Alkitab Mobile SABDA
[VER] : [KARO]     [PL]  [PB] 
 <<  Matius 26 >> 

Rencana nangkap dingen munuh Jesus (Mrk 14:1-2; Luk 22:1-2; Yoh 11:45-53)

1Kenca dung ituriken Jesus si enda kerina nina man ajar-AjarNa,

2"Bagi ietehndu, dua wari nari irayaken me Wari Paskah, janah Anak Manusia persuruhen iendesken kalak me guna ipakuken ku kayu persilang."

3Paksa si e pulung imam-imam si mbelin ras peminpin kalak Jahudi i bas rumah Kayapas, Imam si Mbelin.

4Arih-arih ia kerina guna nangkap dingen munuh Jesus alu erbuni-buni.

5I bas ia arih-arih e nina, "Ula asum Wari Paskah Ia sibunuh, gelah ola guntar kalak si nterem."

Jesus iminaki i Betani (Mrk 14:3-9; Yoh 12:1-8)

6Asum Jesus i Betani i rumah Simon si nggo malem i bas penakit gadamen nari,

7reh sekalak diberu ndahi Ia. Ibaba diberu e sada botol mar-mar isin minak merim si meherga. Icurcurkenna minak e ku takal Jesus si sangana man.

8Ngidah si e ngeranai ajar-ajar nina, "Ngkai maka isia-siaken minak e?

9Adi idayaken meherga kap janah duitna e banci ibereken man kalak musil!"

10Ieteh Jesus kai si icakapken ajar-ajar e emaka nina, "Ngkai maka iganggundu ia? Ia nggo erbahan si mehuli man bangKu.

11Kalak musil lalap nge pagi ras kam, tapi Aku labo lalap ras kam.

12Sabap diberu enda nggo erbahan persikapen man bangKu alu ncurcurken minak ku dagingKu ope denga Aku ikuburken.

13Ingetlah! I japa pe pagi iberitaken Berita Si Mehuli i belang-belang doni enda, ituriken pe kerna perbahanen enda guna nginget ia."

Judas erpadan ndudurken Jesus (Mrk 14:10-11; Luk 22:3-6)

14Jenari sekalak i bas ajar-ajar si sepulu dua e, gelarna Judas Iskariot lawes ndahi imam-imam si mbelin.

15Nina man imam-imam si mbelin e, "Kai iberekenndu upahku adi kuendesken Jesus man bandu?" Minter ibereken imam-imam si mbelin e telu puluh duit pirak man Judas Iskariot.

16Emaka mulai i bas wari e idarami Judas dalan ndudurken Jesus.

Jesus ras ajar-AjarNa man roti Paskah (Mrk 14:12-21; Luk 22:7-14, 21-23; Yoh 13:21-30)

17I bas wari pemena Wari Raya Roti si la erragi reh ajar-ajar ndahi Jesus nina, "I ja sura-SuraNdu isikapken kami roti Paskah man BaNdu?"

18Ngaloi Jesus, "To lawes ku kuta njumpai si Anu, kataken man bana: nina Guru lanai ndekah waringKu. I bas rumahndu ateKu ras ajar-ajarKu ngerayaken Wari Paskah."

19Ikutken ajar-ajar kata Jesus e; isikapkenna pangan Paskah.

20Kenca gelap wari kundul Jesus ras ajar-AjarNa jenari man.

21Paksa man nina Jesus man ajar-AjarNa, "Kukataken man bandu: Si tuhuna sekalak i bas kam nari me si ndudurken Aku."

22Ceda ate ajar-ajar jenari pegancih-gancih ia nungkun man Jesus nina, "Ma labo aku KataNdu Tuhan?"

23Erjabap Jesus, "Si ncelupken roti ku bas pinggan raduken Aku, ia me si ndudurken Aku.

24Bicara kugapa pe mate nge Anak Manusia persuruhen Dibata e, sue ras si ikataken Pustaka Si Badia tapi andiko, cilaka kal si ndudurken Anak Manusia e. Ulin min nai la ia tubuh."

25Jenari ngerana Judas penghianat e nina, "Aku kin KataNdu Guru?" Ngaloi Jesus, "Bagi katandu eme!"

Lakon persadan si Badia (Mrk 14:22-26; Luk 22:15-20; 1Kor 11:23-25)

26Asum ia man denga kerina, ibuat Jesus roti, IkatakenNa bujur man Dibata, jenari icepik-CepikNa roti e, IberekenNa man ajar-AjarNa nina, "Buatken, panken, enda me dagingKu."

27Kenca bage IbuatNa calung, IkatakenNa bujur man Dibata, jenari IberekenNa man ajar-AjarNa nina, "Minemken, kerina kam tare calung enda.

