Alkitab Mobile SABDA
[VER] : [KARO]     [PL]  [PB] 
 <<  Roma 10 >> 

1O senina-seninangku, i bas pusuh peratenku ngarap kal aku gelah ikelini Dibata min bangsangku kalak Israel. Ertoto pe aku man Dibata guna si e.

2Pang aku ngatakenca maka kalak Israel e tuhu-tuhu tutus er-Dibata, tapi ketutusenna e la erpalasken pemeteh si payo.

3La ia nggit mperdiateken kuga Dibata ngerembakken manusia kempak DiriNa. Iusahakenna erbahan kebenaren jine, seh maka la ia nggit takluk man kebenaren Dibata.

4Sabap Kristus eme penggenepen Undang-undang seh maka kerina kalak si tek man BaNa rembak ras Dibata.

Keselamaten e isikapken Dibata man kerina manusia

5Kerna manusia rembak ras Dibata arah ndalanken Undang-undang nggo isuratken Musa, "Kalak si ndalanken kai si ipedahken Undang-undang idatna me kegeluhen arah perbahanenna e."

6Tapi kerna manusia rembak ras Dibata arah kiniteken lit tersurat i bas Pustaka Si Badia, "Ula nungkun i bas ukurndu, 'Ise nge pagi nangkih ku Surga?' (eme guna maba Kristus ku teruh, ku tengah-tengahta).

7Bage pe ula nungkun i bas ukurndu, 'Ise nge pagi nusur ku teruh, ku ingan kalak si nggo mate?' (eme mpekeke Kristus i bas si mate nari)."

8Dage kai kin si ikataken i bas Pustaka Si Badia? Enda me, "Kata Dibata e rembak ras kam, nggo lit i bas babahndu dingen nggo pe lit i bas pusuhndu" -- eme kata si iberitaken kami, si nuntut gelah kam erkiniteken.

9Adi ngaku kam alu babahndu, "Jesus Tuhan kap," janah tek kam i bas pusuhndu maka Jesus nggo ipekeke Dibata i bas si mate nari, maka terkelin me kam.

10Sabap alu musuh me kalak erkiniteken seh maka ia irembakken ras Dibata, janah alu babah kalak ngaku seh maka ia ikelini.

11I bas Pustaka Si Badia lit tersurat, "Ise tek man BaNa la kecewa."

12Si enda maksudna kerina manusia, sabap labo lit lainna kalak Jahudi ras kalak Junani. Sada ngenca Tuhan, eme Tuhan kerina manusia. Ia melumbar mere man kalak si erlebuh man BaNa.

13Bagi lit tersurat i bas Pustaka Si Badia, "Kerina kalak si erlebuh mindo penampat man Tuhan, IkeliniNa nge."

14Tapi kuga banci kalak erlebuh mindo penampat man Tuhan adi langa ia tek man BaNa? Kuga banci ia tek man BaNa adi langa pernah ibegina pe kerna Ia? Kuga banci ibegina adi la lit si meritakenca?

15Kuga banci kalak meritaken berita e adi la ia isuruh? I bas Pustaka Si Badia lit tersurat, "Seh kal tuhu ulina kerehen kalak si maba Berita Si Mehuli e."

16Tapi labo kerina kalak mehuli pengalo-ngalona nandangi Berita Si Mehuli e. Nina Nabi Jesaya, "O Tuhan, ise nge tek nandangi berita si ipeseh kami?"

17Dage kiniteken rehna arah megi Berita e, janah isi Berita e, eme Kata kerna Kristus.

18Tapi nungkun aku: Tuhu kin nge la ibegina berita e? Tentu saja nggo ibegina. Bagi lit tersurat i bas Pustaka Si Badia, "Sorana nggo terbegi ku belang-belang doni enda, janah katana nggo seh ku tampuk doni."

19Nungkun ka aku: Uga kerna Israel? Ntah la kin iangkana? Guna njabap penungkunen enda, perlebe kubuat si nggo isuratken Musa, "Nina Dibata, 'Mecimberu kam pagi Kubahan nandangi bangsa si labo bangsa pilihenKu, merawa pagi atendu Kubahan nandangi bangsa si motu.'"

20Janah lebih asa si e Nabi Jesaya ngerana alu la biar-biaren, nina, "Nina Dibata, 'Kalak si la ndarami Aku, jumpa ras Aku; Kucidahken diringKu man kalak si la nungkuni kerna Aku.'"

21Tapi man kalak Israel, nina Dibata, "Gedang-gedang wari Kududurken tanKu man bangsa si la patuh dingen si nimbak."


  Share Facebook  |  Share Twitter

 <<  Roma 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran