Dual PanelPertoton gelah selamat
1Masmur Daud, tupung Saul nuruh kalak ngawasi rumahna guna munuh.
2Pulahi min aku i bas musuh-musuhku nari, o Dibata, kawalilah aku i bas kalak si nerang aku.
3Pulahi min aku i bas kalak jahat nari, i bas kalak si ngamburken dareh kelini min aku.
4Nehenlah! Igempangina aku, munuh aku atena. Dilaki si merawa pulung ngelawan aku, la erkiteken dosa ras salah si kubahan.
5La erkiteken aku ersalah, o TUHAN, tapi pedas ia lawes ersikap ngelawan aku.
6Kekeken dingen sampatilah aku TUHAN, o Dibata si Meganjang, o Dibata nu Israel, nehenlah min. Kekeken dingen ukum min bangsa-bangsa, ula kelengi kalak jahat si penghianat.
7Kenca ben wari reh ka ia, erbaung desken biang tupung ia ngkeleweti kota.
8Dengkehkenlah kai si ikatakenna! Dilahna bali ras pedang, iakapna la lit si megi rananna.
9Tapi ItawaiNdu ia, o TUHAN kerina bangsa perbegu iuru-UruNdu.
10Kam kap gegehku, man bandu ende-enden pujinku, sabap Kam kap Dibata tahan turungku.
11Dibatangku ngkelengi aku dingen IdahiNa aku. IpelepasNa kuidah musuh-musuhku talu.
12O TUHAN ampang-ampang kami, o Dibata ula ia IbunuhNdu, gelah ula lupa bangsangku. Alu KuasaNdu kerapkenlah ku jah ku jenda, talukenlah ia, o Tuhan, sekawal kami.
13Sabap erdosa ia arah babahna, alu kata-kata si ibelaskenna. Kena siding kesombongennalah ia, sabap meriah iakapna numpahi dingen erbual.
14O Dibata, kernepkenlah ia alu PernembehNdu, kernepkenlah ia seh keri. Gelah kerina kalak meteh maka Dibata kap si merentah Israel, dingen PemerentahNa seh ku belang-belang doni.
15Kenca ben wari reh ka imbang-imbangku, erbaung ia desken biang ngkeleweti kota.
16Seri ia ras biang ngkaisi sampah, jenari ngereng adi la besur.
17Tapi rende aku kerna KuasaNdu, tep-tep erpagi-pagi kuendeken keleng AteNdu si tetap. Kam kap kota bentengku inganku cicio i bas paksa kesusahen. <59:18> - Kupuji Kam, o Dibata, Kam kap sekawalku, kota bentengku, Kam kap Dibata si ngkelengi aku.