28Enda me darehKu si ngesahken iketen padan si ibahan Dibata, si iamburken guna nterem jelma lako ngalemi dosana.

29Kukataken pe man bandu: Kenca wari enda lanai Kuinem lau anggur enda seh warina Aku ras kam nginem lau anggur si mbaru i bas Kinirajan BapangKu."

30Kenca Jesus ras ajar-AjarNa rende muji Dibata lawes ia kerina ku Uruk Seton.

Ikataken Jesus maka ipersoken Petrus pagi Ia (Mrk 14:27-31; Luk 22:31-34; Yoh 13:36-38)

31Jenari nina Jesus man ajar-AjarNa, "I bas berngi enda kiamen me kam kerina nadingken Aku, sabap lit tersurat i bas Pustaka Si Badia, 'Ibunuh Dibata me permakan e, jenari marpar kerina biri-biri e.'

32Tapi kenca Aku ipekeke Dibata i bas si mate nari leben Aku asa kam ku Galilea."

33Ngaloi Petrus man Jesus, "Kiam pe kalak enda kerina, aku labo nggit nadingken Kam!"

34Emaka nina Jesus man Petrus, "Ingetlah! I bas berngi enda, ope tekuak manuk nggo ipersokenndu Aku telu kali."

35Ngaloi Petrus, "Asa ndigan pe la Kam kupersoken, aminna gia terpaksa aku mate ras Kam!" Ajar-ajar si deban pe ngaloi bagi si ikataken Petrus enda.

Jesus ertoto i Peken Getsemane (Mrk 14:32-42; Luk 22:39-46)

36Jenari seh Jesus ras ajar-AjarNa ku sada ingan si igelari Getsemane. Nina Jesus man ajar-AjarNa, "Kundul kam i jenda, Aku ertoto lebe ku jah."

37Petrus ras duana anak Sebedeus IbabaNa. Paksa e ceda ate Jesus dingen getem kal PusuhNa.

38Emaka nina man ajar-AjarNa si telu kalak e, "Ceda kal ateKu perbahan Kugejap maka Aku nandangi mate. Timai i jenda janah erjaga-jagalah ras Aku."

39Lawes Jesus terdauhen sitik nari, i je erjimpuh Ia jenari ertoto man Dibata nina, "O Bapa, adi banci buat min calung kiniseran enda i bas Aku nari. Tapi labo peratenKu, PeratenNdulah jadi."

40Kenca bage mulihken Ia ndahi ajar-AjarNa si telu kalak ndai. IdapetiNa ajar-ajar e tunduh. Emaka nina Jesus man Petrus, "Sada jam pe la kam ngasup erjaga ras Aku?

41Erjaga dingen ertotolah gelah ola kam ndabuh ku bas percuban. Ukur manusia mehuli kap tapi kote kap dagingna!"

42Jenari lawes Jesus pedua kaliken ertoto nina, "O Bapa, adi la kin banci la Kuinem calung e, PeratenNdulah jadi."

43Mulihken ka Jesus ndahi ajar-AjarNa si telu kalak, IdapetiNa ajar-ajar e tunduh, perbahan madat kal matana.

44Ipelepas Jesus ajar-ajar e tunduh, lawes Ia petelu kaliken ertoto; PertotonNa bali ras si ndai.

45Kenca bage mulihken Ia ndahi ajar-AjarNa si telu kalak e, nina, "Tunduh dingen pekesahken denga kam? Nehenlah! Nggo seh paksana, Anak Manusia persuruhen iendesken man kalak perdosa.

46Kekekenlah, ota lawes kita. Nggo reh si ndudurken Aku."

Jesus itangkap (Mrk 14:43-50; Luk 22:47-53; Yoh 18:3-12)

47Sanga Jesus ngerana denga seh me Judas, sekalak i bas ajar-ajar si sepulu dua. Ibabana sada rombongan si maba pedang ras perpalu. Rombongan enda isuruh imam-imam si mbelin ras peminpin-peminpin kalak Jahudi.

48Judas nggo mereken tanda man rombongen e nina, "Ise kari kuema e me kalakna. Tangkaplah Ia!"

49Kenca seh Judas e minter ideherina Jesus nina, "Mejuah-juah Guru," jenari iemana Jesus.

50Tapi ngaloi Jesus man bana, "O teman, kai atendu reh ku jenda?" Itangkap kalak ndai Jesus, dingen nteguh itagangina.

51Perbahan si e ngelawan sekalak ajar-ajar Jesus. Idekdekna pedangna jenari itampulna sekalak juak-juak Imam si Mbelin seh retap cupingna.

