bas paksa e pagi kerina kalak erate segat man bandu erdandanken Aku. Isiksana me kam jenari ibunuhna.
10Nterem pagi kalak murtad; si adun ras si cian-cianen.
11Rehen pe nabi palsu erbahanca nterem kalak papak.
12Perbahan reh buena kejahaten emaka nterem kalak reh kurangna kekelengenna.
13Tapi kalak si megenggeng seh ku kedungenna terkelin kap.
14Janah kenca Berita Si Mehuli kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e."
Perbahanen ngelawan Dibata (Mrk 13:14-23; Luk 21:20-24)
15"Idahndu pagi kejahaten si ciga ate encedai tedis i bas Ingan si Badia, bagi nggo ikataken Nabi Daniel. (Iantusi si ngogesa min kai erti kata enda!)
16Paksa si e pagi kalak si ringan i Judea arus kiam ku uruk-uruk.
17Kalak si kundul-kundul i darat pekesahken ulanai bengket ku rumah ngelegi barang-barangna.
18Kalak si sangana i juma ulanai ku rumah ngelegi uisna.
19O, andiko kuahna ate pernanden si sangana mehuli kulana bage pe pernanden si sangana pepinemken i bas paksa si e!
20Ertotolah man Dibata gelah si enda kerina ula jadi i bas paksa-paksa perudan tah pe wari Sabat!
21Sabap kiniseran si jadi paksa si e pagi ndauh keleken asa si nggo pernah jadi, mulai kin tembe doni seh ku wari enda, janah kenca si e lanai bo pagi lit kejadin si bage.
22Tapi beligan warina nggo ipegendeki Dibata; adi la kin nggo IpegendekiNa ise pe la bo lit terus nggeluh. Ipegendeki Dibata me wari kiniseran e nginget kalak si nggo IpilihNa."
23"Paksa si e pagi adi lit kalak si ngataken man bandu, 'I jenda kap Raja Penampat si ipadanken Dibata' ntah nina, 'I jah kap Ia', ula kam tek.
24Sabap reh me Raja Penampat palsu ras nabi-nabi palsu; ibahanna me tanda-tanda sengget si mbelin, sabap atena, adi banci, gelah papak kalak si nggo ipilih Dibata.
25Ingetlah! Kerina enda nggo leben Kukataken man bandu ope denga jadi."
26"Ntah pe, adi lit kalak ngatakenca man bandu, 'Kristus, Raja Penampat si ipadanken Dibata e genduari i taneh si melungun,' ula dahi ku je; ntah pe adi nina, 'I jenda Ia cebuni,' ula kam tek.
27Sabap Anak Manusia si isuruh Dibata e reh pagi bagi kilap erkincar i Timur nari ku Barat."
28"I ja lit bangke i je pulung kulik, si man bangke."
Kerehen Anak Manusia si isuruh Dibata (Mrk 13:24-27; Luk 21:25-26)
29"Kenca lepas wari-wari kiniseran e, minter gelap matawari, bulan la nai ersinalsal, bintang-bintang nartar i langit nari janah kuasa-kuasa si lit i langit mugur-ugur.
30Jenari teridah tanda Anak Manusia si isuruh Dibata i langit janah tangis kerina bangsa manusia i doni enda. Idahna me pagi Anak Manusia si isuruh Dibata e reh i datas embun; alu kuasa ras kiniulin si mbelin.
31Kenca bage terbegi me sora trompet si megang jenari IsuruhNa me malekat-MalekatNa ndarat ku belang-belang doni enda. Ipepulung malekat-malekat e me kalak si nggo ipilih Dibata i bas tampuk doni nari ku tampukna si deban."
Pelajaren i bas batang ara nari (Mrk 13:28-31; Luk 21:29-33)
32"Bahanlah batang ara jadi pelajaren man bandu. Adi idahndu dahanna meratah janah erbulung nguda ia, ietehndu maka musim perlego nggo ndeher.
33Bage me pe, adi idahndu pagi jadi kerina si Kukataken enda ndai, ietehndu me maka nggo ndeher kedungen doni enda.
34Ingetlah! Si enda pagi kerina jadi ope denga keri mate kalak si genduari enda.
35Langit ras doni masap kap pagi; tapi KatangKu tetap rasa lalap."
Ise pe la meteh warina ntah jamna (Mrk 13:32-37; Luk 17:26-30, 34-36)
36"Kerna warina ntah jamna kejadin e la lit kalak si metehsa. Malekat-malekat si i surga pe lang, janah Anak e pe lang; Bapa ngenca metehsa.
37Kerehen Anak Manusia si isuruh e pagi bali kap ras kai si jadi i bas paksa Nuah nai.
38Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu;
39sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e.
40Paksa si e pagi lit dua kalak dilaki erdahin i juma: sekalak pagi ibuat, janah si sekalak nari itadingken.
41Dua kalak diberu sangana nutu: sekalak pagi ibuat, sekalak nari itadingken.
42Emaka erjaga dingen ersikaplah, sabap la ietehndu ndigan Tuhanndu reh.
43Ingetlah! Adi ieteh tuan rumah katawari reh pinangko, tentu erjaga-jaga ia dingen la ipelepasna rumahna e ibongkar pinangko.
44Emaka kam pe erjaga-jagalah, sabap Anak Manusia si isuruh Dibata e reh i bas paksa si la iarapndu."
Perumpaman kerna juak-juak si tutus ras juak-juak si la tutus (Luk 12:41-48)
45"Adi bage, ise dage juak-juak si tutus dingen pentar? Ia me si ipercayaken tuanna jadi kepala juak-juak si deban guna mbagiken pangan man juak-juak e i bas paksana.
46Malem me ate juak-juak e adi idapeti tuanna ia sangana ndahiken dahinna.
47Kukataken man bandu: Tuhu-tuhu iangkat tuan e me ia jadi pengawas i bas kerina erta-ertana.
48Tapi adi la mehuli ukur juak-juak e tentu nina i bas ukurna, 'Tuanku ndekah denga nge maka mulih,'
49jenari ipekpekina juak-juak si deban, mangani dingen minem ia seh mabuk.
50Jenari reh me tuan e i bas paksa si la ietehna dingen la isangka-sangkana.
51Ibunuh tuan e me ia janah bali ia ibahanna ras kalak pekulah-kulah. I je tangis dingen mesui kal atena."