Dual PanelKerna kegeluhen
1Gelar si merim ulin asangken minak wangi si meherga; wari kematen ulin asangken wari ketubuhen.
2Madin ndahi ingan kalak si rate ceda asangken ndahi ingan kalak erpesta. Sabap arus maka usur siinget maka kematen nggo nimai kerina kalak.
3Ndele ate ulin asangken tawa-tawa. Amin pe ayo berjut, tapi tambah-tambah pengertin.
4Kalak lenge gelgel ia ngayaki kesenangen. Kalak pentar iukurina kematen.
5Madin kita ipandang kalak si erpemeteh, asangken ipuji kalak motu.
6Adi tawa kalak motu la lit ertina, bali kap e ras ranggas erkuritik ipan api.
7Adi kalak pentar nipu, bodoh kap perbahanenna e. Adi kalak ngaloken sogok, icedakenna kap biakna si mehuli.
8Kai-kai pe, ulin kap pendungina asangken pemenana; ulin ate saber asangken ukur meganjang.
9Ula pedas-pedassa das darehndu, sabap nembeh ate ringan kap i bas pusuh kalak lenge.
10Ula sungkun, "Ngkai maka ulin si nai asangken si genduari?" Kalak lenge ngenca bage penungkunenna.
11Kalak nggeluh arusna pentar; ergana pemeteh bali kap ras barang pusaka.
12Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.
13Perdiatekenlah kai si ibahan Dibata. Sabap ise kin beluh pepinter kai si nggo ipegeduk Dibata?
14Emaka malemlah atendu tupung kam sangana sangap. Tapi tupung kam kena cilaka ula kam lupa maka Dibata nge si merekenca e kerina. La si eteh kai si banci jadi pagi.
15Sia-sia nge geluhku enda, tapi i bas si e nggo kuidah kerinana. Lit kalak bujur pedas mate aminna pe bujur ia. Tapi lit kalak jahat ndekah nggeluh aminna pe lalap ia erbahan kejahaten.
16Ula mehulisa dingen ula pentarsa. Man kai munuh bana?
17Ula ka jahatsa dingen motusa. Man kai mate ope denga terpaksa?
18Silahkenlah si dua e. Adi erkemalangenlah kita man Dibata la banci la terkelin nge kita.
19Belinen kuasa kepentaren nandangi sekalak jelma asangken kuasa sepuluh raja nandangi sada kota.
20I bas pertibi enda labo lit kalak serta, si katawari pe mehuli perbahanenna dingen la pernah ersalah.
21Ula padah nggit kal megiken ranan kalak, banci jadi kam sangana icekuraki sekalak suruh-suruhenndu.
22Kam pe igejapndu nge, maka kam pe megati encekuraki kalak si deban.
23Kerina nggo kupergermetken alu kepentarenku, tapi akin kuayaki kepentaren reh dauhna ia i bas aku nari.
24Ise si ngasup metehsa kai ertina nggeluh enda? Mbagessa ia, emaka la ngasup kita ngertikenca.
25Amin bage pe tetap nge aku erlajar muat pemeteh gelah ndatken kepentaren dingen meteh jabapen kerina penungkunenku, gelah kueteh uga jahatna ras lengena kebodohen.
26Kueteh maka pagiten kap diberu asangken kematen. Keleng ate si icidahkenna bali kap ras jala dingen siding si ngkenai kam; tan diberu e ndakep kam desken rante si nteguh. Kalak si ngikut peraten Dibata pulah i bas sidingna nari tapi kalak perdosa tentu kena sidingna.
27Tuhu nina Pengerana: Sitik-sitik tambah pengertinku kerna si enda tupung aku ndarami jabapna.
28Kudarami ka jabap si deban tapi la dat aku. I bas seribu dilaki jumpa aku sekalak si man hamaten tapi diberu sada pe lang.
29Enda ngenca si kudat: Itepa Dibata manusia jadi kalak bujur-bujur tapi kita jine mahanca banta serbut dingen rilet-ilet.