52Tapi nina Jesus man ajar-AjarNa e, "Sembungken pedangndu e, sabap kalak si make pedang mate pagi ibahan pedang.

53La kin ietehndu maka banci Kupindo penampat BapangKu gelah IsuruhNa lebih sepulu dua pasuken tentera malekat nampati Aku?

54Tapi adi bage, ma lanai seh kai si nggo tersurat i bas Pustaka Si Badia, maka arus jadi bage?"

55Jenari nina Jesus man rombongen e, "Akapndu kin Aku enda pengerampok maka reh kam maba pedang ras perpalu nangkap Aku? Tep-tep wari nge Aku ngajar i bas Rumah Pertoton janah la itangkapndu.

56Tapi kerina enda arus jadi gelah seh kai si tersurat i bas Pustaka Si Badia." Jenari kiamen kerina ajar-ajar Jesus nadingken Ia.

Jesus i lebe-lebe Pengadilen Agama (Mrk 14:53-65; Luk 22:54-55, 63-71; Yoh 18:13-14, 19-24)

57Kenca bage ibaba kalak ndai Jesus ku rumah Kayapas, Imam si Mbelin. I bas rumah e nggo pulung guru-guru agama Jahudi ras peminpin-peminpin kalak Jahudi.

58Petrus ngikut-ngikut i dauh-dauh nari seh ku kesain rumah Imam si Mbelin e. Kenca seh i bas kesain e, kundul ia ras pengawal guna ngenehen kuga kedungenna.

59Imam-imam si mbelin ras kerina si ersidang ndarami saksi si nalahken Jesus gelah banci Jesus ibunuh.

60Tapi la idatna salah Jesus aminna gia nterem saksi si ngerana. Dungna tedis ku lebe dua kalak saksi,

61Jenari nina, "Pernah IkatakenNa, 'Aku ngasup ngeruntuhken Rumah Pertoton Dibata janah i bas wari si peteluken nggo ka dung Kubangun mulihi.'"

62Jenari tedis Imam si Mbelin nina man Jesus, "La lit jabapndu nandangi saksi si ngelawan Kam enda?"

63Tapi sinik saja Jesus. Ngerana ka Imam si Mbelin man Jesus, "I bas gelar Dibata si nggeluh kupindo gelah ersumpah kam man kami: Tuhu kin Kam Raja Penampat si ipadanken e Anak Dibata?"

64Erjabap Jesus, "Bagi si ikatakenndu e me. Tapi Kukataken man bandu: Mulai genduari nari idahndu me, Anak Manusia si isuruh Dibata kundul arah kemuhen si Mada Kuasa janah reh pagi i datas embun i langit."

65Megi kata Jesus e, emaka icaingken Imam si Mbelin uisna jenari nina, "Nggo IhinaNa Dibata! Man kadenta nari kin saksi? Genduari nggo ibegindu Ia enghina Dibata.

66Kuga iakapndu?" Erjabap kalak si ersidang, "Ia nggo ersalah janah arus ibunuh."

67Jenari iciduri kalak ndai ayo Jesus, itinjuina, deba nggudamisa,

68janah nina, "Kataken dage ise nggudam Kam, o Raja Penampat!"

Petrus mersoken Jesus (Mrk 14:60-72; Luk 22:56-62; Yoh 18:15-18, 25-27)

69Asum Petrus kundul i kesain, reh sekalak singuda-nguda ndeheri ia; singuda-nguda e juak-juak Imam si Mbelin. Nina man Petrus, "Kam pe megati kap ras Jesus kalak Galilea ah."

70Tapi merso Petrus i lebe-lebe kalak e kerina nina, "La kuangka katandu e."

71Jenari lawes Petrus ku pintu gerbang. Sekalak diberu, eme juak-juak si deban, ngidah ia, jenari nina man kalak si i je, "Ia kap teman Jesus kalak Nasaret e."

72Merso ka Petrus nina, "Pang aku ersumpah, la kutandai pe Ia!"

73La ndekahsa reh ka kalak tedis-tedis i je ndahi Petrus, jenari nina, "Pasti kam sekalak i bas TemanNa e. Ketandan kap arah cakapndu!"

74Jenari ersumpah Petrus nina, "Kutandai pe lang Ia. Adi la tuhu si kukataken e Dibata ngukum aku!" Paksa e tekuak manuk.

75Janah minter inget Petrus kai si ikataken Jesus man bana, asum nina Jesus man bana, "Ope denga tekuak manuk nggo ipersokenndu Aku telu kali." Jenari lawes ia ndarat, tangis ia sabap ceda atena.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran