Dual PanelPertoton i bas paksa kesusahen
1Masmur Daud. Kupuji Kam, o Dibata, ula Kam sinik saja.
2Kalak jahat ras kalak penipu nerang aku, ibelaskenna ranan la tuhu kerna aku.
3Irawaina aku alu ngataken kata si jahat, alu la ersebap iserangna aku.
4Aminna pe keleng ateku ia dingen kutotoken ia, bage pe nembeh kang atena aku.
5Kiniulinku ibalasna alu kejahaten, keleng ateku iulihkenna alu nembeh ate.
6Berelah kalak jahat ngadili imbangku e, gelah imbangna jine ngaduken ia.
7Pelepas ia ipereksa gelah terdat kesalahenna, pelepas pertotonna pe nambahi dosana.
8Wari-wari kegeluhen pedas min peltep, jabatenna pe man kalak si deban.
9Melumanglah anak-anakna, mbalulah ndeharana.
10Anak-anakna pe jadi pemindo-mindo si la lit rumahna, ipelawes i bas rumahna si nggo runtuh nari.
11Irampas peridonnalah kerina erta-ertana, janah kalak si deban ngerampasi ulih dahinna.
12Ula min lit kalak si erkuah ate man bana, bage pe nandangi anak melumang si itadingkenna.
13Matelah min kerina kesusurenna, gelah gelarna lanai iinget kesusuren si arah pudi.
14Inget TUHANlah min lalap kejahaten nini-ninina, dosa-dosa nandena asa ndigan pe la ialemi.
15Inget TUHANlah min lalap dosa-dosana, tapi ia jine nggo ilupaken.
16Sabap kalak si bage la pernah ingetna encidahken kekelengen, itindasna kalak medanggel dingen musil; ibunuhna kalak si la ergegeh.
17Erkiteken ngena atena sumpah-sumpah ia jine kena sumpah. Erkiteken labo ia nggit masu-masu, ula min lit sekalak pe si masu-masu ia.
18Numpahi kalak biasa saja nge akapna, bali akapna ras make uisna. Mersaplah sumpahna e kubas badanna bagi lau, dingen ku bas tulan-tulanna bagi minak.
19Desken pencabini uis, bage ia icabini sumpahna e, dingen ngiket ia bagi gendit si ipakena tep-tep wari.
20O TUHAN, dabuhken min ukumen si bage man musuhku, ku babo kalak si ngerana jahat kerna aku!
21Tapi sue ras PadanNdu sampati min aku, o TUHAN Dibatangku, pulahi aku rikutken kiniulin dingen keleng AteNdu.
22Sabap aku kalak mesera dingen musil, pusuhku mesui.
23Menam aku bene desken awih-awih tupung berngi, aku ikisamken bagi labang.
24Nggirgir takal tiwenku perban puasa aku, ringut dagingku tading tulan lanai erjukut.
25Kasa kalak si ngidah aku tawa ia, janahna ngupir megombang ia man bangku.
26O TUHAN Dibatangku sampati aku; erkiteken keleng AteNdu si tetap kelini min aku.
27Bahan maka ieteh imbang-imbangku, maka Kam TUHAN me si ngkelini aku.
28Isumpahina gia aku, tapi Kam si masu-masu aku, talukenlah imbang-imbangku, tapi aku suruh-SuruhenNdu, bahanlah meriah ateku.
29Tamburilah imbang-imbangku alu erbahanca ia mela, mela akapna encabini ia desken makeken uis.
30Alu sora megang kukataken bujur man TUHAN; kupuji Ia i tengah-tengah jelma si nterem.
31Sabap IbelaNdu kalak si musil, IpulahiNdu ia i bas kalak si mereken ukumen mate man bana.