Dual PanelEnde-enden pesta
1Masmur Asap.
2Ersuraklah man Dibata gegehta, man Dibata Jakup, ersuraklah.
3Palu gendang rendelah, petik gambus ras kuit kulcapi alu mejile.
4Embus terompet i bas pestanta, i bas pesta bulan mbaru dingen bulan purnama.
5Enda me perentah i bas Dibata Israel nari, si man dalanenken i Israel.
6Perentah e ibereken Dibata man kalak Israel, tupung iserang Dibata negeri Mesir. Lit kubegi sora, si langa pernah kubegi ope si enda nina,
7"Nggo Kuangkat baban i bas takalndu nari, nggo Kuangkat baban i bas barandu nari.
8I bas kesuhsahen erlebuh kam, emaka reh Aku ngkelini kam. Kualoi kam i bas lenggur inganKu cebuni nari, i Sumbul Meriba kam Kuuji.
9O bangsangKu, begiken min kata persingetKu, o Israel, dengkehken min Aku.
10Ula lit Dibata si deban i bas kam, ula nembah man Dibata bangsa si deban,
11Aku kap TUHAN Dibatandu, si maba kam ndarat i Mesir nari. Ngangaken babahndu maka Kubere nakan kam.
12Tapi bangsangKu la nggit megiken katangKu. Israel la nggit patuh man bangKu.
13Emaka Kupelawes pusuhna batu-batun, jenari ikutkenna bagi ate-atena.
14Oh adi nggit min ndai bangsangKu megiken katangKu, adi nggit min ndai ia patuh man bangKu,
15mis min ndai Kutaluken imbang-imbangna, kerina musuhna Kulawan.
16Kalak si ernembeh ate bangKu, alu nggirgir erjimpuh me ia i adep-adepenKu, rasa lalap ia kena ukumen. <81:17> - Tapi man bandu Kubereken gandum si mejilena, dingen Kubesuri alu tengguli kerangen."