Alkitab Mobile SABDA
[VER] : [KARO]     [PL]  [PB] 
 <<  Mazmur 103 >> 

Kekelengen Dibata

1I bas Daud nari. Pujilah TUHAN, o tendingku, tendi, kula, ukurku pujilah GelarNa si badia!

2Pujilah TUHAN, o tendingku, ula lupa kerina KiniulinNa.

3IalemiNa kerina dosa-dosandu, dingen IpepalemNa kerina penakitndu.

4I bas kuburen nari IpulahiNa kam, ipasu-PasuNa kam alu keleng ate ras perkuah AteNa.

5Alu kiniulin IdemiNa geluhndu, desken rajawali tetap kam megegeh dingen nguda.

6Bujur perbahanen TUHAN man kalak si tertindas, janah IberekenNa bana kebujuren.

7IpetangkasNa sura-SuraNa man Musa, dingen kalak Israel IbereNa ngidah KinimbisanNa.

8TUHAN e perkuah dingen perkeleng kap, la pedas Ia merawa, dingen dem alu keleng ate si tetap.

9Kentisik ngenca TUHAN nembeh, Ia labo rasa lalap merawa.

10Labo kita IukumNa sue ras dosanta, labo ia erbalas man banta sue ras kesalahenta.

11Tapi bali ras ganjangna langit i babo doni nari, bage kal me belinna keleng AteNa man kalak si erkemalangen BaNa.

12Bagi dauhna Timur i Barat nari, bage me IpedauhNa dosa-dosanta i bas kita nari.

13Bagi keleng ate bapa man anak-anakna, bage kal me pengkelengi Dibata kalak si erkemalangen man BaNa.

14Sabap ieteh TUHAN i bas kai nari kita ItepaNa, IngetNa me maka abu kap kita.

15Bali ras dukut, geluh manusia pe labo kap ndekah, erbunga desken bunga i mbalmbal;

16kenca iembus angin, masap me ia, lanai nari lit si ngidahsa.

17Tapi kalak si erkemalangen man TUHAN, tetap IkelengiNa; KiniulinNa tetap seh rasa lalap,

18man kalak si encikep PerpadanNa, janah alu tutus patuh man PerentahNa.

19TUHAN ngerajai Surga, Ia raja i babo kerinana.

20Pujilah TUHAN o malekat-malekat si mbisa, ndengkehken dingen patuhi PerentahNa.

21Pujilah TUHAN, o kerina kuasa-kuasa i langit, kerina suruh-SuruhenNa si nehken PerentahNa.

22Pujilah TUHAN o kerina TinepaNa, i bas kerina KinirajanNa. Pujilah TUHAN o tendingku.


  Share Facebook  |  Share Twitter

 <<  Mazmur 103 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran