Alkitab Mobile SABDA
[VER] : [KARO]     [PL]  [PB] 
 <<  Mazmur 72 >> 

Pertoton guna raja

1I bas Salomo nari. Ajarkenlah man raja undang-UndangNdu, o Dibata, bereken min man anak raja KebujurenNdu,

2gelah iperentahna BangsaNdu alu adil, dingen irajaina kalak musil alu bujur.

3Dame dingen mehumurlah negeri enda, dingen kerinalah ngenanami kebujuren.

4Irungguken rajalah kalak musil alu bujur, isampatinalah kalak si kekurangen italukenlah kalak si nindihsa.

5O Dibata isembah BangsaNdulah Kam, kidekah matawari ras bulan ersinalsal denga; kerina kesusuren muji Kam gelah.

6Bali min raja ras udan si naktak i bas mbalmbal bagi udan meder ngelitapi juma-juma.

7Gelah kebujuren erdalan kidekah geluhna, dingen kemakmuren tetap kidekah bulan ersinalsal.

8Mbelang KinirajanNa seh i bas lawit ku lawit, menaken i bas Lau Eprat nari seh ku tampuk doni.

9Kalak si ringan i taneh mesawang nembah man bana, kerina imbang erjimpuh i adepen nahena.

10Raja-raja Sepanyol ras pulau-pulau, maba luah man bana. Raja-raja Arab ras Etopia, reh mereken persembahen.

11Kerina raja-raja erjimpuh i adepenna, kerina bangsa jadi si erdahinna.

12Kalak musil si mindo man bana isampatina, bage pe kalak si kekurangen ras kalak si la lit si nampatisa.

13Ikelengina kalak si la ergegeh dingen musil, ikelinina geluh kalak si nggeluh i bas kekurangen.

14Ibebaskenna i bas penindasen dingen i bas kalak merawa nari, sabap meherga kap gelah kalak e man bana.

15Mejuah-juahlah raja! Ipersembahkenlah man bana emas i Arab nari. Itotokenlah ia katawari pe, dingen Dibatalah lalap si masu-masu ia.

16Mbuahlah page i belang-belang negeri, uruk-uruk dem alu ulih juma. Mehumurlah tanehna bali ras deleng-deleng Libanon, dingen penduduk kotana desken dukut i mbalmbal.

17Tersingetlah gelar raja rasa lalap, kidekah ersinalsal denga matawari, terberitalah ia. Kerina bangsa muji ia gelah, ertotolah ia kerina mindo pasu-pasu i bas Dibata nari, janah ertoto guna kesangapen raja.

18Terpujilah TUHAN Dibata nu Israel, Ia ngenca si ngelakoken perbahanen si mejin.

19Terpujilah GelarNa si mulia seh rasa lalap; kerina doni demlah alu KemulianNdu! Amin! Amin!

20Enda me pertoton Daud anak Isai


  Share Facebook  |  Share Twitter

 <<  Mazmur 72 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran