Dual Panel1Andiko seh senangna iakap kalak pentar. Kerina perkara ietehna njabapsa. Kepentaren erbahanca ia cirem siang ayona, sierbahanca ngadi berjutna.
Patuhlah man raja
2Lakokenlah kai si iperentahken raja, janah ula merudu-rudu erbahan padan man Dibata.
3Lit kuasa raja erbahan kai atena, emaka madin lawes i bas ia nari adi merawa ia.
4Raja erbahan kai pe alu kuasa, ise pe la pang ngelawan kai si ikatakenna.
5Kalak si patuh man bana, teneng akapna; kalak pentar me ia dingen itehna ndigan ras katawari ngelakoken si e.
6Ndahiken kai pe tehna ndigan ras katawari paksana, tapi sitik ngenca si metehsa si e kerina.
7La lit ise pe metehsa kai si jadi pagi, la lit ise pe beluh nurikenca.
8La lit ise pe si ngasup ngambati kematenna, ntah nuncun wari kematenna. Enda me sada peperangen si la tersilahken; penipu pe la terpulahisa bana i jenari.
Kalak bujur ras kalak jahat
9Kerina si enda kuidah tupung aku rukur kerna kai si jadi i bas pertibi enda. I bas pertibi enda kuidah maka lit sekalak si erkuasa janah kalak si deban ngenanami kiniseran erkiteken kuasana.
10Pernah kuidah kalak jahat mate dingen ikuburken. Tapi tupung aku mulih i bas kuburen nari, kubegi ia ipujiken kalak i bas kota inganna erbahan jahat ndube. Dage e pe sia-sia nge kerina.
11Ngkai maka bage kal iakap kalak murahna erbahan jahat? Sabapna eme erkiteken kejahaten la minter iukum.
12Aminna pe seratus kejahaten ilakoken kalak perdosa, tapi tetap nge ia nggeluh. Tuhu ikataken kalak nina, "Adi kam patuh man Dibata, kerina erdalan alu mehuli.
13Tapi, kalak jahat ndatken kiniseran. Geluhna pedas-pedas perlawesna bagi awih. La metua pe, mate kap ia, perban la patuh man Dibata."
14Tapi kerina e bual kap. Nehenlah kai si jadi i babo pertibi enda: lit kalak bujur ndatken ukumen si arusna kin man kalak jahat; lit kalak jahat ndatken upah si arusna kin man kalak bujur. Janah e pe sia-sia.
15Emaka rikutken pengakapku arus kalak ermeriah ate. Erkiteken kidekah geluhna i bas doni enda, la lit kesenangen si deban man bana, seakatan man, minem dingen ermeriah ate. Kerina bekasna latih e ngenca banci inanamina, i bas kinigeluhen si ibereken Dibata man bana i bas doni enda.
16Emaka tupung kucubaken ndarami kepentaren janah melajari kai si jadi i bas pertibi enda, kueteh maka aminna pe kita la tunduh suari ras berngi la ngadi-ngadi,
17labo kita ngasup ngantusisa kai si ibahan Dibata. Kugapa pe pengelatihinta, labo terantusi kita. Iakap kalak pentar ietehna tapi si tuhuna labo iertina.