Dual PanelEnde-enden pujin
1O kam kalak bujur, ersuraklah meriah i bas TUHAN. O kalak bujur, pujilah Ia.
2Alu kulcapi, katakenlah bujur man TUHAN, ergendang dingen rendelah man BaNa.
3Endekenlah ende-enden si mbaru man BaNa, alu mejile kuitlah kulcapi janah ersuraklah meriah.
4Ranan TUHAN kerina tuhu, dingen kerina PerbahanenNa terarapken tuhu.
5Ngena ate TUHAN kebujuren dingen keadilen, keleng AteNa rasa lalap ndemi doni enda.
6Alu PerentahNa jine TUHAN njadiken langit jadi me matawari bulan ras bintang-bintang bekas KataNa.
7Lau lawit IpepulungNa kerina i bas sada ingan, lawit si mbelang itombengna maka ula mambur.
8O doni kerina, mbiarlah man TUHAN! O bangsa-bangsa i doni pemuliakenlah Ia.
9Adi ngerana Ia emaka jadi minter, IperentahkenNa emaka lit kerina.
10Igagalken TUHAN rencana bangsa-bangsa sura-sura bangsa doni isia-SiakenNa.
11Tapi rencana TUHAN tetap rasa lalap, sura-SuraNa la masap rasa lalap seh rasa lalap.
12Malem kal ate bangsa si ngakui TUHAN jadi Dibatana, sangap kal bangsa si terpilih jadi SikerajangenNa.
13Natap TUHAN i Surga nari, ngenen kerina jelma manusia.
14I bas kerina KinirajanNa nari iperdiateken TUHAN kerina kalak si ngiani doni enda.
15Kerina perukuren manusia IbentukNa, dingen IetehNa perbahanen manusia kerina.
16Raja menang labo erkiteken teremna tenterana, kalak si mbisa terkelin labo perban gegehna.
17Kuda perang la terarapken guna ndatken kemenangen, gegehna si mbelin la banci ngkelini.
18TUHAN ngkawali kalak si ngikutken Ia, kalak si ernalem man keleng AteNa si la ersibar.
19IpulahiNa kalak si patuh bana i bas kematen nari, dingen tetap IpegegehNa tupung i bas kelihen pe.
20TUHAN saja sibahan pengarapenta, Ia kap si nampat dingen si kawalta.
21Meriah ukurta erkiteken Ia, tek kita man GelarNa si Badia.
22O TUHAN, kelengi min kami lalap, sabap kami erpengarapen man BaNdu.